مەملەكەت باسشىسى ۆلاديمير ءپۋتيندى جاھاندىق دەڭگەيدەگى ساياسي تۇلعا رەتىندە جوعارى باعالاپ, ونىڭ ەسىمى الەمنىڭ كوپتەگەن ەلىندە قۇرمەتپەن اتالاتىنىن ايتتى.
توقاەۆ وتكەن جىلدىڭ قاراشاسىندا رەسەي پرەزيدەنتىنىڭ قازاقستانعا جاساعان مەملەكەتتىك ساپارىن تاريحي وقيعا دەپ اتادى.
«وتكەن جىلدىڭ قاراشا ايىندا رەسەي پرەزيدەنتى قازاقستانعا مەملەكەتتىك ساپارمەن كەلدى. بۇل ساپار ءوزىنىڭ ساياسي جانە پراكتيكالىق ماڭىزى جاعىنان تاريحي وقيعا بولدى. استانادا ءبىزدىڭ سەرىكتەستىگىمىزدىڭ جاڭا كوكجيەكتەرىن اشاتىن اۋقىمدى قۇجاتتار توپتاماسىنا قول قويىلدى. ماڭىزدىسى – سانكتسيالىق قىسىم مەن حالىقارالىق شيەلەنىستەرگە قاراماستان, ەكى ەل ىنتىماقتاستىقتىڭ تۇراقتىلىعى مەن سەرپىندى دامۋىن ساقتاپ, قورعاپ قالا الدى», دەدى پرەزيدەنت.
مەملەكەت باسشىسى ماسكەۋگە باراتىن الداعى مەملەكەتتىك ساپاردىڭ ايرىقشا ماڭىزدىلىعىن اتاپ ءوتتى.
«الداعى كەلىسسوزدەر ەكى ەل قارىم-قاتىناسىنا جاڭا مازمۇن بەرىپ, ارىپتەستىكتى تەرەڭدەتۋگە باعىتتالماق», دەدى مەملەكەت باسشىسى.
سونىمەن قاتار پرەزيدەنت توقاەۆ سوڭعى ايلاردا قحر توراعاسى سي تسزينپينمەن, اقش پرەزيدەنتى دونالد ترامپپەن, سونداي-اق ەۋروپا, ازيا جانە افريكا ەلدەرىنىڭ باسشىلارىمەن مازمۇندى كەزدەسۋلەر وتكىزگەنىن ايتتى.
«ولاردىڭ كوپشىلىگى گەوساياسي سپەكتردىڭ قاراما-قارسى باعىتتارىندا تۇرعانىنا قاراماستان, بارلىعى دا رەسەي مەن ونىڭ كوشباسشىسىنىڭ حالىقارالىق قاتىناستارداعى ءتۇيىندى ماسەلەلەردى شەشۋدەگى ەرەكشە ءرولىن مويىندايدى. باسقاشا ايتقاندا, قازىرگى الەمدەگى قايشىلىقتاردى ماسكەۋدىڭ قاتىسۋىنسىز ەڭسەرۋ مۇمكىن ەمەس», دەدى توقاەۆ.
قاسىم-جومارت توقاەۆتىڭ ايتۋىنشا, قازاقستان مەن رەسەيدىڭ مەملەكەتارالىق قاتىناستارى ناعىز ۇلگى بولارلىق دەڭگەيگە جەتتى. سوڭعى وتىز جىلدان استام ۋاقىت ىشىندە ەكى ەل كوپجاقتى ىنتىماقتاستىقتى حالىقتاردىڭ يگىلىگى ءۇشىن دامىتىپ كەلەدى. ال ۆلاديمير پۋتينمەن وتەتىن الداعى كەلىسسوزدەر بۇل سەرىكتەستىككە جاڭا سەرپىن بەرەدى.
