مەملەكەت باسشىسىنىڭ تاپسىرماسىنان كەيىن وسى باعىتتا تۇرالاپ قالعان جۇمىستاردا ىلگەرىلەۋ بايقالدى. مىسالى, الماتى قالاسىنىڭ جەدەل كومەك كورسەتۋ اۋرۋحاناسىندا پاتسيەنتتەردىڭ كەلىسىمدەرىن تسيفرلاندىرۋعا ارنالعان قاناتقاقتى جوبا ىسكە قوسىلعان. بۇل مەديتسينالىق قىزمەت كورسەتۋدىڭ قاعازسىز ۇلگىسىنە كوشۋدىڭ ماڭىزدى كەزەڭدەرىنىڭ ءبىرى. جوبا اياسىندا TrustCare دەپ اتالاتىن جۇيەنى TrustMe كومپانياسى مەن الماتى قالاسىنىڭ جەدەل كومەك كورسەتۋ اۋرۋحاناسى بىرلەسىپ ەنگىزگەن. جۇيە پاتسيەنتتەردىڭ مەديتسينالىق ۇيىمدا قالۋىنا, اۋرۋحاناعا جاتۋعا, وزگە دە مەديتسينالىق راسىمدەرگە كەلىسىم بەرۋىن اۆتوماتتاندىرادى. ەندى قاعاز تۇرىندەگى بلانكىلەردىڭ ورنىنا پاتسيەنتتەر بارلىق قۇجاتتارعا پلانشەت ارقىلى قول قويادى. قول قويىلعان مالىمەتتەر اۆتوماتتى تۇردە جۇيەدە ساقتالادى.
جاڭا تاجىريبە دارىگەر مەن مەيىرگەرلەردىڭ بۇرىن اينالىساتىن «باسىپ شىعارۋ», «تىگۋ», «مۇراعاتتاۋ» سىندى جۇمىستارعا كەتەتىن ۋاقىتىن ۇنەمدەۋگە مۇمكىندىك بەرىپ وتىر. ءارى بۇل شارۋا بۇرىنعىدان الدەقايدا جىلدام, تۇسىنىكتى, قاۋىپسىز بولا ءتۇستى. قابىلداۋ ءبولىمىنىڭ جۇمىسىندا دا قاربالاس ازايدى. باستىسى, مەديتسينا ماماندارى ءوز ۋاقىتىن ەسەپ-قيساپقا ەمەس, پاتسيەنتتەرگە كوبىرەك ارناۋعا مۇمكىندىك الىپ وتىر.
قاناتقاقتى جوبانىڭ العاشقى ايىندا 10 000-نان استام پاتسيەنتتىڭ «كەلىسىمدەرى» مەن «باس تارتۋلارى» راسىمدەلگەن. قۇجاتتارعا قول قويۋ جىلدامدىعى شامامەن 60%-عا ارتقان. كۇن سايىنعى ەسەپ بەرۋ ۋاقىتى 3 ساعاتتان 15 مينۋتقا دەيىن قىسقارعان. الدىن الا ەسەپ بويىنشا, بۇل تاسىلمەن ءبىر اۋرۋحانا جىلىنا شامامەن 53 ميلليون تەڭگە كولەمىندە رەسۋرستى ۇنەمدەيدى. مۇندا قاراجاتپەن قاتار ۋاقىت ۇنەمدەلەتىنىن ەسكەرگەن ءجون. ەگەر جوبانى ەلىمىزدەگى 100 مەديتسينالىق ۇيىم ەنگىزسە, جالپى ەكونوميكالىق اسەر جىلىنا جارتى ميلليارد تەڭگەدەن اسۋى مۇمكىن ەكەنىن العا تارتادى ساراپشىلار.
– ءبىزدىڭ جوبا تەحنولوگيانى دامىتۋ دەگەن جەلەۋمەن ىسكە اسپايدى. بۇل مەديتسيناداعى ءوزارا بايلانىستىڭ مادەنيەتىن وزگەرتۋدىڭ جولى. دارىگەر قاعازعا ەمەس, پاتسيەنتكە كوپ كوڭىل بولگەندە عانا بۇكىل جۇيە ۇتادى. TrustCare جۇيەسىنىڭ دايىن نۇسقاسىندا جاساندى ينتەللەكت ەلەمەنتتەرى دە ەنگىزىلگەن. ول جيناقتالعان دەرەكتەردى تالداپ, «اقىلدى» ەسەپتەر قالىپتاستىرادى. بۇل مەديتسينالىق ۇيىمدارعا باسقارۋشىلىق شەشىمدەردى دالىرەك قابىلداۋعا, ىشكى ساراپتامانى كۇشەيتۋگە مۇمكىندىك بەرەدى, – دەيدى TrustMe كومپانياسىنىڭ وپەراتسيالىق ديرەكتورى عالىمجان يمانعاليەۆ.
جوبانى ىسكە اسىرۋعا الماتى قالالىق اۋرۋحاناسىنىڭ ۇجىمى سەبەپشى بولعانىن جوعارىدا ايتتىق. بۇل جۇمىسقا باس دارىگەر الماز دجۋۆاشەۆتان باستاپ, مەديتسينالىق ءبولىمنىڭ مەڭگەرۋشىسى باعداد الىمبەتوۆ, قابىلداۋ ءبولىمىنىڭ اعا مەيىربيكەسى گۇلزيرا بورانباەۆالار تارتىلعان. وسىنىڭ ناتيجەسىندە جۇيە ناقتى جۇمىس بارىسىندا تيىمدىلىگىن كورسەتىپ وتىر.
