زياتكەرلىك مەكتەپتىڭ ءباسپاسوز قىزمەتىنىڭ مالىمەتىنشە, «يتبالىق ساقشىلارى» جاساعىنىڭ بەلسەندىلەرى مەن ماڭعىستاۋ وبلىسى بالىق شارۋاشىلىعى باسقارماسىنىڭ جانۋارلار دۇنيەسىن قورعاۋ قىزمەتى ينسپەكتورلارى بىرلەسىپ «ەكو-كوزقاراس» اتتى پىكىرتالاس الاڭىن ۇيىمداستىردى. كەزدەسۋ بارىسىندا وڭىردەگى ەڭ وزەكتى ماسەلە – قىزىل كىتاپقا ەنگەن كاسپي يتبالىعىنىڭ قىرىلۋ سەبەپتەرى تالقىلاندى. جاس ەكولوگتار كاسپي تەڭىزى ەندەميگىنىڭ ازايۋ سەبەپتەرىن زەرتتەۋگە, ولەكسەلەردى جيناۋ جانە تالداۋ جۇمىستارىنا ەرىكتى رەتىندە اتسالىسۋعا دايىن ەكەندىكتەرىن ءبىلدىردى.
پىكىرتالاستا «ەكوليدەر» كلۋبىنىڭ ۇسىنىستارىنىڭ ءبىرى – يتبالىق تابىلعان جاعدايدا ارەكەت ەتۋ الگوريتمىن ازىرلەپ, ونى تۋريستەر ءجيى باراتىن جەرلەرگە ورنالاستىرۋ جانە حالىققا كەڭىنەن جاريالاۋ ماسەلەسى كوتەرىلدى.
«تازا قازاقستان» – تەك قوقىستان تازارتىلعان كوشەلەر عانا ەمەس, ول – كاسپي جاعالاۋىنىڭ جۇزدەگەن ءولى يتبالىقسىز تازا قالپىنا كەلۋى», دەدى «ەكوليدەر» ەرىكتىلەر كلۋبىنىڭ جەتەكشىسى باقىتگۇل جاقسىلىقوۆا.
كەزدەسۋگە «ECOJER» قاۋىمداستىعىنىڭ ايماقتىق ەكوكەڭەسى مەن «QazaqBalyk» قاۋىمداستىعىنىڭ وبلىستىق فيليالى وكىلدەرى قاتىسىپ, NIS جاس ەكولوگتارىنىڭ باستامالارىنا قولداۋ ءبىلدىردى.
ماڭعىستاۋ وبلىسى
