ونەرگە بولىنگەن قارجى قالتاعا كەتىپ جاتىر

ماسكەۋلىك رەجيسسەر, قانداسىمىز اقمادي سارباسوۆ ءبىراز جىلداردان بەرى قازاقستانعا ات باسىن بۇرىپ, اتا مە­كەن­مەن شىعارماشىلىق بايلانىستا جۇمىس ىستەپ ءجۇر. ونىڭ قويعان سپەكتاكلدەرى وبلىس ورتالىقتارىنداعى دراما تەاترلارىندا تابىستى ءجۇردى. اقمادي ۋاحيت ۇلى وسى­دان ءبىر جارىم جىلداي بۇرىن قوستانايداعى ءى.وماروۆ اتىنداعى وبلىستىق قازاق دراما تەاترىندا دا بىرنەشە شىعارما قويىپ, كورەرمەننىڭ كوڭىلىنەن شىققان بولاتىن. قوستانايدا ىسكەرلىك ساپارمەن جۇرگەن رەجيسسەردىڭ ونىڭ تەاتر ونەرىن دامىتۋ, كورەرمەننىڭ تالعامىن تاربيەلەۋ جانە بۇگىنگى تەاترلاردا قالىپتاسىپ وتىرعان جاعداي تۋرا­لى ويلارىن ءبىلۋ ماقساتىمەن ونى اڭگىمەگە تارتقانبىز. – اقمادي ۋاحيت ۇلى, وسىدان ءبىر جا­­رىم جىل بۇرىن قوستا­نايداعى قازاق درا­ما تەاترىندا لاتىن امەريكاسى ادە­بيە­تىنىڭ ءىرى وكىلى ەنتوني بەردجەستىڭ “زا­ۆودنوي اپەلسين” اتتى رومانى بويىنشا ءوزىڭىز قويعان “تەمىر ويىنشىق” سپەكتاكلىن كورەرمەن ۇمىتا قويعان جوق. سودان كەيىن قايدا بولدىڭىز, نە ءبىتىردىڭىز؟ – مەن سول ءوزىڭىز ايتقانداي, اينا­لاسى ءبىرجارىم جىلداي ۋا­قىت­تىڭ ىشىندە قازاقستان تەاتر­لارىندا ءتورت سپەكتاكل قويدىم. اتاپ شىعايىن, استاناداعى ورىس دراما تەاترىندا ۆاسيلي سي­گارەۆ­تىڭ “بۋردالاكتار وتباسى” دەگەن سپەكتاكلىن ساحنالادىم. بۇل بۇگىنگى قوعامداعى, ءتىپتى الەمدەگى دەپ ايتساق تا بولادى, ناشاقورلىق ىندەتىنە قارسى ۇندەيتىن شىعارما. استانا كورەرمەن­دە­رىنە ۇنادى دەپ بىلەمىن. وسى قويىلىم ءۇشىن “نۇر وتان” پارتياسى استانا قالا­لىق فيليالىنىڭ ماقتاۋ گراموتاسى­مەن ماراپاتتالدىم, سونداي-اق استانا قا­لالىق اكىمدىگى دە ريزا­شىلىعىن ءبىلدىردى. ودان كەيىن كورەي تەاترىنىڭ سۇراۋىمەن سول تىلدە “گە-سەننىڭ باستان كەشكەن­دەرى” مۋزىكالىق كومەدياسىن قويدىم. ول شىعارما تەاتر ساحنا­­سىندا ءجۇرىپ جاتىر. قازاق ءتىلىن­دەگى ەكى سپەكتاكلدى اتىراۋ قازاق دراما تەاترىندا ساحنالا­دىم. بۇل ەكەۋى دە اۋدارما شىعارمالار, سەر­گەي بەلوۆتىڭ “مامۋليا” پەساسى مەن روبەر تومانىڭ “سەگىز سۇيىكتى ايەل” كومە­دياسىن اتىراۋلىقتار جىلى قابىلدادى. – ءسىز ءبىراز جىلداردان بەرى اتا مەكەنگە كەلىپ, قازاقستانداعى تەاتر­لارمەن قويان-قولتىق جۇمىس ىستەپ ءجۇرسىز. سىرتكوز رەتىندە ەلىمىزدەگى تەاترلار جاعدايى تۋرالى نە ايتار ەدىڭىز؟ – مەن وسى ساۋالىڭىزعا ءسال شەگىنىس جاساپ جاۋاپ بەرگىم كەلەدى. مادەنيەتتىڭ قوعام الدىنداعى باعاسىنا توقتالىپ وتسەم دەيمىن. تەك قانا تەاتر ەمەس, جال­پى ءومىر­­دىڭ كورىنىسى ءبىزدىڭ مادەنيەتىمىز­دەن باستالادى. ءبىز قالاي ءومىر ءسۇرىپ وتىرمىز, قالاي جۇمىس ءىس­تەي­مىز, قوعامدى قالاي قۇرىپ, بالا­لارىمىزدى قالاي تاربيەلەي­مىز, مىنا ومىرگە قالاي قاراي­مىز؟ قىسقاسى, مادەنيەت وسى سۇراققا جاۋاپ بەرەدى, ال سونىڭ بارلىعى­نىڭ كەس­كىنىن ونەردە بەينەلەيدى. ال مادەنيەتكە ءبىز قازىر ءجيى ەستي­تىن “تەحنولوگيا” دەگەن تۇسىنىك-تەر­مين ساي كەلمەيدى, سەبەبى ءما­دە­نيەت دامىمايدى, ول وزگەرىپ قانا تۇ­رادى. مادەنيەت ادامزاتپەن بىرگە جاسا­سىپ كەلە جاتقان وتە ەجەلگى ۇعىم. ءبىر ءما­دەنيەت ەكىنشى­سىن تۋدىرىپ, جالعاپ وتىرادى. ۋاقىت لەگىمەن بىزگە جەتكەن حا­لى­ق­­تىڭ مۋزىكالىق مۇراسى, اۋىز ادە­بيەتى جانە قولونەرى ءبىزدىڭ باعا جەتپەس بايلىعىمىز. حح عاسىر­داعى تەحنيكالىق پروگرەستىڭ سەكى­رىپ دامۋى, “بىرىڭعاي كە­ڭەس حال­قىن” جاسايمىز دەگەن يمپەريا­لىق وزبىر ساياسات مادەنيەتتى جاداۋلان­دىر­دى. ال كوپ ۇلتتى مادەنيەت بولماي­دى, مادە­­نيەتتى جاراتقان يەم تەك ۇلتتىڭ عانا ىرى­سى ەتكەن. مادەنيەت بارىنشا ۇلتتىق, با­­رىن­­شا حالىققا, ۇلتقا ءتول بولعان­دا عانا قۇندى. ەجەلگى گرەك, قىتاي, پارسى, جا­پون مادەنيەتتەرى نەگە عاسىر­دان عا­سىرعا ىلەسىپ كەلەدى؟ ويتكەنى, ولار با­رىنشا ۇلتتىق مادەنيەتتەر. وركەنيەت­تى ەلدە تەاتر – بۇل مادەنيەتتىڭ لابورا­تو­رياسى بولىپ سانالادى. تەاتردا مادە­نيەت پايدا بولادى, بۇل مادەنيەتتىڭ قاي­نار بۇ­لاعى. تەاتردىڭ ءوزى ەجەلگى ونەر ەمەس پە؟! ال ادامزاتقا ونەر مەن مادە­نيەت نە­سىمەن قۇندى؟ بۇل ەكەۋى ادام تاربيەسىنىڭ, ونى قالىپتاس­تىرۋدىڭ ۇستاحاناسى, دۇكەنى. حالىق­تىڭ اۋىزەكى جەتكەن مۋ­زى­كا­لىق جانە ادەبي, مادەني مۇرا­لارى, قولونەرى وتكەن عاسىرلاردا ءوز قىزمەتىن ورىندادى. ودان حالىقتىڭ وتكەن زامان­دارداعى مادەنيەتىن, ءومىر ءسۇرۋ وبرازىن, قۋانى­شىن, قايعىسىن كورگەندەي بولا­مىز. ال بۇگىنگى ۋاقىتتىڭ كەسكىن-كەلبەتى, زامان­داس­­تاردىڭ ىشكى جان دۇنيەسى كينودا, ادە­بيەت­تە جانە تەاتردا ايناعا تۇسكەندەي شاعىلىسۋى كەرەك-ءتىن. بۇل ورايدا كينو العا شىعىپ تۇر, وعان ونەر­دىڭ وسى سالا­سىنىڭ ەرەكشەلىگى, ءمۇم­كىن­دىگى سەبەپ شى­عار. بەينەلەپ ايتساق, قا­زاق­ستان كينوسى قازىر ءومىر مەن ءولىمنىڭ ورتاسىندا تۇر­عان­داي, بىراق كۇدىكتەن ءۇمىت باسىم. ال تەاتر جونىندە مۇنى ايتا الماي­مىز. وبلىستارداعى تەاترلار ەڭسەسىن ءتۇن قاراڭعىلىعىنداي اۋىر­لىق باسىپ تۇر. مەن قازاق­ستاننىڭ ءبىراز وبلىستارىن ارالا­دىم. قازىر تەاتر تۋرالى اڭگىمە بول­عاندا اۋىز تولتىرىپ ايتۋعا جارايتىن ءبىر ءىس بار. ول – وسى ونەر وتاۋلارىنىڭ ماتەريالدىق-تەحنيكالىق جاعدايىنىڭ جاقسار­عاندىعى. وسىدان ون جىل بۇرىن­عى ۋاقىتپەن سالىستىرعاندا, بۇگىنگى كورىنىس جەر مەن كوكتەي دەسە بولار. قارا­عاندىداعى تەاتردى قاراڭىز! وعان كەلگەن ادام ونەرمەن سۋسىن­داپ قانا قويمايدى, عيماراتتىڭ ىشكى كوركىنەن دە ەستەتي­كا­لىق ءلاززات الىپ كەتەدى. وبلىستاردا, الىس اۋىلداردا كىتاپحانا ۇيلەرى, كلۋب, وب­لىس, اۋدان ورتالىق­تارىن­داعى مۋ­زەي­لەر, كينوتەاترلار قال­پىنا كەلتىرىلۋدە. الىنعان شەتەل­دىك, جەتىلدىرىلگەن جاب­دىق­تار دا بۇرىن كىسىنىڭ تۇسىنە كىرمەيتىن. – نارىق كەلگەن اۋىر جىل­دارى, ودان قالدى داعدارىس كەزىندە دە مادەنيەت پەن ونەر ەلىمىزدە نازاردان تىس قالىپ جاتقان جوق, قايتا سوڭعى جىلدارى كوپ ءىس اتقارىلدى ەمەس پە؟ – اكىمدەر قولىنان كەلگەننىڭ بار­لى­عىن دا ىستەپ وتىر. مەن سىرت­كوز بول­عا­نىم­مەن قازاقستانعا ءجيى كەلەمىن, ءارىپ­تەس­تەرىممەن تىعىز ارالاسامىن. سون­دىقتان مادەنيەت سالاسىنداعى جاع­داي­دان, اكىم­دەر­دىڭ يگى ىستەرىنەن حابارىم مول. يمان­عالي تاسماعامبەتوۆ پەن قى­رىم­بەك كو­شەر­باەۆ, بەردىبەك ساپار­باەۆ­تاردىڭ ونەر مەن مادە­نيەت­كە سىڭىرگەن ەڭ­بەگىن جۇرت­شى­لىق جاقسى بىلەدى. سولار­دىڭ قا­تارىنا مەن قوستاناي وبلىسىنىڭ اكىمى سەرگەي كۋلا­گين­دى دە قوسار ەدىم. مادەنيەت سالاسىن­داعى جۇ­مىستار ءۇشىن وبلىس جۇرتشى­لى­عى­نىڭ وعان العىستان باسقا ايتارى جوق شى­عار دەپ ويلايمىن. ورىس دراما تەاترىنىڭ قۇرىلى­مىن قاي­تا وزگەرتىپ, جوندەدى. قازاق دراما تەات­رىنا جاڭا ءۇي سالى­ناتىن بولدى. وبلىس­تىق فيلار­مونيا قانداي قالىپقا كەلدى دەسەڭشى! سول فيلارمونياداعى قازاق ۇلت اسپاپتار وركەسترىنىڭ قۇرىلۋى دا تاماشا جەتىستىك. وسى كۇنگە دەيىن ورىس تەات­رى­مەن ءبىر عيماراتتا وتىرعان قۋىرشاق تەاترىنا ول كىسىنىڭ ۇيعارىمىمەن بولەك ءۇي بەرگەلى وتىر ەكەن. مەن سەرگەي ۆيتالە­ۆيچ­تى ونەردىڭ ناعىز جاناشىرى دەپ ءبى­لەمىن. مەنىڭ ويىمشا, قۋىرشاق تەاترى­نىڭ ماڭىزى وتە جوعارى. ونەر ادامدى قالىپتاستىرادى دەدىك. ال بالانى كىش­كەن­تاي ءبۇلدىرشىن كەزى­نەن دراما تەاترىنا اپارا بەر­مەيسىڭ, سەبەبى ونى ول ءالى ءتۇسىن­بەيدى. ءتىپتى دراما تەاتر­لارى قوي­عان ەرتە­گىنىڭ ءوزىن بالا قابىل­داي الماۋى مۇمكىن. ال قۋىرشاق تەاترى قويعان قويى­لىم­دار­دى بالا قاي جاسىندا دا قىزىعا تاما­شالايدى. قۋىرشاق كەي­ىپ­كەر­لەر بالانى تەاتر ارقىلى جاقسىعا ۇيرەتەدى, جاماننان جيرەندىرەدى, مادە­نيەت­كە باۋليدى. ەڭ باستىسى, قۋىرشاق تەاترىنا بارعان بالا كەيىن دراما تەات­رىن دا ىزدەپ تۇراتىن بولادى. وكىنىشكە قاراي, قازاقستاندا قۋىرشاق تەاترىنا كوڭىل بولىنە بەرمەيدى. سونىمەن قاتار قوستانايداعى سۋرەت گالەرەياسى دا سىزدەردىڭ قالاعا كەلگەن قوناقتى تاڭعالدىرارى ءسوزسىز. جىل ساي­ىن ونەر ادام­دارى­نا, مادەنيەت قىزمەت­كەر­لەرىنە بەرى­لەتىن “مەتسەناتتار كلۋبى­نىڭ” سىي­لىعى دا باسقالارعا ۇلگى بولار­لىق شارا. وسى سىيلىقتىڭ تاعا­يىن­دال­عانىنا ون جىلدان اسىپ بارادى ەكەن, سول ۋاقىت ىشىندە اتىم­تاي جومارتتار انشىلەر مەن ءبيشى­لەرگە, سۋرەتشىلەرگە, جازۋشى-اقىندارعا, جۋرناليستەرگە, اۋ­ىل-سەلوداعى مادەنيەت قىزمەتكەر­لەرىنە سىيلىق ءۇشىن 75 ميلليون تەڭگەنىڭ سىر­تىن­دا قارجى جۇمسا­عان. بۇل مادەنيەتتى ناعىز قولداۋ ەمەس پە؟ سونىمەن قاتار رەسپۋبليكادا مادە­نيەت سالاسىنا, ونىڭ ىشىندە تەاترلارعا ارناپ قارجى دا جەت­كىلىكتى بەرىلەدى. وسى­عان سايكەس تەاترلاردىڭ ىشكى مازمۇنى وزگەرۋى كەرەك ەدى, اتتەڭ ولاي ەمەس. – نەگە؟ – تەاتر – مادەنيەتتىڭ قاينار بۇ­لاعى دەدىم عوي. مادەنيەت ءبىزدىڭ ءومىر ءسۇرۋ, پاراسات-پايىم, ويلانۋ وبرازىمىز دەسەك, سول مادەنيەت ۇجىمدا قالىپتا­سا­دى. “جالعىز اعاش – ورمان ەمەس”, ءبىر عانا سۋرەت­كەر مادەنيەتتى جاساي المايدى. مادەنيەتتى ومىرگە اكەلەتىن ۇجىم – تەاتر! تەاتردىڭ سينتەتيكا­لىق ونەر ەكەنىن ونەر زەرتتەۋشىلەرىنىڭ ءبارى ايتىپ كەلەدى, ول اۋىز ادە­بيەتى­نىڭ, مۋزىكانىڭ, ارحيتەك­تۋرا­نىڭ, ءجيۆوپيستىڭ, قىسقاسى بار ونەردىڭ باسىن بۋادى. سون­دىقتان وعان قاي قوعامدا دا كوڭىل ءبولىنىپ كەلدى. تەاتر­لار­دىڭ ماتە­ريال­دىق-تەحنيكالىق بازاسىن جا­ساۋ جاعى­نان قازاقستان تەاتر­لارى رەسەي­دەن قالىسپايدى, ءمۇم­كىن كەي­بىر تۇستار­دا ولاردان ارتىق تا. بىراق جۇمىس جاعىنان شابانداپ قالدىق. قازىر كورەرمەن تەاترلارعا ىنتىزارلىق­پەن