پەتروپاۆلدا ناۋرىز مەيرامى ۇلتتىق ناقىشتا اتاپ ءوتىلدى

پەتروپاۆل. 22 ناۋرىز. شىعىس حالىقتارىنىڭ جاڭا ءجىلى–از ناۋرىز شىن مانىندەگى حالىقتىق مەرەكەگە اينالىپ, ۇلتتىق سالت-داستۇرلەر مەن ادەت-عۇرىپتار مولىنان كورىنىس تاپتى. بۇل تۋرالى egemen ءتىلشىسى حابارلادى. ناۋرىز مەرەكەسى «دوستىق» الاڭىنان باستالدى. قالالىقتاردى كوكتەمنىڭ جانعا جىلىلىق دارىتاتىن, شۋاق سىيلايتىن مەيراممەن  ايماق باسشىسى ەرىك سۇلتانوۆ قۇتتىقتادى. ورتالىق الاڭعا  قازاقستان حالقىنىڭ  تاتۋلىعىن, بىرلىگىن بەينەلەيتىن 100 مىڭ  جارىقديودتى شامنان قۇرالعان شاڭىراق ورناتىلىپ,  7 كيىز ۇيدەن تۇراتىن ەتنواۋىل تىگىلدى.  جاستار التىباقان تەۋىپ, سپورت جارىستارىن , شوۋ باعدارلامالاردى قىزىقتاسا,  ۇلكەندەر جاعى ءتۇرلى  سالت-داستۇرلەر مەن «قوش كەلدىڭ, نۇرلى ناۋرىز» اتتى  تەاترلاندىرىلعان كورىنىستەردى تاماشالادى.  بۇل كۇنى  2500  كيلو پالاۋ,  500 ليتردەي ناۋرىز كوجە,  700 كيلودان استام باۋىرساق ءپىسىرىلىپ, جۇرتشىلىققا تەگىن ۇسىنىلدى. قازاقشا كۇرەستەن 35 بالۋان كۇش سىناسىپ, «تۇيە بالۋان» اتانعان ايبەك قىرىقبايعا  اق قوشقار  سىيلاندى.  كيىز ءۇي  بايقاۋىندا ايىرتاۋ اۋدانى  گران-ءپريدى ۇتىپ الدى.  ءبىرىنشى ورىندى  ع. مۇسىرەپوۆ,  تايىنشا اۋداندارى مەن وبلىستىق ىشكى ىستەر دەپارتامەنتى ءبولىستى.  اقىندار سايىسىندا باس جۇلدە  شالاقىندىق جارقىن جۇپارحانعا بۇيىردى. مامليۋت اۋدانى تاتار حالقىنىڭ ۇلتتىق تاعامى- ۇزىندىعى 3 مەتر ءبالىش دايىنداپ اكەلىپ, بالالارعا ۇلەستىردى. ەكى جاستاعى ءامىرحان دوساەۆتىڭ تۇساۋى كەسىلىپ, سىيلىق تارتۋ ەتىلدى. «شەبەرلەر اۋىلى» ساندىك-قولدانبالى شىعارماشىلىق بۇيىمداردىڭ كورمە-ساتىلىمى, «شاش–قىزدىڭ اجارى» , «پاي-پاي قازاقتىڭ كەلىندەرى-اي» كونكۋرستارى ۇيىمداستىرىلدى. 200 ادام «قاراجورعا» ءبيىن ورىنداپ,  مەرەكە اجارىن اشا ءتۇستى. م. جۇماباەۆ كوشەلەرىندە اق جۇمىرتقاداي  قاز-قاتار ورنالاسقان 13 كيىز ءۇيدىڭ ەسىكتەرى ايقارا اشىلىپ,  سوعىس جانە ەڭبەك ارداگەرلەرىنە, جەتىم بالالارعا, تۇرمىسى تومەن وتباسىلارعا, كەمتار جاندارعا  ارناپ داستارحان  جايىلدى. ناۋرىز تويى ەرتەڭ دە جالعاسادى. ءومىر ەسقالي. دەرەك: egemen.kz سۋرەت: egemen.kz