القالى جيىنعا NU قازاق ءتىلى جəنە تۇركىتانۋ دەپارتامەنتىنىڭ باسشىسى, پروفەسسور يۋلاي شاميل وعلى, ادەبيەتتانۋشى, ۇعا اكادەميگى باۋىرجان وماروۆ, ءتىلشى-عالىم, ۇعا اكادەميگى كارىمبەك قۇرماناليەۆ, عىلىم جانە جوعارى ءبىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم كوميتەتى توراعاسىنىڭ ورىنباسارى, PhD اقەركە ابىلايحان, «Qazaqstan» ۇلتتىق تەلەارناسىنىڭ ديرەكتورى بولات ءمۇرسالىم قاتىسىپ, جاڭا جيناقتارعا قاتىستى ويلارىن ورتاعا سالدى.
«قازىرگى ادەبيەتتانۋ: دەكولونيالىق ديسكۋرس» اتتى كولەمدى ەڭبەك ءۇش تاراۋدان تۇرادى. اتاپ ايتساق, « ۇلى دالانىڭ اسىل ءسوزى: ءابۋ ناسىر ءال-فارابي, ءجۇسىپ بالاساعۇني, ماحمۇت قاشقاري, اباي قۇنانباي ۇلى», «الاش: عىلىمي ديسكۋرس», «قازىرگى ادەبيەت». اتالعان جيناقتا قازىرگى ادەبيەت زاماناۋي وكسيدەنتالدى ديسكۋرس تۇرعىسىنان قاراستىرىلعان. الاش ادەبيەتتانۋىنىڭ تەوريالىق قاعيدالارى قازىرگى ادەبيەت پەن ادەبيەتتانۋدىڭ نەگىزىن انىقتاۋشى باستى تۇعىرى دەپ ايعاقتالعان. ابايتانۋ ءىلىمىن وسىدان 120 جىل بۇرىن قالىپتاستىرعان الاش ادەبيەتشىلەرى – ءاليحان بوكەيحان, احمەت بايتۇرسىن ۇلى, مىرجاقىپ دۋلات ۇلى, جۇسىپبەك ايماۋىت ۇلى, ماعجان جۇماباي, سماعۇل سادۋاقاس ۇلى, ساكەن سەيفۋلليندەردىڭ ۇلتتىق ادەبيەتتەگى وتارسىزداندىرۋ كونتەنتى قازىرگى ادەبيەتتانۋدىڭ باستى ديسكۋرسى رەتىندە انىقتالعان.
اۆتور كىتاپتا «الەمدىك ادەبيەتتى تانىتاتىن ادەبيەتتانۋ عىلىمى بۇگىن قانداي جاڭا باعىتتى ۇستانۋدا؟ الەمدىك ادەبيەت پەن ادەبيەتتانۋ جاھاندانۋ كەزىندە نەگە وكسيدەنتالدى ۇستانىمعا بەيىم؟ نوبەل سىيلىعىن العان ماتىندەردە وكسيدەنتالدى ۇستانىم نەگە باسىم؟» دەگەن سىندى سۇراقتارعا جاۋاپ ىزدەيدى.
قوس جاڭا جيناق قازاق ادەبيەتتانۋ عىلىمىن زەرتتەۋگە ىنتالى ءار ىزدەنۋشىگە باعىت-باعدار بولارى ءسوزسىز.
