سۋرەتتەردى تۇسىرگەن – ەرلان ومار, «EQ»
ءبىزدى تالانتىنا ءتانتى ەتكەن ماڭعىستاۋ ولكەسىنەن كەلگەن كاراسۋ احمەت مۋستافا بۋراك پەن اقمولا وبلىسىنىڭ تۋماسى سەرگەي كوماروۆ ەدى. ولار ارنايى استاناعا ات باسىن بۇرىپ, قازاقستان حالقى اسسامبلەياسىنىڭ «مىڭ بالا» رەسپۋبليكالىق مادەني-اعارتۋشىلىق جوباسىنا قاتىسۋعا كەلىپتى. بۇلارمەن بىرگە ءار وبلىس پەن قالادان كوپتەگەن ەتنوس وكىلدەرى مەملەكەتتىك تىلدە ءان شىرقاپ, دومبىرا شەرتتى. اتالعان شارانىڭ ەڭ اسەرلى بولىگى – «ونەرلى ورگە جۇزەر» مۋزىكالىق بايقاۋى بولدى. جەڭىمپازدار ءداستۇر بويىنشا قازاقستان حالقى اسسامبلەياسىنىڭ ديپلومدارىمەن, باعالى سىيلىقتارىمەن ماراپاتتالدى. بيىلعى جوبا اباي قۇنانباي ۇلىنىڭ 180 جىلدىعى مەن كۇيشى-كومپوزيتور نۇرعيسا تىلەنديەۆتىڭ 100 جىلدىعىنا ارنالدى.
جاس دارىندار باس قوسقان شارادا قىزىلوردا وبلىسىنىڭ تۋماسى تيمۋر ءجۇسىپوۆ ابايدىڭ «كوزىمنىڭ قاراسى» ءانىن, جەتىسۋلىق كسەنيا دۋبينسكايا مەن استانا قالاسىنىڭ تۋماسى ۆافينا ەلميرا قۇرمانعازىنىڭ كۇيى «بالبىراۋىندى» ورىندادى. بۇل بايقاۋعا ولاردىڭ بارىن سالىپ دايىندالعانى بايقالادى. شىنى كەرەك, ونەردىڭ ءبىر اتى – ىزدەنىس. ىزدەنىس توقتاعان جەردە ونەردىڭ قاسيەتى مەن قۇتى قاشپاق. ال مىنا جاس تالانتتار بىرىنەن-ءبىرى اسىپ, ءبىر ءسات ساناڭدى سان ءتۇرلى اعىسپەن تەربەيدى.
اباي وبلىسىنىڭ تۋماسى ەۆا رومانەنكو نۇرعيسا تىلەنديەۆتىڭ «قۇستار» ءانىن تامىلجىتا ورىنداپ, ءان اۆتورىنىڭ عاسىرلىق تويىنا وزگەشە سىي جاسادى. تۋىندىنى جەتكىزە ورىنداۋى ونىڭ بولاشاقتا دارىندى ءانشى بولاتىنىن دالەلدەپ تۇرعانداي. بۇل ءىس-شارانىڭ تاعى ءبىر ەرەكشەلىگى, مەكتەپ جاسىنداعى وزگە ۇلت بالالارىنىڭ پاتريوتتىق سەزىمىنىڭ كۇشتىلىگىن كورسەتە العاندىعى. «تۋعان جەر», «اتامەكەن», « ۇلى قازاعىم» اتتى اندەر شىرقالدى.
