ءىس-شارانى سۋحو حولدينگتەر توبى مەن نانكين قالاسىنىڭ سيۋانۋ اۋدانى اكىمدىگى بىرلەسىپ ۇيىمداستىردى. فورۋمعا قىتاي جانە ورتالىق ازيا ەلدەرىنىڭ تۋريزم مينيسترلىكتەرىنىڭ باسشىلارى, ديپلوماتيالىق كورپۋستار, يانتسزى وزەنى اتىرابى ايماعىنداعى ىسكەرلىك جانە مادەني ۇيىمداردىڭ جەتەكشىلەرى, سونداي-اق وڭىرلىك تۋريزم يندۋسترياسىنىڭ وكىلدەرى قاتىستى.
قازاقستان تاراپىنان تۋريزم جانە سپورت مينيسترلىگى تۋريزم يندۋسترياسى كوميتەتىنىڭ توراعاسى نۇرتاس كارىپباەۆ قاتىسىپ, تۋريزم مەن مادەنيەت سالالارىندا سەرىكتەستىك پەن تاجىريبە الماسۋدى كەڭەيتۋدىڭ ماڭىزىن اتاپ ءوتتى. توراعا قازاقستاننىڭ تۋريستىك الەۋەتىن تانىستىرىپ, بىرلەسكەن جوبالاردى دامىتۋ, تۋريستەر اعىنىن ارتتىرۋ جانە ەلدىڭ بىرەگەي تابيعي ءارى مادەني نىساندارىن ىلگەرىلەتۋ مۇمكىندىكتەرىنە توقتالدى.
بۇل شارا قازاقستان پرەزيدەنتى قاسىم-جومارت توقاەۆ پەن قىتاي توراعاسى سي ءتسزينپيننىڭ دەن قويعان جوعارى دەڭگەيلى ساياسي ديالوگى مەن ستراتەگيالىق ارىپتەستىگىنىڭ زاڭدى جالعاسى ەكەنى ايقىن سەزىلدى. ەكى مەملەكەتتىڭ كوشباسشىلارى تۋريزم مەن مادەني-گۋمانيتارلىق الماسۋدى سىرتقى ساياساتتاعى نەگىزگى باسىمدىقتاردىڭ ءبىرى رەتىندە بەلگىلەپ وتىر. مەملەكەت باسشىلارى جاريالاعان «2024 – قىتايداعى قازاقستان ءتۋريزمى جىلى» جانە «2025 – قازاقستانداعى قىتاي ءتۋريزمى جىلى» باستامالارى وسى باعىتتاعى جۇيەلى جۇمىستاردىڭ ىرگەتاسى ىسپەتتەس. پرەزيدەنت ق.توقاەۆ پەن توراعا سي تسزينپين قولداعان بۇل جوبالار ەكى ەلدى مادەني-تاريحي ساباقتاستىقتى جاڭا ساپالىق دەڭگەيگە كوتەرۋدى كوزدەيدى.
ءىس-شارا اياسىندا «يانتسزى دەلتاسى – ورتالىق ازيا مادەني-تۋريزم ىنتىماقتاستىق اليانسى» جونىندەگى باستاماشىلدىق حاتقا قول قويىلدى. بۇل اليانس كوپجاقتى سەرىكتەستىكتى تۇراقتى تۇردە ۇيىمداستىرۋعا, اقپارات الماسۋ تەتىكتەرىن جەتىلدىرۋگە, بىرلەسكەن تۋريستىك مارشرۋتتار ازىرلەۋگە جانە مادەني باعدارلامالاردى ۇيلەستىرۋگە مۇمكىندىك بەرەدى. سونىمەن قاتار سۋحو حولدينگتەرى مەن ورتالىق ازيا ەلدەرىنىڭ تۋريزم ۇيىمدارى اراسىندا بىرقاتار مەموراندۋمدارعا قول قويىلىپ, بىرلەسكەن جوبالاردى ىسكە اسىرۋعا ناقتى بازا قالىپتاستى.
فورۋم اياسىندا «جىبەك جولى مادەني-ءتۋريزمىن ىلگەرىلەتۋ ورتالىعى (يانتسزى اتىرابى)» رەسمي تۇردە اشىلدى. بۇل ورتالىق قازاقستاندى قامتىعان ورتالىق ازيا ەلدەرى مەن قىتاي اراسىنداعى مادەني بايلانىستى تۇراقتى تۇردە ۇيلەستىرەتىن پلاتفورما ءرولىن اتقارادى. سونداي-اق «سۋحو Cloud – جىبەك جولى ونەر بۇيىمدارى» تسيفرلىق ساۋدا پلاتفورماسىنىڭ ىسكە قوسىلۋى وڭىردەگى كرەاتيۆتى يندۋستريالار ءۇشىن جاڭا نارىقتىق مۇمكىندىكتەر اشتى.
ءىس-شارانىڭ مادەني مازمۇنى دا ەرەكشە بولدى. شاي ءراسىمى, اعاش جانە جاڭعاق ويمىشى, جىبەك توقىما, التىن جاپسىرما, قاعاز قيۋ, كەراميكا, ءداستۇرلى قولونەر بۇيىمدارى ۇسىنىلعان ۇلتتىق بەيماتەريالدىق مۇرا كورمەسى قاتىسۋشىلارعا تەرەڭ اسەر قالدىردى. بۇل مادەنيەت پەن ءتۋريزمنىڭ ءبىر-ءبىرىن تولىقتىرىپ, ءوزارا بايىتاتىنىن ايقىن كورسەتتى.
فورۋمنىڭ كورنەكتى جوبالارىنىڭ ءبىرى – «2025–2026 يانتسزى اتىرابى – جىبەك جولى: مىڭ ونەرپازدىڭ شىعارماشىلىق ساپارى» باستاماسى بولدى. بۇل باعدارلاما شەڭبەرىندە قازاقستان جانە قىتايدىڭ, سونداي-اق باسقا ورتالىق ازيا ەلدەرىنىڭ سۋرەتشىلەرى, فوتوگرافتار, مۋزىكانتتار, جازۋشىلار ەجەلگى جىبەك جولىنىڭ تاريحي باعىتتارىن ارالاپ, كروسسمادەني شىعارماشىلىق تۋىندىلار جاساماق. بۇل جوبا حالىقتار اراسىنداعى رۋحاني جاقىنداسۋدى كۇشەيتىپ, مادەني ديپلوماتيانى تەرەڭدەتۋگە قىزمەت ەتەدى.
نانكيندەگى فورۋمنىڭ ناتيجەلەرى قازاقستان ءۇشىن ماڭىزدى. بۇل – ەلىمىزدىڭ تۋريستىك الەۋەتىن قىتايدىڭ قارقىندى ءوسىپ كەلە جاتقان نارىعىندا كەڭىنەن تانىتۋعا, جاڭا تۋريستىك اعىن قالىپتاستىرۋعا, وڭىرارالىق جانە سالالىق سەرىكتەستىكتى نىعايتۋعا مۇمكىندىك بەرەتىن الاڭ. ەڭ باستىسى, بۇل ءىس-شارا قازاقستان پرەزيدەنتى قاسىم-جومارت توقاەۆ پەن قىتاي توراعاسى سي تسزينپين بەلگىلەپ بەرگەن ستراتەگيالىق باعىتتاردىڭ تابىستى جۇزەگە اسىپ كەلە جاتقانىن ايقىن دالەلدەيدى.
جارقىنبەك ءجۇمادىل
