اسەل شىمكەنت قالاسىندا قاراپايىم وتباسىندا دۇنيەگە كەلگەن. اكەسى – كران جۇرگىزۋشىسى, اناسى – مەكتەپ مۇعالىمى. 8-سىنىپتا نازارباەۆ زياتكەرلىك مەكتەبىنىڭ گرانتىن جەڭىپ العان ول بولاشاق ارمانىنا قول جەتكىزۋ ءۇشىن بارىن سالدى. بۇل ونىڭ ۇلكەن مۇمكىندىكتەر الەمىنە العاشقى قادامى ەدى.
9-سىنىپتى اياقتاعاننان كەيىن اقش-قا بارىپ, بوستون قالاسىندا ەكى اپتالىق وقۋ باعدارلاماسىنا قاتىسادى. گارۆارد سەكىلدى ايگىلى ۋنيۆەرسيتەتتەردىڭ اتموسفەراسىن سەزىنگەن جاس تۇلەكتىڭ جۇرەگىندە ۇلكەن ارمان ويانادى. كۇندەردىڭ بىرىندە مەن دە وسىندا وقيمىن دەگەن ماقسات ءدال سول كەزدە قالىپتاسىپتى.
الايدا اتا-اناسى 16 جاستاعى قىزدارىن جات ەلگە جالعىز جىبەرۋگە الاڭداپ, وعان ۋاقىتشا رۇقسات بەرمەيدى. بىراق بۇل شەشىم اسەلدىڭ ارمان وتىن وشىرمەي, كەرىسىنشە ءوز ەلىندە ءبىلىمىن تەرەڭدەتۋگە يتەرمەلەدى. كەيىن اسەل ءبىلىمىن ەلورداداعى نازارباەۆ ۋنيۆەرسيتەتىندە جالعاستىرادى. «بيولوگيا عىلىمدارى» بويىنشا ۇزدىك ناتيجەلەر كورسەتىپ, باكالاۆردى قىزىل ديپلوممەن ءتامامدايدى. وسىلايشا, ول ءوزىنىڭ عىلىمي الەۋەتىنىڭ جوعارى ەكەنىن اينالاسىنا دالەلدەيدى.
ۋنيۆەرسيتەتتى بىتىرگەن سوڭ اسەلگە بىردەن اقش-تىڭ 6 ۋنيۆەرسيتەتى ماگيستراتۋراعا شاقىرتۋ جىبەرەدى. بىراق ول الەمگە ايگىلى ستەنفورد ۋنيۆەرسيتەتىن تاڭدايدى.
ستەنفورد ۋنيۆەرسيتەتى جاس عالىمنىڭ الەۋەتىن باعالاپ, ونىڭ وقۋىنا جانە عىلىمي زەرتتەۋلەرىنە 350 ميلليون تەڭگەگە جۋىق گرانت بولەدى. بۇل – تەك وقۋ اقىسى ەمەس, بولاشاق زەرتتەۋشىنىڭ مۇمكىندىكتەرىنە جاسالعان ۇلكەن سەنىم.
اسەل يبادۋللانىڭ بۇل جەتىستىگى – تاباندىلىق پەن ەڭبەك ارقىلى كەز كەلگەن قيىندىقتى مۇمكىندىككە اينالدىرۋعا بولاتىنىن كورسەتەتىن انىق مىسال. قاراپايىم وتباسىنان شىعىپ, الەمدىك دەڭگەيدەگى عىلىم ورداسىنا جول الۋ – قازاق جاستارىنىڭ الەۋەتىنىڭ قانشالىقتى جوعارى ەكەنىن بىلدىرەدى.
اسەلدىڭ جەتىستىگى – قازاق قىزىنىڭ قايسارلىعى مەن بىلىمدىلىگىنىڭ كورىنىسى. تيىسىنشە, اسەلدىڭ تابىسى جاس بۋىنعا شابىت سىيلايدى.
