ۇلتتىق پاراليمپيالىق كوميتەتتىڭ پرەزيدەنتى سايلاندى

استانا. 22 ناۋرىز. قازاقستان رەسپۋبليكاسىنىڭ ۇلتتىق پاراليمپيالىق كوميتەتىنىڭ (قر ۇپك) پرەزيدەنتى بولىپ قايرات بورانباەۆ سايلاندى. بۇل تۋرالى قر مادەنيەت جانە سپورت مينيسترلىگىنىڭ ءباسپاسوز قىزمەتى حابارلادى. وسىعان قاتىستى وتكەن باسقوسۋدا ەلىمىزدىڭ مادەنيەت جانە سپورت ءمينيسترى ارىستانبەك مۇحامەدي ۇلى كوميتەتتىڭ بۇرىنعى پرەزيدەنتى دارحان قالەتاەۆقا ىستەگەن جۇمىسى مەن پاراليمپيالىق قوزعالىستىڭ دامۋىنا قوسقان ۇلەسى ءۇشىن العىس ايتتى. سونداي-اق, مينيستر بالالار مەن جاسوسپىرىمدەر سپورتىن دامىتۋ جولىندا تەر توككەن قايرات بورانباەۆتىڭ بىلىكتىلىگىن جوعارى باعالاپ, جۇمىسىنا ساتتىلىك تىلەدى. ايتا كەتەيىك, دارحان قالەتاەۆ بۇگىندە ەلىمىزدىڭ ۆەلوسپورت فەدەراتسياسىنىڭ پرەزيدەنتى. سونداي-اق, قايرات بورانباەۆتىڭ «قايرات» فۋتبول كلۋبى باقىلاۋشىلار كەڭەسىنىڭ توراعاسى ەكەنى بەلگىلى. قازىرگى تاڭدا ۇپك حالىقارالىق پاراليمپيالىق كوميتەتىنىڭ ايماقتىق وكىلى ازيا پاراليمپيالىق كوميتەتىنە, امپۋتانتتار مەن اربالىلاردىڭ فەدەراتسياسىنا جانە مۇمكىندىكتەرى شەكتەۋلى ادامداردىڭ بۇكىلالەمدىك ۆولەيبول ۇيىمىنا مۇشە. سونداي-اق, ۆۋوكاتتي سپورت ينستيتۋتى (فينليانديا), دۋباي مۇگەدەكتەر كلۋبى ء(باا), مۇگەدەكتەردىڭ اتۋدان كلۋبى ( ۇلىبريتانيا), «Start» مۇگەدەكتەر سپورت كلۋبى (پولشا) سىندى ۇيىمدارمەن ارىپتەس رەتىندە تىعىز بايلانىس ورناتقان. سوڭعى ۋاقىتتا ۇپك-دە سپورتشىلاردى ارنايى سپورتتىق قۇرىلعىلارمەن, اربالارمەن جانە پروتەزدەرمەن قامتاماسىز ەتۋ بويىنشا ايتارلىقتاي جۇمىستار اتقارىلدى. 2013-2015 جىلدار ارالىعىندا ەلىمىزدەگى مۇمكىندىگى شەكتەۋلى سپورتشىلار 28 حالىقارالىق سايىسقا قاتىسىپ, 74 التىن, 102 كۇمىس جانە 104 قولا مەدال, جالپى سانى 280 جۇلدە ولجالادى. اتالعان كوميتەت قازىرگى كەزدە 2016 جىلى ريو-دە-جانەيرودا وتەتىن جازعى پاراليمپيالىق ويىندارعا قىزۋ دايىندالۋدا. رەسپۋبليكا بويىنشا ۇپك-نىڭ 12 ايماقتىق فيليالى جۇمىس ىستەيدى. جۋىردا تاعى ءبىر فيليالدى ىسكە قوسۋ جوسپارلانۋدا. ەلامان قوڭىر. دەرەك, سۋرەت: قر مادەنيەت جانە سپورت مينيسترلىگىنىڭ ءباسپاسوز قىزمەتى