فوتو: مادەنيەت جانە اقپارات مينيسترلىگى
جيىن بارىسىندا 2026 جىلعا ارنالعان تۇركسوي ۇيىمىنىڭ جۇمىسىن جەتىلدىرۋ بويىنشا جۇمىس توبىن قۇرۋ تۋرالى شەشىم قابىلداندى. سونىمەن قاتار «اقتاۋ – تۇركى الەمىنىڭ مادەني استاناسى» جىلىنىڭ قورىتىندىسى شىعارىلدى.
تۇركسوي ەلدەرىنىڭ مادەنيەت مينيسترلەرى باس قوسقان جيىنعا مادەنيەت جانە اقپارات ءمينيسترى ايدا بالاەۆا, تۇركسوي باس حاتشىسى سۇلتان راەۆ, تۇرىكمەنستاننىڭ مادەنيەت ءمينيسترى اتاگەلدى شامىرادوۆ, وزبەكستاننىڭ مادەنيەت ءمينيسترى وزودبەك نازاربەكوۆ, ازەربايجان مادەنيەت ءمينيسترىنىڭ ورىنباسارى مۋراد گۋسەينوۆ, قىرعىزستان مادەنيەت, اقپارات, سپورت جانە جاستار ساياساتى ءمينيسترىنىڭ ورىنباسارى اسكارالى مادامينوۆ, تۇركيا مادەنيەت جانە تۋريزم ءمينيسترىنىڭ ورىنباسارى دوكتور سەردار چام, سونداي-اق ماڭعىستاۋ وبلىسى اكىمىنىڭ ورىنباسارى تىلەگەن ابىشەۆ قاتىستى.
ايدا بالاەۆا ءوز سوزىندە ايتۋلى جىل اياسىندا اتقارىلعان شارالاردى اتاپ ءوتتى.
جيىندا تۇركسوي باس حاتشىسى سۇلتان راەۆ قۇتتىقتاۋ ءسوز سويلەدى. ول بيىل ۇيىمنىڭ ۇيىتقى بولۋىمەن ءۇش مىڭنان استام ءارتىس ءتۇرلى ءىس-شاراعا قاتىسىپ, جۇزدەگەن باسىلىم مەن تسيفرلىق ماتەريال شىعارىلعانىن تىلگە تيەك ەتتى.
«2025 جىلى «اقتاۋ – تۇركى الەمىنىڭ مادەني استاناسى» جوباسىن قولداعانى ءۇشىن قازاقستان پرەزيدەنتى قاسىم-جومارت توقاەۆقا شىنايى العىسىمدى بىلدىرەمىن. گابالادa وتكەن سامميتتە قازاقستان پرەزيدەنتى سويلەگەن سوزىندە بۇل مارتەبەنىڭ ورتاق مادەني كەڭىستىگىمىز ءۇشىن ماڭىزىن ايقىنداي ءتۇستى. سونىمەن قاتار بيىل ءبىز تاريحي وقيعانىڭ كۋاسى بولدىق: مەملەكەت باسشىلارى ۋاقىت تالابىنا ساي تۇركسوي-دى نىعايتۋ قاجەت ەكەنىن اتاپ, باس حاتشىلىققا وسى جۇمىستى باستاۋدى تاپسىردى. بۇل جاي عانا شەشىم ەمەس – تۇركى الەمى ەلدەرىنىڭ مادەني ىنتىماقتاستىعىنىڭ بولاشاعىن ايقىندايتىن ستراتەگيالىق كەزەڭ», دەدى سۇلتان راەۆ.
جيىن سوڭىندا ايدا بالاەۆا 2026 جىلى تۇركى الەمىنىڭ مادەني استاناسى مارتەبەسى ءاندىجان قالاسىنا بەرىلەتىن بولعاندىقتان, تۇركسوي-دىڭ ۋاقىتشا ۇيلەستىرۋشىسى مىندەتىن وزبەكستاندىق ارىپتەسى وزودبەك نازاربەكوۆكە تاپسىردى.
سونداي-اق تۇركسوي-عا مۇشە ەلدەردىڭ دەكلاراتسياسى قابىلداندى.
