سۋرەت: 018.kz
«جاستار پراكتيكاسىنا» 35 جاسقا دەيىنگى ەل ازاماتتارى قاتىسا الادى. ءبىرىنشى كەزەكتە ۇمىتكەردىڭ ماماندىعى بويىنشا ءبىلىمى بولۋعا ءتيىس. ويتكەنى باعدارلاما – وقۋىن ءبىتىرىپ, جۇمىس تاپپاي جۇرگەن تۇلەكتەردىڭ ءوز ماماندىعىنا قاتىستى تاجىريبە جيۋىنا تاپتىرماس مۇمكىندىك. نەگە دەسەڭىز, ەڭبەك نارىعىندا جۇمىس بەرۋشىلەردىڭ تاڭداۋى كوبىنە جاس مامانعا ەمەس, ءوز سالاسىندا ىسىلعان, دايىن قىزمەتكەرگە تۇسەدى. سالدارىنان تاجىريبەسى جوق جاستار ءوز ماماندىعىنان جەرىنۋى ابدەن مۇمكىن. «جاستار پراكتيكاسى» ارقىلى جۇمىسقا ورنالاسقاندار كوشىن قازىر تۇركىستان وبلىسى باستاپ تۇر. وڭىردە 6 مىڭ ادام وسى باعدارلامانىڭ مۇمكىندىگىن پايدالانعان. سول سەكىلدى قىزىلوردا وبلىسىندا – 2,3 مىڭ, جامبىل وبلىسىندا – 1,7 مىڭ, اقتوبە وبلىسىندا – 1,5 مىڭ, شىمكەنت قالاسىندا 1,3 مىڭ جاس ماماندىعىنا قاتىستى تاجىريبە جيۋدى ءجون كورگەن.
باعدارلاماعا قاتىساتىن ايەلدەردىڭ ۇلەسى 66,5% نەمەسە 14,3 مىڭ ادامدى قۇراسا, اۋىل تۇرعىندارىنىڭ ۇلەسى 12,7 مىڭ ادامدى نەمەسە 59,1%-دى قۇرايدى. بۇل ستاتيستيكاعا ءوڭىردىڭ الەۋمەتتىك-ەكونوميكالىق جاعدايىنا وڭ اسەر ەتەدى. قالاعا قاراعاندا اۋىلدا ۇمىتكەرلەردىڭ كوپ بولۋى تەگىن ەمەس. وسى مۇمكىندىكتى ءبىلىم ۇيىمدارىنا جۇمىسقا ورنالاسۋدى كوزدەيتىن جۇمىسسىز تۇلەكتەر دە پايدالانا الادى. ول ءۇشىن جۇمىسقا ورنىعىپ, تاجىريبە جيۋدى ويلاعان جاس مانساپ ورتالىعىنا ءوتىنىش بەرۋى قاجەت.
بۇدان ءارى جاس مامان جۇمىسقا قابىلدانعاندا قاراۋسىز قالمايدى. جۇمىس بەرۋشى كاسىبي ءبىلىم مەن جۇمىس تاجىريبەسىمەن بولىسەتىن تالىمگەر بەكىتەدى, ءبىر سوزبەن ايتقاندا, سۇيەمەلدەيدى. بۇگىندە ەلىمىز كولەمىندە باعدارلاما قاتىسۋشىلارىنىڭ ورتاشا جالاقىسى 118 مىڭ تەڭگەنى قۇرايدى. مۇنىڭ ءوزى – ماماندىعىنا قاتىستى تاجىريبە جيۋدى ويلاعان تالاپتى جاسقا جاقسى مۇمكىندىك. سەبەبى ۇجىمدا شىڭدالىپ, ءوز جۇمىسىن ۇرشىقشا يىرۋگە ماشىقتانعان مامانعا سۇرانىس بولارى ءسوزسىز.
«جاستار پراكتيكاسى» ارقىلى جۇمىسقا ورنالاسقانداردىڭ اراسىندا ەڭ كوپ سۇرانىسقا يە ماماندىق – جالپى ءبىلىم بەرەتىن مەكتەپ مۇعالىمى. وعان 5 863 ادام جاس مامان قاتىسقان. سول سەكىلدى مەكتەپكە دەيىنگى تاربيەشى – 807, مەديتسينا قىزمەتكەرى – 2 005, باعدارلاماشى – 1 094, زاڭگەر – 784, فەلدشەر – 766.
مۇمكىندىكتى پايدالانىپ, جۇمىسقا ورنالاسقان جاستاردىڭ اراسىندا ورال قالاسىنىڭ تۇرعىنى ەلمار تەمىر بار. ول مەديتسينا باعىتىندا ءبىلىم العان. تالاپتى جاس تاجىريبە جيۋدى ويلاپ, ماماندىعى بويىنشا ەڭبەك ەتە باستاعان. قازىر سول جۇمىستا تۇراقتاپ قالۋدى جوسپارلاپ وتىر.
«بيىل باتىس قازاقستان جوعارى مەديتسينالىق كوللەدجىن «ەمدەۋ ءىسى» ماماندىعى بويىنشا ءتامامدادىم. وقۋدى بىتىرگەن سوڭ, بىردەن مانساپ ورتالىعىنا بارىپ, جۇمىسسىز رەتىندە تىركەلدىم. ورتالىقتا جاستار پراكتيكاسى تۋرالى اقپاراتقا قانىقتىم. شامامەن ون كۇننەن كەيىن مەنى قاراتوبە اۋداندىق اۋرۋحاناسىنا جۇمىسقا جىبەردى. 3 قىركۇيەكتەن باستاپ سول جەرگە تۇراقتى جۇمىسقا قابىلدادى», دەيدى ەلمار.
باعدارلاماعا قاتىسقانداردىڭ ىشىندە سول جۇمىس ورنىندا تۇراقتاپ جاتقاندار ءبىر قاۋىم. تاجىريبە جيناپ, باسقا جۇمىستا باعى جانعاندار دا از ەمەس. باستىسى, ەكى جاعدايدا دا جاس مامان مەن جۇمىس بەرۋشى ۇتىلمايدى.
