تۇركى ەلدەرىنىڭ جاستارى قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنە 30 جىلدان اسا ۋاقىتتان بەرى ءبىلىم الۋعا كەلەدى. بيىل وسى ۋنيۆەرسيتەتتىڭ دايىندىق ورتالىعىندا ازەربايجاننان كەلگەن ۇشەم – زەحرا, ەسرا جانە لالا ازيزوۆالار مەن قىرعىزستاننان كەلگەن ەگىزدەر – باتما جانە زۋرا اككاناليەۆالار ءبىلىم الىپ جاتىر. وقىتۋشىلاردىڭ ايتۋىنشا, تىڭداۋشىلاردىڭ جاڭا تىلدەردى ۇيرەنۋگە دەگەن قىزىعۋشىلىعى مەن ىنتاسى جوعارى.
«قازاقستاندا جوعارى ءبىلىم الۋدى تاڭداۋىمىزعا بىرنەشە سەبەپ بار. ەڭ باستىسى, تۇركى ەلدەرىنەن كەلگەن ستۋدەنتتەرمەن تانىسىپ, ورتاق مادەنيەتىمىز بەن تاريحىمىزدى تەرەڭىرەك تانىعىمىز كەلدى. سونداي-اق تۇركى الەمىنىڭ رۋحاني استاناسى سانالاتىن تۇركىستان قالاسىندا ءبىلىم الۋ – ءبىز ءۇشىن ۇلكەن مارتەبە», دەيدى ەگىزدەر. ال ۇشەمدەر: ء«بىزدىڭ ءتۇر-سيپاتىمىز ۇقساس بولعانىمەن, تاڭداعان ماماندىعىمىز ءارتۇرلى. ءبىرىمىز – پسيحولوگ, ءبىرىمىز – دارىگەر, ەندى ءبىرىمىز مۇعالىم بولعىمىز كەلەدى», دەيدى.
ايتا كەتەيىك, دايىندىق ورتالىعىندا وقۋ ورداسىنىڭ ىشكى گرانتى نەگىزىندە تۇركى مەملەكەتتەرىنەن كەلگەن جاستار ءبىلىم الىپ, قازاق تىلىمەن قاتار تۇرىك جانە اعىلشىن تىلدەرىن دە مەڭگەرەدى. قازىردىڭ وزىندە ورتالىقتا تۇركى مەملەكەتتەرىنەن كەلگەن 296 تىڭداۋشى بار. ولار ءبىر جىل كولەمىندە تىلدىك دايىندىقتان ءوتىپ, قورىتىندى ەمتيحان ناتيجەسىندە تاڭداعان ماماندىعى بويىنشا وقۋىن جالعاستىرادى. سولاردىڭ قاتارىنداعى ۇشەم مەن ەگىز قىزدار دا دايىندىق ورتالىعىن اياقتاعاننان كەيىن ءوز قالاۋىنا قاراي ءبىلىم جەتىلدىرۋدى جوسپارلاپ وتىر.
