NU Park ۋنيۆەرسيتەت ستۋدەنتتەرى مەن قىزمەتكەرلەرىنە عانا ەمەس, قالا تۇرعىندارى مەن قوناقتارىنىڭ تىنىعۋىنا, سەرۋەندەۋىنە تاپتىرمايتىن ورىنعا اينالماقشى. شىعارماشىلىقپەن شۇعىلداناتىن, عىلىم-بىلىمگە قۇشتار جاستارعا دا ارنايى ورىندار بولادى. جوبا – ۋنيۆەرسيتەت باسشىلىعى باستاماشىلىق ەتكەن «قولجەتىمدى كامپۋس» باعدارلاماسىنىڭ ءبىر بولىگى. باعدارلاما قالا تۇرعىندارىنا اشىق, قولايلى, قولجەتىمدى ورتا قۇرۋعا باعىتتالعان.
«جوبانى جوسپارلايتىن كەزدە ءبىز ايگىلى جاپون ساۋلەتشىسى كيسيو كۋروكاۆا ازىرلەگەن قالا قۇرىلىسى تۇجىرىمداماسىن باسشىلىققا الدىق. سوعان ساي ۇيلەسىمدى ينتەگراتسياعا نەگىزدەلگەن ساياباق كەڭىستىگىن قۇرىپ جاتىرمىز. ساياباق جاستاردىڭ بەلسەندى دەمالىسىنا, ەرەسەكتەردىڭ تىنىشتىقتا ۋاقىت وتكىزۋىنە دە جايلى, ىڭعايلى بولادى. ماڭىزدىسى, اركىم وزىنە قولايلى ورىندا سەرۋەندەي الادى. ءبىز ساياباقتىڭ ەلوردانىڭ تاعى ءبىر جاڭا, تارتىمدى دەمالىس ورنىنا اينالاتىنىنا سەنىمدىمىز. ءىرى قالانىڭ ءدال ورتاسىندا اسەم تابيعاتتى تاماشالاپ, شىعارماشىلىققا دەن قويۋعا ءارى وتباسىمەن, دوستارمەن ۋاقىتتى كوڭىلدى وتكىزۋگە مۇمكىندىك تۋادى», دەيدى NU پرەزيدەنتى, پروفەسسور ۆاكار احماد.
زامانعا ساي جابدىقتالاتىن ساياباقتىڭ اۋماعى شامامەن 45 گەكتار جەردى الىپ جاتىر. وندا فۋد-كورت, ەتنواۋىل, تەننيس اكادەمياسى, ات سپورتى مەكتەبى, فۋتبول ورتالىعى, جۇمىس ىستەۋگە, كىتاپ وقۋعا قولايلى ايماق, شىعارماشىلىق شەبەرحانالار مەن كورمە الاڭدارى بار ارت-حاب, تاعىسىن-تاعى ورىندار قاراستىرىلادى. ساياباقتىڭ ورتالىق نىسانى – قازاقى ويۋ پىشىنىندەگى جاسىل لابيرينت. سونىمەن قاتار اشىق اسپان استىنداعى امفيتەاتر, شىعىس مادەنيەتى ورتالىعى, قايتا جاڭعىرتىلعان پيراميدالىق ەكى عيماراتتا ءتۇرلى مادەني ءىس-شارا ۇيىمداستىرىلادى.
ءىرى جوبا ەكى جىلدا اياقتالىپ, پايدالانۋعا بەرىلەدى. بيىلدىڭ وزىندە اۋماقتاعى 15 گەكتار جەر تازارتىلعان. جۇمىسشىلار توپىراقتى قوپسىتىپ, تىڭايتقىش سەپكەن. كوگال ەگىپ, التى سۋ ۇڭعىماسىن بۇرعىلاعان. تال, تەرەك, ۇيەڭكى, قاراعاش, بورتەگۇل, قاراعاي, شىرشا سىندى 85 000-نان استام اعاش پەن بۇتا ەگىلگەن. ءتىپتى كامپۋس پەن قالانى كوگالداندىرۋعا قاجەتتى كوشەتتەر وسىرىلەتىن 200 شارشى مەترلىك جىلىجاي سالىنىپ قويعان. ساياباق قۇرىلىسىنىڭ العاشقى كەزەڭى 2026 جىلى اياقتالادى دەپ جوسپارلانىپ وتىر. وسى كەزەڭدە ءۇش جىلىجاي, باۋ-باقشا ورتالىعى, ۆەلوسيپەد, جاياۋ جۇرگىنشى جولدارى سالىنادى. قالادان اشىلعالى جاتقان ساياباقتىڭ جوبا-جوسپارى وسىنداي.
