شوقىسۋ اۋىلىنداعى ءبىر اۋىسىمدا 20 تۇرعىندى قابىلدايتىن مەديتسينالىق پۋنكت قۇرىلىسىنا 126,5 ملن تەڭگە, ال سارىساي اۋىلىنداعى ءبىر اۋىسىمدا 25 تۇرعىندى قابىلدايتىن مەديتسينالىق مەكەمە قۇرىلىسىنا 133,8 ملن تەڭگە قاراجات جۇمسالدى.
«اۋىل تۇرعىندارى ەمدەۋ مەكەمەسىنىڭ اشىلۋىن كوپتەن كۇتكەن ەدى. سىرقاتتاردى قابىلداپ, قاجەتتى ەم-دوم جۇرگىزىپ, جولداما بەرىپ, سابيلەرگە ەكپە سالۋ ءۇشىن ءوز اۋىلىمىزدا امبۋلاتوريا بولعانىن قالادىق. ۇسىنىس قىلىپ ايتتىق. ءوتىنىشىمىز ورىندالىپ, جاقسى دا جايلى ەمدەۋ مەكەمەسى سالىنعانىنا قۋانىپ جاتىرمىز. امبۋلاتوريانىڭ جۇمىسىن جۇرگىزەتىن قاجەتتى مامان وزىمىزدە بار. ول 40 جىلدان بەرى وسى سالادا ەڭبەك ەتىپ جۇرگەن رايا اقجاپاروۆا», دەيدى سارىساي اۋىلىنىڭ تۇرعىنى داريعا ءالمۇراتوۆا.
مەديتسينالىق پۋنكتتەردىڭ اشىلۋ سالتاناتىنا شالقار اۋدانىنىڭ اكىمى جانبولات جيدەحانوۆ پەن وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى سەرىك تاجىعۇلوۆ قاتىستى.
ەكى نىسان دا زاماناۋي مەديتسينالىق-قۇرال جابدىقتارمەن جابدىقتالىپ, قۇرىلىس بارىسىندا ينكليۋزيۆتىك تالاپتار قاتاڭ ساقتالدى. اسىرەسە, قوزعالىسى شەكتەۋلى تۇرعىنداردىڭ ەركىن كىرىپ-شىعۋىنا دا ىڭعايلى ەتىپ سالىنعان.
ايتا كەتۋ كەرەك, قايتارىلعان اكتيۆتەر قاراجاتى ەسەبىنەن اقتوبە وبلىسىنىڭ ەلدى مەكەندەرىندە 11 مەديتسينالىق امبۋلاتوريا قۇرىلىسى جوبالانعان. قازىرگى ۋاقىتتتا 7 نىسان پايدالانۋعا بەرىلسە, 4 نىساننىڭ قۇرىلىسى اياقتالۋعا جاقىن.
اقتوبە وبلىسى
