تۇركىستاننىڭ تۋريستىك الەۋەتىن ارتتىرۋ, وڭىردەگى شىعارماشىلىق يەلەرىنە قولداۋ كورسەتۋ ماقساتىندا, ەرەكشە فورماتتا ۇيىمداستىرىلعان «ونەرلى ولكە» فەستيۆالىندە ونەر ۇجىمدارى ۇلتتىق قۇندىلىقتار مەن زاماناۋي ونەردىڭ تاماشا ۇيلەسىمىن كورسەتتى. سونىمەن قاتار اۋىلدىق مادەنيەت ۇيلەرى مەن كلۋبتاردىڭ جۇمىسىن جانداندىرۋ باعىتىندا «اۋىل – مادەنيەتتىڭ باستاۋى» بايقاۋى ۇيىمداستىرىلعان بولاتىن. ءۇشىنشى رەت وتكەن بايقاۋعا 115 اۋىلدىق مادەنيەت ءۇيى مەن كلۋبتارى قاتىسىپ, ۇزدىكتەرى انىقتالدى.
«ونەرلى ولكە» فەستيۆالىندە قازىلار القاسىنىڭ شەشىمىمەن باس جۇلدەگە يە بولعان بايدىبەك اۋدانى مەن جۇلدەلى ورىن العان وتىرار جانە ماقتاارال اۋدانى ونەرپازدارىنا قارجىلاي سىيلىقتار مەن ارنايى ديپلومدار بەرىلدى. سونداي-اق «اۋىل – مادەنيەتتىڭ باستاۋى» اۋىلدىق مادەنيەت ۇيلەرى مەن كلۋبتار اراسىندا وتكەن وبلىستىق بايقاۋ جەڭىمپازدارى دا ماراپاتتالدى. باس جۇلدەنى تولەبي اۋدانى «زەرتاس» اۋىلدىق مادەنيەت ءۇيىنىڭ ۇجىمى يەلەندى. ۇزدىك دەپ تانىلعان اۋىلدىق مادەنيەت ۇيلەرى مەن كلۋبتارىنا ارنايى جۇلدەلەر مەن ديپلومدار تابىستالدى. سالتاناتتى راسىمگە قاتىسقان وبلىس اكىمىنىڭ ورىنباسارى ەرتاي التاەۆ جەڭىمپاز جانە جۇلدەگەر اۋدان, قالا ونەر ۇجىمدارىن ماراپاتتادى.
ايتا كەتەلىك, وڭىردە مادەني ينفراقۇرىلىمدى دامىتۋ باعىتىندا بيىل 4 مادەنيەت ءۇيى پايدالانۋعا بەرىلسە, جىل سوڭىنا دەيىن 2 مادەنيەت نىسانىنىڭ قۇرىلىسى اياقتالادى.
تۇركىستان وبلىسى
