شىڭعىرلاۋداعى اۋرۋحانا عيماراتى 1976–1977 جىلدارى بوي كوتەرىپ, سول كەزدە ورال وبلىسىنداعى ەڭ ۇلكەن اۋداندىق نىسان اتانعان ەكەن. 180 كەرەۋەتتىك اۋرۋحانا 30 مىڭنان اسا تۇرعىنى بار اۋدانعا قالتقىسىز قىزمەت كورسەتكەن. سوڭعى جوندەۋ جۇمىسى 2008 جىلى جۇرگىزىلگەنىمەن, ودان بەرى دە ءبىراز جىل جىلجىپ ءوتتى. ەسكىرە باستاعان ەمدەۋ ورنىن قايتا جاڭعىرتۋ اۋدان حالقىنىڭ كوپتەن ايتىلىپ جۇرگەن تىلەگى-تۇعىن. سودان دا بولار, «Amanat» پارتياسىنىڭ 2023–2027 جىلدارعا ارنالعان «حالىقپەن بىرگە» سايلاۋالدى باعدارلاماسىنا شىڭعىرلاۋ اۋرۋحاناسىن كۇردەلى جوندەۋ ماسەلەسى دە كىرگەن ەدى. مىنە, حالىق تىلەگى ورىندالدى.
«قاراشىعاناق پەترولەۋم وپەرەيتينگ ب.ۆ.» كومپانياسى «الەۋمەتتىك جاۋاپكەرشىلىك شەڭبەرى» باعدارلاماسى اياسىندا قاراجات ءبولىپ, «باتىسكوتلومونتاج» فيرماسىنىڭ قۇرىلىسشىلارى تاپسىرىستى ءجىتى, ساپالى, ۇقىپتى ورىنداپ شىقتى.
– حالىق دەنساۋلىعى – ەل دامۋىنىڭ باستى قۇندىلىعى. مەديتسينا سالاسىن قولداۋ, ەمدەۋ مەكەمەلەرىنىڭ جاعدايىن جاقسارتۋ – ءاربىر ازاماتتىڭ ءومىر ساپاسىنا تىكەلەي اسەر ەتەتىن اسا ماڭىزدى ءىس. وسىنىڭ نەگىزىندە شىڭعىرلاۋ اۋدانىندا ورتالىق اۋداندىق اۋرۋحانانىڭ ستاتسيونار عيماراتى تولىق كولەمدە كۇردەلى جوندەۋدەن وتكىزىلىپ, حالىق يگىلىگىنە قايتادان پايدالانۋعا بەرىلدى, – دەدى نىساننىڭ اشىلۋ سالتاناتىنا ارنايى كەلگەن باتىس قازاقستان وبلىسى اكىمىنىڭ ورىنباسارى تىلەپبەرگەن قايىپوۆ.
جاڭارعان اۋرۋحانا عيماراتىندا حيرۋرگيا, تەراپيا, بالالار, جان ساقتاۋ بولىمدەرى, پەرزەنتحانا, زەرتحانا, سونداي-اق اس ازىرلەيتىن ءبولىم مەن ءدارىحانا تولىقتاي كۇردەلى جوندەلىپ, اۋرۋحانا باستان-اياق زاماناۋي مەديتسينالىق جابدىقتارمەن قامتىلدى. مەكەمە باسشىسى قىلىش جازىقباەۆتىڭ ايتۋىنشا, مۇنداعى جابدىقتار, جاڭارتىلعان بولىمدەر حالىققا ساپالى ءارى قولجەتىمدى قىزمەت كورسەتۋگە تولىق مۇمكىندىك بەرەدى. وسىلايشا, وڭىردەگى دەنساۋلىق ساقتاۋ ينفراقۇرىلىمى ايتارلىقتاي جاقساردى.
اۋرۋحانانىڭ اشىلۋ سالتاناتىنا «قاراشىعاناق پەترولەۋم وپەرەيتينگ ب.ۆ.» كومپانياسىنىڭ الەۋمەتتىك جانە ينفراقۇرىلىمدىق جوبالار ءبولىمىنىڭ مەنەدجەرى قايرات بيماعانبەتوۆ, وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى ايناش عۇبايدۋللينا, «Amanat» پارتياسى بقو فيليالى اتقارۋشى حاتشىسىنىڭ ورىنباسارى افيزا سەمعاليەۆا, شىڭعىرلاۋ اۋدانىنىڭ اكىمى مۇرات ومىراليەۆ قاتىستى. سالتاناتقا اۋداندىق اۋرۋحانادا ءار جىلدارى باسشىلىق ەتكەن باس دارىگەرلەر دە شاقىرىلعان ەكەن. ارداگەر دارىگەر قوزىكەش وماروۆ باستاعان ءبىر توپ مايتالمان مامان ءبىرى ورالدان, ءبىرى اقتوبەدەن ارنايى كەلىپ, ەلدىڭ قۋانىشىنا ورتاقتاستى. مەيماندار اۋرۋحانا اۋلاسىنا كوشەت ەگىپ, ەستەلىك قالدىردى.
اۋدان تۇرعىندارى جاڭارعان اۋرۋحانانى ارالاپ كورىپ, ىشكى-سىرتقى كورىنىسىنە قاتتى ريزا بولدى. دەگەنمەن وسى كۇندى ەڭ تاعاتسىزدانا كۇتكەندەر اۋرۋحانا ۇجىمى بولسا كەرەك. قۇرىلىس جۇمىسى باستالعان ەرتە كوكتەمنەن بۇگىنگە دەيىن جايسىز جەردە جۇرسە دە حالىققا ۇزدىكسىز مەديتسينالىق قىزمەت كورسەتكەن ۇجىمنىڭ ەڭبەگى زور. مەملەكەتتىڭ شىنايى قامقورلىعىن كورگەن اق جەلەڭدى ابزال جانداردىڭ جۇمىسى ەندى بۇرىنعىدان دا ساپالى بولا تۇسەدى.
شىرايى كىرگەن شىڭعىرلاۋ اۋرۋحاناسى اقجايىق ءوڭىرى حالقىنىڭ الەۋمەتتىك احۋالىن جاقسارتاتىن كەشەندى جۇمىستىڭ ءبىر كورىنىسى عانا. تىلەپبەرگەن ەرساي ۇلىنىڭ ايتۋىنشا, وبلىستا سوڭعى كەزدە 50-گە جۋىق جاڭا مەديتسينالىق نىسان سالىنعان. ءدال وسى شىڭعىرلاۋ اۋدانىندا جاڭا تەمىرجول ۆوكزالى بوي كوتەرەدى. اۋداننىڭ اقتاۋ, ارداق, الماز اۋىلدارىندا بيىل جاڭادان ۆەتەرينارلىق پۋنكتتەر اشىلىپ, مال دارىگەرلەرىنە جاڭا 5 «نيۆا» اۆتوكولىگى بەرىلدى. «تۇرعىن ءۇي-كوممۋنالدىق شارۋاشىلىعىن دامىتۋ» باعدارلاماسى اياسىندا 338 ملن تەڭگە يگەرىلىپ, سەگىزساي اۋىلىندا سۋ قۇبىرى تارتىلدى. ناتيجەسىندە, اۋدان حالقىنىڭ اۋىزسۋمەن قامتىلۋ دەڭگەيى 100%-عا جەتتى. اۋداندا 990 شاعىن جانە ورتا بيزنەس نىسانى تىركەلگەن, ونىڭ 942-ءسى بەلسەندى جۇمىس ىستەيدى.
– بۇل – اۋدانىمىزداعى كاسىپكەرلىكتىڭ تۇراقتى دامۋىنىڭ جانە تۇرعىندارىمىزدىڭ ىسكەرلىك بەلسەندىلىگىنىڭ ايعاعى, – دەيدى اۋدان اكىمى م.ومىراليەۆ.
باتىس قازاقستان وبلىسى
