جازۋشىلار جانە جۋرناليستەر وداعىنىڭ مۇشەسى, اقىن, ولكەتانۋشى سۇلتانبەك قۇدايبەرگەن «ەلەۋلى ەسىمدەر» جوباسى اياسىندا ءوزىنىڭ قوس كىتابىن ورالدىق وقىرمانعا تانىستىردى. ونىڭ ءبىرى «جان شىراعى» اتتى ولەڭدەر جيناعى قالامگەردىڭ ءوز شىعارمالارى بولسا, «تارتۋىم – ءدامى بالداي ءسوزدىڭ جەنتى» اتتى جيناق ومىردەن قىرشىن كەتكەن بەكقالي قاراباليننىڭ ءومىر جولىنا ارنالعان.
«بەكقالي قاراباليننىڭ ەسىمىن بۇگىندە ادەبيەت زەرتتەۋشىلەرىنىڭ ءوزى بىلە بەرمەيدى. ماڭعىستاۋدان ورال قالاسىنا 1936 جىلى 16 جاسىندا كەلگەن تالانتتى جاس از ۋاقىت ىشىندە وسىنداعى ادەبيەت ۇيىرمەلەرىنە بەلسەنە قاتىسقان. وبلىستىق «ەكپىندى قۇرىلىس» گازەتىندە كوپتەگەن شىعارماسى جاريالانعان. سول كەزدىڭ وزىندە اقىن رەتىندە تانىلىپ, 1938 جىلى باتىسقازاقستاندىق قالامگەرلەر ساپىندا جامبىل شىعارماشىلىعىنىڭ 75 جىلدىعىنا, 1939 جىلى قازاقستان جازۋشىلارى مەن حالىق اقىندارىنىڭ ەكىنشى سيەزىنە قاتىسادى. وداق حاتشىسى ءسابيت مۇقانوۆتىڭ كەڭەسىمەن الماتى قالاسىنا بارادى. اتتەڭ, تالانتتى اقىننىڭ عۇمىرى تىم قىسقا بولىپتى. نەبارى 21 جاسىندا قان مايداندا قازا تاپقان. اقىن بەكقالي قارابالين ارادا 86 جىل وتكەندە ورال توپىراعىنا كىتاپ بولىپ ورالىپ وتىر. جيىرمادان اسقان جاسىندا جوعالعان قازاق جىرىنىڭ ءبىر جەبەسىن ىزدەپ تاۋىپ, مۇراسىن تۇگەندەگەن سۇلتانبەكتىڭ ەڭبەگى ەرەن!» دەدى قادىرساراي ديرەكتورى داۋلەتكەرەي قۇسايىنوۆ.
كەزدەسۋدە كەش يەسىمەن قاتار تاعى ءبىر ماڭعىستاۋلىق اقىن, «شابىت» فەستيۆالىنىڭ لاۋرەاتى انۋاربەك بيماعامبەت تە ءسوز الىپ, ساحنادان ولەڭ وقىدى. مەيماندارعا «قادىر» جۋرنالىنىڭ العاشقى سانى سىيعا تارتىلىپ, باتىس قازاقستان وبلىستىق مادەنيەت باسقارماسىنىڭ باسشىسى قۋانىشبەك مۇقانعاليەۆتىڭ العىسحاتى تاپسىرىلدى.
اقىن, ولكەتانۋشى نۇرلان ءسادىر جاڭا جيناققا شولۋ جاساپ, اۆتوردىڭ كەيبىر شۋماقتارىن وقىپ بەردى. كەش يەسى سۇلتانبەك قۇدايبەرگەن جايىق جۇرتىنىڭ ىستىق ىقىلاسىنا ءىلتيپات ءبىلدىرىپ, ۇيىمداستىرۋشىلارعا العىس ايتتى.
باتىس قازاقستان وبلىسى
