17 قاراشا كۇنى وبلىس اۋماعىنداعى چاپاي – جاڭاقالا – سايحىن باعىتىنداعى تاسجولدا بولعان جول اپاتىنان 8 ادام قازا تاۋىپ, 4 ادام ءتۇرلى دارەجەدەگى جاراقاتىمەن اۋرۋحاناعا تۇسكەنىن بۇدان بۇرىن حابارلاعان بولاتىنبىز.
ۇكىمەت تاپسىرماسىنا سايكەس قۇرىلعان جۇمىس توبى جاڭاقالا اۋدانىندا بولعان جول-كولىك وقيعاسىنا بايلانىستى ونىڭ ءمان-جايىن تولىق ءارى ءادىل انىقتاپ, زارداپ شەككەندەرگە قاجەتتى كومەك كورسەتۋدى ۇيىمداستىرۋى ءتيىس. سونداي-اق قۇزىرەتتى ورگاندار اپات سەبەبى مەن ءمان-جايىنا تالداۋ جۇرگىزەدى. كوميسسيا قۇرامىنا وبلىس پروكۋرورى, وبلىستىق پوليتسيا دەپارتامەنتى, توتەنشە جاعدايلار دەپارتامەنتى جانە سالالىق باسقارمالار باسشىلارى, جاڭاقالا اۋدانىنىڭ اكىمى ەنگىزىلدى.
«بۇل – بۇكىل ءوڭىرىمىز ءۇشىن وتە وكىنىشتى جاعداي. اۋىر قازا قانشاما وتباسىنا ورنى تولماس قايعى اكەلدى. زارداپ شەككەندەرگە ءتيىستى مەديتسينالىق جاردەم بەرىلەدى, ال قازا تاپقانداردىڭ وتباسىنا زاڭ اياسىندا كومەك كورسەتىلەدى», دەدى وبلىس اكىمى ناريمان تورەعاليەۆ.
جاڭاقالا اۋدانىنىڭ اكىمىنە قازا تاپقان جانداردىڭ جەرلەۋ ءراسىمىن ۇيىمداستىرۋ, سونداي-اق زارداپ شەككەندەر مەن قازا تاپقانداردىڭ وتباسىنا بارلىق قاجەتتى مەديتسينالىق جانە پسيحولوگيالىق كومەك كورسەتۋ تاپسىرىلدى.
وقيعا 17 قاراشا كۇنى چاپاي – جاڭاقالا – سايحىن باعىتىنداعى تاسجولدىڭ 50-شاقىرىمىندا بولعان. Toyota Camry جانە Volkswagen Sharan اۆتوكولىكتەرى سوقتىعىسىپ, Sharan ورتكە ورانعان. وقيعا ورنىندا 8 ادام قازا تاۋىپ, 4 ادام اقجايىق اۋداندىق اۋرۋحاناسىنا جەتكىزىلدى.
قازا تاپقان ازاماتتار جاڭاقالا اۋدانىنىڭ مۇقىر, جاڭاقالا, قىزىلوبا, ماشتەكساي اۋىلدارىنىڭ جانە قاراتوبە اۋدانىنىڭ ەگىندىكول اۋىلىنىڭ تۇرعىندارى. ەكى كولىكتىڭ دە جۇرگىزۋشىسى قايتىس بولعان.
جول اپاتى كەزىندە جاراقات العان 4 ادامنىڭ ومىرىنە تونگەن قاۋىپ جوق, دارىگەرلەر تۇراقتى باقىلاۋدا ۇستاپ, ەم شاراسىن جاساپ جاتىر.
اۋرۋحاناعا تۇسكەن جولاۋشىلاردىڭ ەكەۋى – كامەلەتكە تولماعان, ولار كەشە, ياعني 17 قاراشا كۇنى كەشكى ساعات 21:40-تا وبلىستىق كوپبەيىندى بالالار اۋرۋحاناسىنا جەتكىزىلگەن. 1 جاسار قىز بالا باس-مي جاراقاتىن العان, ميى شايقالۋىنا قوسا, سول جاق سان سۇيەگى سىنعان. اپات كەزىندە 24 جاستاعى اكەسى جانىندا بولعان, ول دا بەلى مەن جامباس-سان بۋىنى ايماعىنداعى جاراقات العان, قازىر جاعدايى قاناعاتتانارلىق. قىزىنا كۇتىم جاساۋ ءۇشىن بالالار اۋرۋحاناسىنا ورنالاستىرىلعان. ال 2012 جىلى تۋعان ۇل بالاعا «جابىق باس-مي جاراقاتى, مي شايقالۋى, توبە ايماعىنىڭ جۇمساق تىندەرىنىڭ جاراقاتى» دەگەن دياگنوز قويىلعان. جاراقات العان ءتورتىنشى ادام – 2002 جىلى تۋعان بويجەتكەن. وعان اقجايىق اۋداندىق اۋرۋحاناسىندا ىشكى قۇرىلىسىنا وتا جاسالعان. «جاعدايى تۇراقتى» دەپ حابارلادى دارىگەرلەر.
قازا تاپقانداردىڭ تورتەۋى – ايەل, تورتەۋى – ەر ادام.
باتىس قازاقستان وبلىسى
