كىتابى شىققانداردىڭ ءبىرى – جاس پروزاشى بەكزات التىنبەك «كوكجيەك» اتتى جيناقتاعى اڭگىمەلەرىنە قالالىقتاردىڭ ىشكى الەمىن, كوزقاراسىن, دۇنيەتانىمىن ارقاۋ ەتە وتىرىپ, بۇگىنگى كۇن مەن كەلەشەكتىڭ ماڭگىلىك قۇندىلىعىن ىزدەيدى. ال جاس اقىن تاڭساۋلە اگەنقىزىنىڭ نازىك ليريزم مەن تەرەڭ سەزىمگە تولى «بوزمۇنار» اتتى ولەڭدەر جيناعى جاس بۋىننىڭ سىرشىل ۇنىندەي.
جوبا قولداۋىمەن جارىق كورگەن كىتاپ «جاس تولقىن» دەپ اتالادى. مۇندا قاراعاندىلىق 14 اقىننىڭ ولەڭدەرى ەنگەن. قايرات يمانبەكوۆ, ەربولات قۋاتبەك, ەربۇلان ماقاتاي, نۇرداۋلەت باقىت ۇلى, نۇراسىل امانجول, تاڭساۋلە اگەنقىزى, شۇعىلا ۇسەن, الدانىش ولجاباي, سانجار جۇماعالي, حۋرالاي سەيىت, رايىمبەك قويشىباي, ايتولقىن جاڭاباي, ايدانا جاركەەۆا, نۇرعاسىر يزات ەسىمدى جاس بۋىننىڭ سىرشىل ليريكالارى توپتاستىرىلعان.
– «جاس قالامگەر» جوباسى اياسىندا بىرقاتار جۇمىس اتقارىلىپ جاتىر. سولاردىڭ سۇبەلىسى – وسى. كىتاپقا ەنۋ, كىتاپ شىعارۋ – تاريح قويناۋىنا كەتەتىن دۇنيە. اباي «ولەڭ ءسوزدىڭ پاتشاسى», دەيدى. ال اقىن – سونىڭ يەسى. انتولوگياعا 14 اقىن ەنىپتى. شابىتتارى سارقىلماسىن, شىعارماشىلىقتارى وركەندەسىن, – دەدى جازۋشىلار وداعىنىڭ وبلىستاعى وكىلى, اقىن جانات جاڭقاش ۇلى.
وقىرمانعا ولجا بولار تاعى ءبىر جيناق ء«سوز شەبەرلىگىنە باستار جول» دەپ اتالادى. بۇل كىتاپ – جاس اقىندار مەن جازۋشىلارعا ارنالعان تاجىريبەلىك-تانىمدىق قۇرال. جاس قالامگەرلەردىڭ شىعارماشىلىق قابىلەتىن دامىتۋعا, ءسوز ورنەگىن جەتىلدىرۋگە, كوركەم ويلاۋ مەن ءتىل مادەنيەتىن قالىپتاستىرۋعا باعىت-باعدار بەرەدى.
وسىلايشا, جاس اقىندار ساحناعا كوتەرىلىپ, جالىنداپ تۇرىپ ولەڭدەرىن وقىدى. جاڭا كىتاپتىڭ تۇساۋكەسەر راسىمىنە ارداگەر جۋرناليست ءالي تويجىگىت, جازۋشى سۇيىندىك جانىسباي, قالامگەر-ۇستاز ءالىمجان قۇتجان, مادەنيەت قايراتكەرى جاروللا اقىشەۆ قاتىسىپ, ىزىنەن ەرگەن ءىنى-قارىنداستارىنىڭ سۋ جاڭا جيناعى وقىرمانعا ولجا, رۋحاني ازىق بولسىن دەپ, باتالارىن بەردى.
قاراعاندى وبلىسى
