سالا باسشىسىنىڭ ايتۋىنشا, كەيىنگى جىلدارى كوپشىلىك كورەرمەننىڭ, سونىڭ ىشىندە شەتەلدىك اۋديتوريانىڭ دا قازاق فيلمدەرىنە ىقىلاسى ارتىپ كەلەدى.
جوعارىدا اتاپ وتكەن جەتىستىكتەرمەن قاتار بيىل كەيىنگى 30 جىلدا العاش رەت قازاقستان كانن قالاسىندا وتكەن ەڭ ءىرى كينونارىقتاردىڭ ءبىرى – «Marché du Film» الاڭىندا ءوز ستەندىن ۇسىندى. بۇل – وتاندىق پروديۋسەرلەر مەن ديستريبيۋتورلار ءۇشىن ۇلكەن بەلەس.
«سونىمەن قاتار ءبىز «ەۋرازيا» حالىقارالىق كينوفەستيۆالىن قايتا جاڭعىرتتىق. بۇل – ناقتى قادامداردىڭ ءبىرى. ءبىز ءۇشىن فيلمدەرىمىزدىڭ شەتەلدىك فەستيۆالداردا كورىنگەنى عانا ەمەس, ءوز كورەرمەندەرىمىزگە دە كەڭىنەن جەتۋى اسا ماڭىزدى. بيىل ەلىمىزدىڭ كينوتەاترلارىندا «تەزەك», «فەيكوۆىي ارمان», «قايتادان» سەكىلدى وتاندىق 10 فيلم كورسەتىلدى. سولاردىڭ ىشىندە «قايتادان» ءفيلمى پروكاتتا 1 ميلليارد تەڭگەدەن استام تابىس تاۋىپ, مەملەكەت سالعان قاراجاتتى تولىق قايتاردى. بۇل – كينو سالاسىن جاڭعىرتۋداعى باعىتىمىزدىڭ دۇرىس ەكەنىنىڭ ءبىر دالەلى» دەيدى مادەنيەت جانە اقپارات ءمينيسترى ايدا بالاەۆا.
قازىر كورەرمەن اۆتورلىق تۋىندىلاردان گورى, كوبىنە جەڭىل جانرداعى فيلمدەردى تاڭدايتىن بولعان. سول سەبەپتى جوبالاردى ىرىكتەۋ كەزىندە كوبىنە يدەيا جانە ستسەناريمەن قاتار, ءفيلمنىڭ كورەرمەنگە قانشالىقتى قىزىق بولاتىنىنا دا ءمان بەرىلەدى ەكەن.
2024 جىلدان باستاپ مەملەكەت تاراپىنان قولداۋ تاپقان ءاربىر فيلم الدىمەن ەل كينوتەاترلارىندا كورسەتىلۋگە ءتيىس دەگەن مىندەتتى شارت ەنگىزىلدى. تەك سودان كەيىن عانا ونلاين-پلاتفورمالارعا شىعارىلادى. اتالعان شەشىم فيلمدەردىڭ قولجەتىمدىلىگىن ارتتىرىپ, كورەرمەنمەن بايلانىس ورناتۋعا سەبەپ بولادى.
ء«بىز تاريحي ءارى پاتريوتتىق باعىتتاعى جوبالاردى دا تۇراقتى تۇردە قولدايمىز. سونىڭ ايعاعى – جۋىردا جارىق كورگەن «كاپيتان بايتاسوۆ» ءفيلمى. بۇل تۋىندى – ەرلىك, نامىس پەن بورىش الدىنداعى ادالدىق جايىندا تەرەڭ ويعا جەتەلەيدى. حالىق قاھارمانى, پوليتسيا كاپيتانى عازيز بايتاسوۆتىڭ ەرلىگىنە ارنالعان شىعارما كوپشىلىكتى ىزگى قۇندىلىقتارعا ۇندەيدى.