قازاقستان حالقى اسسامبلەياسى توراعاسىنىڭ ورىنباسارى, پرەزيدەنت اكىمشىلىگىنىڭ قازاقستان حالقى اسسامبلەياسى حاتشىلىعىنىڭ مەڭگەرۋشىسى مارات ءازىلحانوۆ ءسوز سويلەپ: «بۇل جوبا ەلىمىزدەگى كەلىسىم مەن تاتۋلىقتىڭ, جاس ۇرپاقتىڭ بويىنداعى دوستىق پەن ءوزارا سىيلاستىقتىڭ ايقىن كورىنىسى. «مىڭ بالا» – ءار وڭىردەن كەلگەن جاس دارىنداردى ءبىر جەردە توعىستىرىپ, مادەنيەتتەر مەن داستۇرلەردىڭ ورتاق قۇندىلىعىن دارىپتەيتىن بىرەگەي جوبا. ون جىل بويى ۇيىمداستىرىلىپ كەلەدى. جوباعا 3 ميلليوننان استام بالا قاتىسىپ, 130 مىڭعا جۋىق شارا ۇيىمداستىرىلدى. بۇل ارقىلى مەملەكەتتىك ءتىلىمىزدى دارىپتەۋگە جول اشامىز. وسى جوباعا قاتىسىپ, تۇلعا بولعان ازاماتتار دا كوپ. سولاردىڭ ىشىنەن سەنات دەپۋتاتى گەننادي گەنناديەۆيچ شيپوۆسكيحتى ايتقىم كەلەدى. سونىمەن بىرگە اللا گاۆرينا دا وسى جوبا ارقىلى كورەرمەندەر كوزايىمىنا اينالدى. وسىنداي تۇلعالار بۇگىنگى قاتىسۋشىلاردىڭ اراسىنان دا شىعارى ءسوزسىز. «مىڭ بالا» جاي عانا شىعارماشىلىق بايقاۋ ەمەس, ۇرپاقتار ساباقتاستىعى مەن رۋحاني بىرلىكتىڭ مەكتەبى دەپ بىلگەن دۇرىس», دەدى.
شىندىعىندا اتالعان جوبانىڭ ماقساتى – ءتۇرلى ەتنوستاردىڭ مەملەكەتتىك ءتىلدى ۇيرەنۋگە ىنتالى جاس وكىلدەرىن قولداۋ, ولاردىڭ شىعارماشىلىق قابىلەتتەرىن دامىتۋ, دوستىقتى نىعايتۋعا ۇلەس قوسۋ.
ءىس-شارا سوڭىندا وسى بايقاۋدى ۇيىمداستىرۋشى تاراپتىڭ وكىلىن دە سوزگە تارتتىق. قوعامدىق كەلىسىم مەملەكەتتىك مەكەمەسىنىڭ ءبولىم باسشىسى ەلدوس جۇماعۇلوۆ بىلاي دەدى: «بۇل – قازاقستان حالقى اسسامبلەياسىنىڭ نەگىزگى جوبالارىنىڭ ءبىرى. اعارتۋشىلىق جاعى دا باسىم. باستى ماقسات – ەتنوس وكىلدەرى اراسىندا مەملەكەتتىك ءتىلدى, ءداستۇرىمىزدى, ونەرىمىزدى ناسيحاتتاۋ. وسى ارقىلى بىرلىك يدەياسىن جۇزەگە اسىرۋدى كوزدەدىك. جىل بويى ءار وڭىردە وتكىزىپ, جەڭىمپازداردى استانادا ماراپاتتايمىز».
الماتى قالاسى جەتىسۋ اۋداندىق №101 مەكتەپ-گيمنازياسىنىڭ 9 «ب» سىنىپ وقۋشىسى ديلناز ازاتوۆا « ۇلى قازاعىم» اتتى ءاندى ورىنداپ, ءبارىمىزدى تاڭداندىردى. ۇلتى ۇيعىر بولسا دا, جۇرەگى قازاق دەپ سوعاتىنىن دالەلدەگەن ول: «بۇل ءان مەنى رۋحتاندىرادى. سول ءۇشىن دە مەن ونى قىزىعىپ جاتتادىم. ماتىنىنە نازار سالساڭىز, «ساق پەن عۇننان جالعاسقان» دەگەن ءسوز بار. بۇل قازاق حالقىنىڭ تەرەڭ تامىرلى تاريحىن ايتىپ تۇر. قىزىققانىم سونشا, بۇل ءاندى ەكى كۇندە ۇيرەنىپ الدىم».
ءيا, عالامدا تاتۋلىق پەن بىرلىكتەن اسقان ەشتەڭە جوق شىعار. عاسىرلار سارىنىندا ءبىزدىڭ ولكەمىزدە سان ۇلت پەن ۇلىس ورىن تەۋىپ, ۇلان-عايىر قازاق دالاسىنىڭ قۇشاعىندا باقىتتىڭ بەسىگىن تەربەتتى. وسىنىڭ ءبارى مەملەكەت قۇرۋشى ۇلتتىڭ دارحان كوڭىلى مەن تازا جۇرەگىنىڭ ءلۇپىلىنىڭ بەلگىسى. تاتۋلىق باردا كۇن دە شۋاقتى, اي دا اجارلى, وتان دا قۋاتتى بولا بەرمەك.
