ءىس-شارا كورنەكتى اقىن, تۇركولوگ, قازاقستاننىڭ ەڭبەك ەرى, «يۋنەسكو قامقورلىعىنداعى مادەنيەتتەردى جاقىنداستىرۋ ورتالىعى» مەملەكەتتىك مۋزەيىنىڭ ديرەكتورى ولجاس سۇلەيمەنوۆتىڭ شىعارماشىلىق مۇراسىنا ارنالدى. بيىل ونىڭ ايگىلى «از ي يا» كىتابىنىڭ جارىق كورگەنىنە 50 جىل تولىپ وتىر. بۇل ەڭبەك وركەنيەت باستاۋلارى مەن مادەنيەتتەر اراسىنداعى ديالوگتى گۋمانيستىك تۇرعىدان تۇسىندىرەتىن رامىزدىك تۋىندى رەتىندە باعالانادى.
دوڭگەلەك ۇستەل بارىسىندا قاتىسۋشىلارعا اقىننىڭ ارنايى بەينە قۇتتىقتاۋى ۇسىنىلدى. سونداي-اق ولجاس سۇلەيمەنوۆتىڭ ءومىرى مەن شىعارماشىلىعىنا ارنالعان دەرەكتى فيلم كورسەتىلىپ, ونىڭ گۋمانيستىك ميسسياسى شىعىس پەن باتىستى ءسوز ونەرى, ءتىل جانە مادەنيەت ارقىلى بايلانىستىرۋشى رۋحاني كوپىر رەتىندەگى ءرولى ايقىندالدى.
ءىس-شاراعا قازاقستاننىڭ تۇركيا رەسپۋبليكاسىنداعى ەلشىلىگى, تۇركسوي وكىلدەرى, يۋنەسكو قامقورلىعىنداعى مادەنيەتتەردى جاقىنداستىرۋ ورتالىعى مەملەكەتتىك مۋزەيى ديرەكتورىنىڭ جالپى جانە ۇيىمداستىرۋ ماسەلەلەرى جونىندەگى ورىنباسارى سالتانات ءاشىموۆا, «مادەنيەتتەردىڭ ءوزارا ارەكەتتەسۋ ورتالىعى» قوعامدىق بىرلەستىگىنىڭ ديرەكتورى ءۇمىتحان مۇڭالباەۆا, جوعارى ماماندىقتار ۋنيۆەرسيتەتىنىڭ رەكتورى, پروفەسسور, عىلىم دوكتورى قاديرحان سۋنگۋروعلۋ, انكارا ۋنيۆەرسيتەتىنىڭ «TÖMER» ورتالىعىنىڭ ديرەكتورى تيمۋر گۇلتەكىن, قازاقستان حالقى اسسامبلەياسى رەسپۋبليكالىق انالار كەڭەسىنىڭ توراعاسى, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەسى نازيپا ىدىرىسقىزى, رەسپۋبليكالىق دوستىق ءۇيىنىڭ باسشىسى نۇرساۋلە التەكوۆا, قازاقستاننىڭ ەڭبەك سىڭىرگەن قايراتكەرى, بەلگىلى جۋرناليست ەرجان ۋايىس, باسقا دا زيالى قاۋىم وكىلدەرى قاتىستى.
«يۋنەسكو قامقورلىعىنداعى مادەنيەتتەردى جاقىنداستىرۋ ورتالىعى» مەملەكەتتىك مۋزەيى ديرەكتورىنىڭ ورىنباسارى سالتانات ءاشىموۆا بۇل جيىن ولجاس سۇلەيمەنوۆتىڭ ايگىلى «از ي يا» كىتابىنىڭ جارىق كورگەنىنە 50 جىل تولۋىنا ۇيىمداستىرىلعانىن, اقىننىڭ كەلەر جىلى اتاپ وتىلەتىن 90 جىلدىق مەرەيتويىنىڭ باستاماسى ەكەنىن اتاپ ءوتتى. ول قاتىسۋشىلارعا كىتاپتىڭ العاشقى تۇپنۇسقاسىن كورسەتىپ, جارتى عاسىردان كەيىن قايتا باسىلعان نۇسقاسىن جانە اقىننىڭ بيىل جارىق كورگەن «يا زنايۋ» اتتى ەڭبەگىن تانىستىردى.
«بۇل شارا – تەك دوڭگەلەك ۇستەل نەمەسە كورمە عانا ەمەس. بۇل – داۋىرلەردى توعىستىرعان ديالوگ, حالىقتاردى ۇيىستىراتىن ءتىلدىڭ قۋاتى, ادامزاتتىق ويدىڭ كەڭدىگى. ولجاس سۇلەيمەنوۆتىڭ شىعارماشىلىعى ءاردايىم ءبىزدى بيىككە, ىزگىلىككە, رۋحاني تەرەڭدىككە جەتەلەيدى», – دەدى سالتانات ءاشىموۆا.
كورمە اياسىندا جازۋشىنىڭ ادەبي مۇرالارى كوپشىلىك نازارىنا ۇسىنىلدى. ەكسپوزيتسيادا سيرەك باسىلىمدار مەن ارحيۆتىك ماتەريالدار قويىلىپ, ونىڭ شىعارماشىلىق جولى – «ارعىماقتار» مەن «از ي يا»-عا دەيىن جان-جاقتى كورسەتىلدى.
ءىس-شارا اياسىندا تۇركسوي ۇيىمىنداعى قازاقستاننىڭ وكىلى نىشانگۇل قاراتاەۆا «اباي» مەرەيتويلىق مەدالىمەن ماراپاتتالدى. بۇعان قوسا, «يۋنەسكو قامقورلىعىنداعى مادەنيەتتەردى جاقىنداستىرۋ ورتالىعى» مەملەكەتتىك مۋزەيىنىڭ قىزمەتكەرلەرى تۇركسوي تاراپىنان مادەنيەتارالىق ديالوگتى دامىتۋعا قوسقان ۇلەستەرى ءۇشىن قۇرمەت گراموتالارىمەن ماراپاتتالدى.