سونداي-اق تاعى ءبىر ايرىقشا جوبا – ء«اليا» فيلمىنە توقتالىپ وتكىم كەلەدى. «Microcosm Pictures» جاۋاپكەرشىلىگى شەكتەۋلى سەرىكتەستىگىمەن بىرلەسكەن جوبا بىلتىر ۇلتتىق كينونى قولداۋ ورتالىعى وتكىزگەن بايقاۋدا جەڭىمپاز اتانعان ەدى. الايدا پروداكشن-كومپانيا قارجىلىق سەبەپتەرگە بايلانىستى تۇسىرۋدەن باس تارتتى. سوعان قاراماستان, الداعى ۋاقىتتا بۇل يدەيا قايتا جاندانىپ, ءاليا مولداعۇلوۆا تۋرالى فيلم مىندەتتى تۇردە كورەرمەندەرگە جول تارتادى دەپ سەنەمىز» دەيدى مينيستر.
ونىڭ مالىمدەۋىنشە, كينو ءوندىرىسىن بارىنشا اشىق ءارى زامانعا ساي ەتۋ ماقساتىندا ە-كينو اتتى تسيفرلىق پلاتفورما قۇرىلىپ جاتىر. وندا فيلمدەردىڭ ءتۇسىرىلىمى, تابىسى, كورەرمەننىڭ سانى سياقتى بارلىق دەرەك جينالادى. بۇگىندە ەلىمىزدەگى كينوتەاترلاردىڭ جارتىسى وسى جۇيەگە قوسىلدى. بۇل باعىتتا جۇمىس جالعاسۋدا. ە-كينو جۇيەسى نارىقتاعى ناقتى جاعدايدى اشىق كورۋگە جول اشادى.
ناقتى وزگەرىس ءوز ناتيجەسىن بەرە باستاعان. سونىڭ ناتيجەسىندە, مەملەكەت قولداۋىنا يە بولعان 57 جوبانىڭ 40-ى – جاس رەجيسسەرلەردىڭ جۇمىسى. ال قازاق تىلىندەگى فيلمدەردىڭ ۇلەسى بۇگىندە 75 پايىزعا جەتىپ وتىر.
كينەماتوگرافيا تۋرالى زاڭعا ەنگىزىلگەن جاڭا تۇزەتۋلەر مەملەكەتكە قارجىلاندىرۋدىڭ 30 پايىزىن تىكەلەي «قازاقفيلم» كينوستۋدياسىنا بولۋگە جول اشتى. بۇل – ۇلتتىق كينو يندۋسترياسىنىڭ كوشباسشىسى ءۇشىن ۇلكەن مۇمكىندىك.
«بۇگىندە «قازاقفيلم» بەلسەندى دامىپ, سەرىكتەستەرمەن بىرلەسىپ جۇمىس ىستەپ, تەحنيكالىق مۇمكىندىكتەرىن ارتتىرىپ كەلەدى. كينوستۋديا ۇلتتىق كينو قورىن تسيفرلاندىرۋ جانە قالپىنا كەلتىرۋ جۇمىستارىن جۇرگىزۋدە. سونىمەن بىرگە «قازاقانيماتسيا» جوباسى ىسكە قوسىلىپ, ەلىمىزدە العاش رەت انيماتسيانى كرەاتيۆتى يندۋستريانىڭ بولىگى رەتىندە دامىتۋ تۇجىرىمداماسى ازىرلەندى. ءبىزدىڭ مىندەتىمىز – شىعارماشىلىق ەركىندىككە جاعداي جاساۋ جانە اۆتور مەن كورەرمەن اراسىندا سەنىمدى ديالوگ ورناتۋ.
