ەلىمىزدە ءدارى-دارمەك باعاسى ارزاندايدى

«باعا قالىپتاستىرۋدىڭ جاڭارتىلعان تەتىگىن ەنگىزۋ باعانىڭ اشىقتىعىن جانە ءدارى-دارمەك قۇنىنىڭ بولجامدىلىعىن ارتتىرۋعا باعىتتالعان», دەپ ناقتىلادى مينيسترلىك.

قازىرگى ۋاقىتتا 4 994 ساۋدالىق اتاۋداعى ءدارى-دارمەككە شەكتى باعالار بەكىتىلگەن. ال تاعى 1 707 رەتسەپتىسىز ساتىلاتىن پرەپارات نارىقتىق باعامەن ساۋدالانعانىمەن, ۋاكىلەتتى ورگاننىڭ باقىلاۋىندا قالادى.

باعا مونيتورينگى

2025 جىلى مەديتسينالىق جانە فارماتسەۆتيكالىق باقىلاۋ كوميتەتى ەلىمىزدىڭ 20 وڭىرىندە ءدارى-دارمەك باعاسىنا مونيتورينگ جۇرگىزگەن.

زەرتتەۋ اياسىندا سۇرانىسى جوعارى 5 فارماكولوگيالىق توپقا جاتاتىن 50 ءدارى ءتۇرى قاراستىرىلدى:

ۆيرۋسقا قارسى,

قابىنۋعا قارسى,

باكتەرياعا قارسى,

جۇرەك-قان تامىر جۇيەسىنە ارنالعان,

اسقازان-ىشەك اۋرۋلارىن ەمدەۋگە ارنالعان دارىلەر.

«تالداۋ ناتيجەسى بويىنشا قىركۇيەكتە ماۋسىممەن سالىستىرعاندا دارىلەردىڭ 34 پايىزىنىڭ (ورتا ەسەپپەن 7,8%) باعاسى تومەندەگەن, ال قازاندا – 50 پايىزىنىڭ (ورتا ەسەپپەن 11,1%) ارزانداۋى بايقالدى», دەلىنگەن مينيسترلىكتىڭ حابارلاماسىندا.

ازاماتتار ءدارى-دارمەك ساتۋ كەزىندە باعا بۇزۋشىلىقتارىن DariKZ جانە Naqty Onim ءموبيلدى قوسىمشالارى ارقىلى نەمەسە كوميتەتتىڭ وڭىرلىك دەپارتامەنتتەرىنە جۇگىنۋ ارقىلى حابارلاي الادى.

ايتا كەتەلىك, قازان ايىنىڭ سوڭىندا دەنساۋلىق ساقتاۋ مينيسترلىگى كەيبىر دارىلەر مەن مەديتسينالىق قىزمەتتەردى قوسىلعان قۇن سالىعىنان (ققس) بوساتۋدى ۇسىنعان بولاتىن. ءتيىستى قاۋلى جوباسى «اشىق نقا» پورتالىندا جاريالانعان.