اۋداننىڭ تۋريستىك الەۋەتى جىل سايىن ارتىپ كەلەدى. قازىر مۇندا 28 تۋريستىك نىسان قىزمەت كورسەتەدى, بيىلعى جارتى جىلدىقتا 18 مىڭ تۋريست كەلىپ, كورسەتكىش 4,7%-عا وسكەن. ايماقتا «جاركەنت مەشىتى», اۋليەاعاش, كەرىماعاش, «جاركەنت-اراسان» سياقتى تارتىمدى ورىنداردىڭ بولۋى ءتۋريزمدى دامىتۋ مۇمكىندىگىن كەڭەيتەدى. وسى ماقساتتا وبلىستا تۋريزم باسقارماسى قۇرىلىپ, بەس اۋداندا, ونىڭ ىشىندە پانفيلوۆتا تۋريزم بولىمدەرى اشىلدى.
جاڭا «بالقاش تازالىق» جانە «الاكول تازالىق» كاسىپورىندارى جاعالاۋدى سانيتارلىق تازالاۋ, قوقىس شىعارۋ, قوعامدىق اجەتحانالاردى كۇتىپ ۇستاۋ, جارىقتاندىرۋ جۇيەسىنە قىزمەت كورسەتۋ, كوگالداندىرۋ مەن جول بولىكتەرىن تازالاۋ سياقتى مىندەتتەردى ورىندايدى. «الاكول تازالىققا» 40-تان استام, «بالقاش تازالىققا» 20-دان استام قىزمەتكەر قابىلدانىپ, ماۋسىم كەزىندە قوسىمشا جۇمىسشىلار تارتىلادى. ءار مەكەمەگە 20-دان اسا ارنايى تەحنيكا (بۋلدوزەر, ەكسكاۆاتور, قوقىس تاسىعىش, تريتسيكل, قايىق جانە ت.ب.) ساتىپ الۋ جوسپارلانعان.
كولدەر جاعالاۋىنىڭ ينفراقۇرىلىمىن جاقسارتۋ باعىتىنداعى جۇمىستار دا جالعاسۋدا. ءۇشارال اۋەجايىنىڭ ۇشۋ-قونۋ جولاعى جاڭارتىلدى, «تالدىقورعان – ءۇشارال» جانە ء«ۇشارال – دوستىق» جولدارى قايتا جاسالدى. اقشي اۋىلىندا كارىز جۇيەسى سالىنىپ, 56 شاقىرىمنان اسا ەلەكتر جەلىسى تارتىلدى.
بالقاش جاعالاۋىندا بەي-بەرەكەت قۇرىلىسقا جول بەرمەۋ ءۇشىن جاڭا جوسپار بەكىتىلدى. لەپسىگە دەيىنگى جولدار جاسالىپ, بيىل «الماتى – وسكەمەن – لەپسى – اقتوعاي» تراسساسى اشىلدى. قازىر جاعالاۋدى اباتتاندىرۋ جانە ينجەنەرلىك جەلىلەردى تارتۋ جۇمىستارى ءجۇرىپ جاتىر: 9,3 كم جول, 32 كم سۋ, 17 كم كارىز جانە 36 كم ەلەكتر جەلىسى سالىنادى.
بۇل شارالار ءتۋريزمدى دامىتۋعا جانە ءوڭىردىڭ تابيعي ايماقتارىن ءتيىمدى قورعاۋعا باعىتتالعان.