بارلىق ۇيىمداستىرۋشىلىق جانە تەحنيكالىق شەشىم اشىق ءارى زاڭ اياسىندا قابىلدانادى. قازىر ۇلتتىق كينونى قولداۋ ورتالىعىن «قازاقفيلم» كينوستۋدياسىمەن بىرىكتىرۋ ماسەلەسى قاراستىرىلىپ جاتىر. بۇل – ءوندىرىس ۇدەرىسىن جەڭىلدەتىپ, تيىمدىلىكتى ارتتىرۋعا باعىتتالعان قادام. مادەنيەت جانە اقپارات مينيسترلىگى الداعى ۋاقىتتا دا وتاندىق كينونى دامىتۋ باعىتىنداعى جۇمىسىن جالعاستىرا بەرەدى», دەيدى ايدا عالىمقىزى.
سونىمەن قاتار مينيستر قوعام تاراپىنان تۇسەتىن سۇراقتارعا توقتالدى. ماسەلەن, جاقىندا كوپ تالقىلانعان تاقىرىپتاردىڭ ءبىرى – رەجيسسەر رۇستەم وماروۆتىڭ «وفسايد» اتتى سەريالىنىڭ YouTube جەلىسىنەن ءوشىرىلىپ, اۆتوردىڭ Instagram پاراقشاسىنىڭ بۇعاتتالۋى. «بۇل جاعدايدىڭ جەكە, ياعني ناقتى ءبىر اككاۋنتقا قاتىستى جايت ەكەنىن اتاپ وتكىم كەلەدى. مۇنداي كەزدە اككاۋنت يەسى ءوز بەتىمەن ونلاين-پلاتفورمانىڭ اكىمشىلىگىنە حابارلاسىپ, پاراقشانى قالپىنا كەلتىرۋ جانە سەبەپتەرىن انىقتاۋ تۋرالى ءوتىنىش بەرە الادى.
وتاندىق ونلاين-سەريالدار مەن بەينەجوبالاردا ادەپسىز سوزدەردىڭ قولدانىلۋىنا بايلانىستى دا سۇراقتار كوتەرىلدى. بۇل رەتتە ەسكەرەتىن جايت – قازىرگى زاڭنامادا مۇنداي ارەكەت ءۇشىن ناقتى جاۋاپكەرشىلىك بەلگىلەنگەن. ياعني قوعامدىق ورىنداردا ادەپسىز ءسوز ايتۋ — ۇساق بۇزاقىلىق دەپ تانىلادى. ول ءۇشىن 20 ايلىق ەسەپتىك كورسەتكىش كولەمىندە ايىپپۇل سالۋ, 20-دان 60 ساعاتقا دەيىن قوعامدىق جۇمىستارعا تارتۋ نەمەسە 5-تەن 15 تاۋلىككە دەيىن اكىمشىلىك قاماۋعا الۋ جازاسى قاراستىرىلعان. قۇزىرلى ورگاندار ءاربىر وسىنداي جاعدايدى جەكە قاراستىرادى.
بيىل جىل باسىنان بەرى ينتەرنەتتەگى مونيتورينگ ناتيجەسىندە وسىنداي 50-دەن استام قۇقىقبۇزۋشىلىق انىقتالىپ, ولاردىڭ بارلىعى بويىنشا ىشكى ىستەر مينيسترلىگىنە ءتيىستى حابارلاما جولداندى» دەدى مينيستر.
ءسوزىن تۇيىندەي كەلە سالا باسشىسى مينيسترلىك ءاردايىم اشىقتىقتى, شىعارماشىلىق ەركىندىكتى جانە كورەرمەنگە دەگەن جاۋاپكەرشىلىكتى باستى ماقسات ەتەتىنىن اتاپ ءوتتى. سونىمەن قاتار كينو مەن مەديا سالاسىنىڭ دامۋى قوعامعا, مادەنيەتكە جانە بۇقارانى ورتاق قۇندىلىقتارعا قۇرمەتپەن قاراۋعا نەگىزدەلۋگە ءتيىس ەكەنىنە توقتالدى.
دايىنداعان –
جولدىباي بازار,
«Egemen Qazaqstan»
