فوتو: freepik.com
الەۋمەتتىك جەلىلەردە بىرنەشە ادام پوليتسەيدىڭ سۇيەمەلدەۋىمەن ءبىر جىگىتتى كۇشتەپ الىپ كەتىپ بارا جاتقان ۆيدەو تارادى. وقيعا «ارۋجان» ساۋدا ورتالىعىندا بولعان. اسكەري كوميسساريات قىزمەتكەرلەرى جاس جىگىتتى جۇمىستا تۇرعان جەرىنەن اسكەرگە الىپ كەتپەك بولعان.
وقيعا كەلۋشىلەر مەن قىزمەتكەرلەردىڭ كوز الدىندا, اشىق تۇردە بولعانى اتاپ ءوتىلدى.
استانا قالاسى قورعانىس ىستەرى جونىندەگى دەپارتامەنتتىڭ حابارلاۋىنشا, 4 جەلتوقساندا دەپارتامەنت قىزمەتكەرلەرى پوليتسيامەن بىرلەسىپ ءىس-شارا جۇرگىزگەن. سونىڭ بارىسىندا 2002 جىلى تۋعان, اسكەرگە شاقىرىلۋشىلار قاتارىندا بار ازامات توقتاتىلدى.
«تەكسەرۋ كەزىندە اتالعان ازاماتتىڭ بۇرىن اسكەري قىزمەتكە جارامدىلىعىن انىقتاۋ ءۇشىن مىندەتتى مەديتسينالىق تەكسەرىستەن وتپەگەنى بەلگىلى بولدى. وعان قالالىق جيناق پۋنكتىنە بارۋ ۇسىنىلدى, الايدا ول باس تارتتى. قولدانىستاعى زاڭناماعا سايكەس, ازامات مەديتسينالىق كوميسسيادان وتۋگە ارنايى مەكەمەگە جەتكىزىلدى», دەدى دەپارتامەنتتىڭ ءباسپاسوز قىزمەتى.
العاشقى مەديتسينالىق تەكسەرىس قورىتىندىسىنا سايكەس, ول تۇراقتى تىركەلگەن مەكەنجايى بويىنشا قوسىمشا تەكسەرىلۋگە جىبەرىلگەن. قاجەتتى جولداما بەرىلىپ, كەيىن ۇيىنە قايتقان.
«ازامات تاراپىنان قانداي دا ءبىر زاڭسىز ارەكەتتەر بويىنشا شاعىم نە ءوتىنىش تۇسكەن جوق», دەپ اتاپ ءوتتى استانا قالاسى قورعانىس ىستەرى جونىندەگى دەپارتامەنتى.
