فوتو: قانات سايلىباەۆتىڭ جەكە مۇراعاتىنان
قۇقىقتىق ستاتيستيكا جانە ارنايى ەسەپكە الۋ ورگاندارىنىڭ پورتالىندا 2024 جىلى گەرمانيادا قاستاندىقپەن ولتىرىلگەن سۋديا ايگۇل سايلىباەۆانىڭ كۇيەۋى مەن ەنەسىنە قاتىستى ىزدەستىرۋ حابارلامالارى جاريالاندى.
ىزدەۋ جۇمىستارىنىڭ باستاماشىسى – ىشكى ىستەر مينيسترلىگى. ءىستى جەتىسۋ وبلىسى, تالدىقورعان قالاسىنىڭ پوليتسيا قىزمەتكەرلەرى جۇرگىزىپ جاتىر. ىزدەستىرۋگە مارقۇمنىڭ كۇيەۋى الەكساندر دونتسوۆ جانە ونىڭ اناسى, سايلىباەۆانىڭ ەنەسى ناتاليا دونتسوۆا جاريالانعان.
ەسكە سالايىق, 2024 جىلعى 7 ماۋسىمدا ايگۇل سايلىباەۆانىڭ باۋىرى قانات سايلىباەۆ گەرمانياداعى قارىنداسىنىڭ جوعالىپ كەتكەنىن حابارلاعان ەدى. ايتا كەتەيىك, ايگۇل سايلىباەۆا – استانا قالاسىنداعى سارىارقا اۋداندىق سوتىنىڭ بۇرىنعى سۋدياسى جانە «بولاشاق» باعدارلاماسىنىڭ تۇلەگى.
كەيىن سىرتقى ىستەر مينيسترلىگى جەرگىلىكتى پوليتسياعا دەرەۋ حابار بەرىپ, ىزدەستىرۋ جۇمىستارى باستالعانىن مالىمدەدى. ال 16 ماۋسىمدا جوعالعان قازاقستان ازاماتىنىڭ ءمايىتى تابىلدى.
ال قاراشا ايىندا قازاقستاندا سۋديانىڭ ولىمىنە قاتىستى قىلمىستىق ءىس قوزعالعانى بەلگىلى بولدى.
ايگۇل سايلىباەۆانىڭ اعاسى قانات سايلىباەۆتىڭ ايتۋىنشا, قارىنداسى 3 ماۋسىمنان بەرى بايلانىسقا شىقپاعان. سونىمەن قاتار ايگۇل سايلىباەۆانىڭ قۇربىسى مەن ءسىڭلىسى ونىڭ كۇيەۋى مەن ەنەسى تاراپىنان قىسىم كورگەنىن, سونداي-اق كىشكەنتاي قىزىن الىپ قويماق بولعانىن ايتقان ەدى.
