كۇرەستىڭ وسى تۇرىنەن شيرەك عاسىردا ەلىمىزگە العاشقى التىندى اكەلگەن الەم چەمپيونىن جەڭىسىمەن قۇتتىقتاۋعا ارنالعان جيىنعا وبلىستىڭ زيالى قاۋىم وكىلدەرى, قۇقىق قورعاۋ ورگاندارىنىڭ باسشىلارى, سپورت سالاسىنىڭ ارداگەرلەرى قاتىستى. ايماق باسشىسى ايدوستىڭ جەڭىسى بارشا ەلىمىزدىڭ مارتەبەسىن ارتتىرعانىن اتاپ ءوتتى.
– ايدوس سۇلتانعالي ۇلى حورۆاتيا استاناسى زاگرەب قالاسىندا وتكەن ەرەسەكتەر اراسىنداعى الەم چەمپيوناتىندا قازاق سپورتى تاريحىنداعى تەڭدەسسىز جەتىستىككە قول جەتكىزدى. گرەك-ريم كۇرەسىنەن الەم چەمپيوناتىنىڭ التىنىن ەلىمىزگە سوڭعى رەت 1999 جىلى گرەكيانىڭ افينا قالاسىندا وتكەن ءدۇبىرلى دودادا 63 كەلى سالماقتا بەلدەسكەن محيتار مانۋكيان الىپ كەلگەن ەكەن. شيرەك عاسىردان كەيىن وسى جەتىستىكتى قايتالاپ, جەڭىستىڭ ەڭ بيىك تۇعىرىنا كوتەرىلگەن چەمپيونىمىزدى مەملەكەت باسشىسى ارنايى قۇتتىقتاپ, «ايدوس – گرەك-ريم كۇرەسىنەن وسى عاسىرداعى تۇڭعىش جەڭىمپاز», دەپ جوعارى باعالادى. بۇل جەڭىس – جاس بالۋاندارىمىزعا ۇلگى-ونەگە, ەلىمىزدىڭ سپورتىنا سەرپىن بەرەتىن تاماشا تابىس. ايدوس باۋىرىمىزدىڭ جەڭىسىنە باپكەرى عابيدەن رايىمبەك ۇلىنىڭ سىڭىرگەن ەڭبەگى زور. ول تەك سپورتشىنى ەمەس, ماقساتىنان اينىمايتىن مىقتى ازاماتتى تاربيەلەپ شىعاردى. شاكىرتىنىڭ ءاربىر جەڭىسى – باپكەرىنىڭ ماڭداي تەرىنىڭ جەمىسى. قوس باتىرىمىزعا قانداي قۇرمەت كورسەتسەك تە لايىقتى. ايدوسقا بۇعان دەيىن دە مەملەكەت, وبلىس تاراپىنان قولداۋ كورسەتىلىپ كەلەدى. وتكەن جىلى ەلىمىزدىڭ, ءوڭىرىمىزدىڭ جاناشىر ازاماتى باقداۋلەت ەركىنبەك ۇلىنىڭ دەمەۋشىلىگىمەن اۆتوكولىك تابىس ەتىلدى. بۇدان بولەك, اي سايىن 1 ملن تەڭگە مەملەكەتتىك ستيپەنديا بەرىلەدى. بۇل قولداۋ ءارى قاراي جالعاسادى. بۇگىنگى مەرەيلى ساتتە بارشا سىر جۇرتشىلىعىنىڭ اتىنان ايدوسقا جاڭا اۆتوكولىك پەن پاتەر كىلتتەرىن تابىستاپ, باپكەرى عابيدەنگە دە جاڭا پاتەر بەرۋ تۋرالى شەشىم قابىلدادىق, – دەدى وبلىس باسشىسى.
باسقوسۋدا گرەك-ريم كۇرەسىنەن ەلىمىزدىڭ ەڭبەك سىڭىرگەن جاتتىقتىرۋشىسى عابيدەن رايىمبەك پەن الەم چەمپيونى ايدوس سۇلتانعالي ۇلى وزدەرىنە كورسەتىلگەن قۇرمەتكە ريزاشىلىق ءبىلدىردى.
قىزىلوردا
