«عاسىرلار جاڭعىرىعى» اتتى ءسان كورسەتىلىمىندە ديزاينەرلەر تابيعي ماتەريالداردان ءتۇرلى جاس ەرەكشەلىكتەرىنە ساي ەتىپ ازىرلەگەن كيىمدەر توپتامالارىن ۇسىندى. ونەر مۋزەيىندە ۇيىمداستىرىلعان شەبەرلىك ساباعىندا قىرعىزستاننان جانە الماتىدان كەلگەن ۇلتتىق قولونەر ماماندارى قۇمىرا جاساۋ, جۇننەن بۇيىمدار دايىنداۋ سىرماق سىرۋ مەن كادەسىيلار دايىنداۋ, سۇيەك جانە تەرىنى وڭدەۋ بويىنشا شەبەرلىك ساباقتارىن وتكىزدى. ءىس-شارادان سوڭ ۇلتتىق قولونەردى دامىتۋعا ەرەكشە ۇلەس قوسىپ جۇرگەن شەبەرلەر ارنايى ماراپاتقا يە بولدى.
ەتنوفەستيۆالدىڭ ءۇشىنشى كۇنى ۇلتتىق سپورتقا ارنالدى. «سالبۋرىن» اتاۋىمەن ۇيىمداستىرىلعان ءىس-شارا يپپودرومدا جالعاستى. بۇل جەرگە ساياتشىلىق ونەردى ناسيحاتتاپ, قۇسبەگىلىكپەن اينالىسىپ جۇرگەندەر جانە تازى باپتاۋشىلار جينالدى. كوكپار ۇيىمداستىرىلىپ, اسىق اتۋ سايىسى دا ءوتتى. «جاپپاي كوكپارعا 50-گە جۋىق شاباندوز قاتىستى. ولاردىڭ اراسىنا اۋدارىسپاقتان الەم جانە قازاقستان چەمپيوندارى بار. قۇسبەگىلىك بويىنشا سەگىز قىران, تازىلار جارىسىنا 20-عا جۋىق ىرىكتەلگەن تازى قاتىسىپ, العا, ايتەكە بي, مارتوك, شالقار اۋداندارىنان كەلگەن كوماندالار كوزگە ءتۇستى. قۇسبەگىلىك سايىسىندا اقمولا وبلىسىنان كەلگەن سەيىلبەك جاقاشەۆ پەن بەيسەمبەك مۇحامەدالىنىڭ جانە اقتوبە وبلىسىنىڭ تۇرعىنى جاناربەك تايباساردىڭ قىراندارى وزىپ شىقتى», دەدى وبلىستىق ۇلتتىق سپورت قاۋىمداستىعىنىڭ اتقارۋشى ديرەكتورى ازات جوكەن.
سونداي-اق «سىباعا» مەيرامحاناسىندا ۇيىمداستىرىلعان «كونەدەن جەتكەن ءدام» گاسترو-فەستيۆالىندە اقتوبە وبلىسىنىڭ ون ەكى اۋدانى ەرتەدەگى ءتۇرلى جورالعىلارعا قاتىستى دايىندالاتىن تاعام تۇرلەرىن ۇسىندى. قازىرگى زاماندا ۇمىتىلعان, بىراق سالت-داستۇرگە ساي سيمۆولدىق ءمانى جوعارى سىي-سىباعالار دايىنداعان ويىل, ىرعىز اۋداندارىنان كەلگەن اسپازدار ۇزدىك دەپ تانىلدى.
اقتوبە وبلىسى.
