«پارىز» بايقاۋى – حالىقتىڭ ءال-اۋقاتىن جاقسارتۋ جولىنداعى بيزنەستىڭ قوعام الدىنداعى الەۋمەتتىك جاۋاپكەرشىلىگىن ايقىندايدى. بيىل وسى باعىتتا ءبىرتالاي جۇمىس جۇرگىزىپ, وڭىرلەردىڭ ءومىر ءسۇرۋ ساپاسىن جاقسارتۋ باعىتىندا اۋقىمدى ىستەر اتقارعان «قازاقمىس كورپوراتسياسى» ۇزدىك دەپ تانىلدى.
بايقاۋ باس جۇلدەسىنىڭ كورپوراتسياعا بەرىلۋى بەكەردەن بەكەر ەمەس. «قازاقمىستىڭ» الەۋمەتتى قولداۋ باعىتىنداعى قولعا العان جۇمىستارى از ەمەس.
كومپانيا 2025 جىلى وڭىرلەردى دامىتۋعا جانە قىزمەتكەرلەردى قولداۋعا 90 ملرد تەڭگەدەن استام قاراجات باعىتتاعان. بۇل قاراجات نەگىزىنەن تۇرعىن ءۇي, دەنساۋلىق ساقتاۋ, ينفراقۇرىلىمدى دامىتۋ, ءبىلىم بەرۋ, سپورت جانە قىزمەتكەرلەردى قولداۋ سىندى سالالارعا جۇمسالدى. ناقتىراق ايتقاندا, «قازاقمىستىڭ» قارجىلاي قولداۋىمەن ساتباەۆ قالاسىندا 320 ورىندىق بالاباقشا پايدالانۋعا بەرىلدى, جەزقازعاندا 8 مىڭ شارشى مەتردى قۇرايتىن زاماناۋي سپورت كەشەنى ىسكە قوسىلدى جانە وسى قالادا 900 بالاعا ارنالعان شاحمات اكادەمياسى اشىلدى; توتەنشە جاعدايلار مينيسترلىگىنىڭ كەرەك-جاراعىن ساقتاۋعا ارنالعان ەلىمىزدەگى العاشقى اۆياتسيالىق انگار سالىندى. سونداي-اق كورپوراتسيانىڭ قارجىلاي كومەگىمەن ساتباەۆ قالاسىنداعى قوعامدىق كەڭىستىك اباتتاندىرىلسا, جەزقازعاندا گەولوگيالىق كلاستەر مەن وقۋ ورتالىعى ىسكە قوسىلدى. ەندى اۋماعى 4 مىڭ شارشى مەتردى قۇرايتىن, 200 ورىندىق جاتاقحاناسى بار ءىرى سپورت كەشەنى پايدالانۋعا بەرىلمەك.
ۇلىتاۋ وبلىسى UMC كلينيكالارىمەن بىرلەسىپ, جۇرەككە يننوۆاتسيالىق ادىسپەن وپەراتسيا جاساۋدى قولعا الدى. بۇل دا «قازاقمىستىڭ» كومەگىمەن جۇزەگە اسىرىلدى.
كومپانيا ازاماتتاردىڭ الەۋمەتتىك جاعدايىن جاقسارتۋ باعىتىندا دا جۇيەلى جۇمىس جۇرگىزىپ كەلەدى. ايتالىق, قىزمەتكەرلەر مەن ولاردىڭ وتباسى مۇشەلەرىن ساپالى مەديتسينالىق كومەكپەن قامتاماسىز ەتۋ ءۇشىن ەرىكتى مەديتسينالىق ساقتاندىرۋ باعدارلاماسىن كەڭەيتتى. ەڭبەككەرلەردى تۇرعىن ۇيمەن قامتۋ ماسەلەسىن دە نازاردان تىس قالدىرماي, 60-تان استام وتباسىن جاڭا قىزمەتتىك باسپانامەن قامتاماسىز ەتتى. ولاردى قارجىلاي قولداۋ ماقساتىندا 50 اەك كولەمىندە سىياقى بەلگىلەدى, بۇل قاراجات ازاماتتارعا توقسان سايىن بەرىلەدى. بۇعان قوسا, اقشالاي جۇلدەلەرى بار ءارتۇرلى بايقاۋدى وتكىزۋ دە داستۇرگە ەنگەن.
الەۋمەتتىك تولەمدەر دە كوبەيتىلىپ, قوسىمشا كەپىلدىكتەر مەن قولداۋ باعدارلامالارى ەنگىزىلدى, ازاماتتاردىڭ قۇقىن قورعايتىن جاڭا ۇجىمدىق شارتقا قول قويىلدى.
كورپوراتسيا وڭىرلەردە ءومىر ءسۇرۋ مەن كاسىبي ءوسۋ ءۇشىن جاعداي جاساپ, ءبىلىم بەرۋ, سپورت, مادەنيەت جانە ينفراقۇرىلىم نىساندارىن دامىتۋدى ودان ءارى جالعاستىرىپ كەلەدى.
«قىزمەتكەرلەرگە, ولاردىڭ وتباسىنا جانە ءوڭىردىڭ ءاربىر تۇرعىنىنا قامقورلىق جاساۋ – ءبىزدىڭ بۇلجىماس قاعيدامىز. ءاربىر الەۋمەتتىك جوبا – بۇل ادامدارعا جانە اۋماقتاردىڭ بولاشاعىنا سالىنعان ينۆەستيتسيا. بۇل ماراپات – ءاربىر قىزمەتكەرىمىزدىڭ, كومپانياعا قاتىسى بار قالالاردىڭ دامۋىنا ۇلەس قوسىپ وتىرعان ءوڭىر تۇرعىندارىنىڭ ەڭبەگى. مەن ۇجىمعا ەڭبەگى, باستاماشىلدىعى جانە ءوز ىسىنە ادالدىعى ءۇشىن شىن جۇرەكتەن العىس ايتامىن», دەپ اتاپ ءوتتى «قازاقمىس كورپوراتسياسى» جشس باسقارما توراعاسى نۇراحمەت نۋريەۆ.
«پارىز 2025» سىيلىعى «قازاقمىستىڭ» وڭىرلەردىڭ تۇراقتى دامۋى مەن الەۋمەتتىك تۇراقتىلىعىنا قوسىپ وتىرعان ۇلەسىن راستايدى جانە وسى جۇمىستى ودان ءارى نىعايتۋعا ىنتالاندىرادى.