كەل­مەي­دى. ويتكەنى, بۇگىنگى ءومىردى كور­سەتە الماعان تەاتر كورەر­مەنگە قى­زىقتى ەمەس, كە­رەگىن بەرە الماي­دى. قوعام, زامان ءوز­گەر­­گەن ساي­ىن ادام­دار ءۇشىن قۇندى­لىقتار دا وزگەردى. ال ونى تەاترلار ساحناسى­نان كورەرمەن كو­رە الىپ وتىرعان جوق, ۋا­قىت­تىڭ تىنىسىن ءبىل­دىرەتىن, كورەرمەنگە جول سىلتەي­تىن, باع­دار بەرەتىن اكتۋالدى شى­عار­مالار جوقتىڭ قاسى, سپەكتاكل­دەر از قويىلادى. وسى جەردە مىنا ءبىر جايدى ايت­قىم كەلەدى. قازاق ادەبيەتىندەگى ەپوستىق شى­عارمالار, اۋىز ادە­بيەتىنىڭ مارجاندارى, ءسوز جوق, باي­لىعىمىز. بىراق ولاردىڭ ۋاقىتى بۇرىن ءوتىپ كەتتى عوي, ولاردى سول كۇيىنشە, سول بوياۋى­مەن ساحنالاي بەرگەن­نەن كورەر­مەنگە نە بەرەمىز؟ تاريحتى ءبى­لۋىمىز كەرەك, ول – عىلىم, ال ەپوس ءبىزدىڭ اتا-بابالارىمىزدىڭ ءومىر ءسۇرۋ وبرازى, سالتى, ءداستۇرى, قالاي سوعىسقانى, قالاي جۇرگەنى, تۇرعا­نى دەگەن سياقتى. بۇدان ەپوستىق شىعارمالاردى ساحناعا جولات­پايىق دەگەن وي تۋمايدى. اڭگىمە سول ەپوس­تى قالاي ساحنا­لاۋدا. ءبىزدىڭ ۇلتتىق كيىم­دەرىمىزدى قازىر سول باياعى كۇيىنشە كو­شەدە كيىپ جۇرە الامىز با؟ ونىڭ ەلە­مەنت­تەرىن ديزاينەرلەرىمىز بۇگىن­گى كيىمگە قولدانسا, ونىڭ ادەمىلىگى دە, اكتۋال­دىلىعى دا ارتىپ شىعا كەلمەي مە؟ ۋا­قىتتىڭ تالابى وسىنداي. ەگەر ءبىزدىڭ كلاس­سيكالىق شىعارمالارىمىز – ەپوس­تىق جانر­داعى سپەكتاكلدەردى رەجيسسەر بۇگىنگى ۋاقىتپەن بايلانىستىرا ساحنالاي الماسا, ونى كورەرمەننىڭ كىتاپتان وقىعانى كوپ ارتىق. – الگىندە تەاترلارداعى جاع­داي­دىڭ كۇردەلى ەكەنىن ايتتىڭىز. سونى جونگە كەلتىرۋدىڭ امالى نە دەپ بىلەسىز؟ – الدىمەن تەاترلارداعى كۇردەلى جاع­دايدىڭ ءبىرىن ايتامىن. ول – وسى قاسيەتتى ونەر وتاۋىنا بولىنگەن قارجى­نىڭ تالان-تاراج­بەن كەتەتىندىگى دەر ەدىم. مەن ونى تۇرمىستاعى ءبىر كورىنىسكە تە­ڭەگىم كەلەدى. وبلىستىق, ءتىپتى رەسپۋبلي­كالىق تەاترلار قازاقستان مادە­نيەتىنىڭ مەملەكەت قارجىسىن جۋىپ, شىعارىپ تاستاي­تىن كىر جۋاتىن ماشينەسى ىسپەتتى. بۇل مادەنيەت سالاسىنان حابارى مول ادام­عا بەلگىلى نارسە. سپەكتاكل­دەرگە ءبو­لى­نەتىن قارجى­نىڭ سول قويىلىمعا وننان ءبىر بولىگى عانا جۇمسالادى, قالعانى قال­تالارعا تۇسەدى. سىرىن ايتامىن دەپ شى­نىن ايتقان ءبىر تەاتر ديرەكتورى: “اقشانى جىمقىرۋدىڭ ءجۇز ءتاسىلىن بىلەمىن” دەگەن ەدى. تەاترلاردىڭ كۇردەلى جانە اعىمداعى جوندەۋ جۇمىستارىنا جىل سايىن ميل­ليونداعان تەڭگە بولىنەدى. نە اقشا, نە جوندەلگەن تەاتر جوق كورىنىستەرگە جۇرت­تىڭ ەتى ءولىپ كەتكەن. قارجى شەنەۋنىك­تەر­دىڭ وزدەرىن اسىراۋعا, بايۋعا جۇمسالادى. – وسىنشاما قارجىنى تالات­تى­رىپ قويعاندا, قارجى باقىلاۋ ور­گان­دارى قايدا قاراپ وتىر؟ ءتىپتى اسىرا سىلتەپ ايتىپ وتىرعان جوقسىز با؟ – جوق. مەن تەاتردىڭ ىشكى اسحانا­سىن وتە جاقسى بىلەتىن ادام­مىن. سون­دىق­تان ءوز سوزىمە ءوزىم جاۋاپ بەرەمىن. ءاري­نە, مادە­نيەت مەكەمەلەرىنە, تەاتر­لار­عا ونداعى قارجىنىڭ جۇمسالۋى جونىندە قارجى پوليتسياسى, سالىق كوميتەتى تاراپىنان تەكسەرۋلەر جۇرگىزىلەدى. بىراق وسى كەزگە دەيىن ولاردىڭ دالاعا كەتىپ جاتقان اقشانىڭ سولاقاي ءىزىن تاپقانىن, قارجى جىمقىرعانداردى اشكەرەلەگەنىن ەستىگەن ەمەسپىن. مەنىڭشە, تەاتر­دىڭ ىشكى مازمۇنىن وزگەرتۋ ءۇشىن تىزگىندى ديرەكتور ەمەس, رەجيسسەرگە بەرۋ كەرەك. ويتكەنى, تەاتردىڭ جانى – رەجيسسەر. بىراق تەاتردا رەجيسسەردىڭ ايتقانى بولا بەر­مەيدى. ال, كوپ تەاترلاردىڭ ديرەك­تورى ونەردەن الىس ادامدار. ونەردى تۇسىنبەگەن جەردە ودان ارعىسى بەلگىلى. قارجىنىڭ قاسيەت­تى ىسكە ەمەس, قالتالارعا كەتەتىنى دە سو­نىڭ ايقىن دالەلى. قازىر تەاتر ۇجىم­دارىندا باستى تۇلعا رەجيس­سەر ەمەس, دي­رەكتور. سونىڭ ايتقا­نى بولادى, ايدا­عانىنا اكتەرلەر دە, رەجيسسەر دە كونەدى. سوندىقتان ونداعى جۇمىس جۇرمەيدى. – ءوزىڭىز قازىر قايدا قىزمەت ىستەيسىز؟ – قازىر رەسپۋبليكا مادەنيەت مي­نيسترلىگىنىڭ جولداماسىمەن اتىراۋ قازاق دراما تەاترىندا باس رەجيسسەر بولىپ ءجۇرمىن. اتىراۋعا كەلەردە مينيسترلىك بۇل تەاترداعى جاعدايدىڭ كۇردەلى ەكەنىن, ديرەكتورلاردىڭ تۇراقتا­ماي­تىنىن, سپەك­تاكلدەردىڭ از قويىلاتىنىن, ايتىستىڭ, داۋ-دامايدىڭ كوپ ەكەنىن ەسكەرتكەن بولاتىن. ارينە, مۇنداي كەدەر­گىلەردىڭ ءبارىن دە باستان وتكەرىپ جاتىرمىن, ء“بىز ءسىزدى كۇتكەن جوق­پىز” دەگەن ءسوز دە الدىم­نان شىق­تى. سونان كەيىن مەنىڭ ءوز ەر­كىم­مەن ارىز بەرىپ كەتۋىم ءۇشىن “كەرە­مەت جاعداي” دا جاسالدى. اكتەر­لارعا جۇمىس كەرەك, ولار ونەرگە جۇرەك قالاۋىمەن كەل­گەن جاندار عوي, سوندىقتان جاڭا قويى­لىم قويىلعان سايىن تىنى­سى اشىلا­دى. اكتەرلەرمەن تۇسىنىستىگىم وتە جاقسى, ويتكەنى كاسىبىمىز ءبىر بولعاندىقتان پىكىرلەسپىز. – اڭگىمەڭىزگە راحمەت. اڭگىمەلەسكەن  نازيرا جارىمبەتوۆا.