سۋرەتتى تۇسىرگەن – ەرلان ومار, «EQ»
پرەزيدەنت «قازاقستان – اكادەميالىق ءبىلىم ايماعى» اتتى ستراتەگيالىق فورۋمدا سويلەگەن سوزىندە جاساندى ينتەللەكتىنىڭ ەلىمىز ءۇشىن ەڭ باستى باعىت ەكەنىن تاعى دا اتاپ ءوتتى.
– قازاقستاندا جاساندى ينتەللەكتىنى دامىتۋ جانە باسقا سالالارمەن جان-جاقتى ينتەگراتسيالاۋ ەڭ جوعارى ستراتەگيالىق باسىمدىق سانالادى. جي ساراپشىلارى مەن ماماندارىن دايارلاۋ ىسىنە ايرىقشا ءمان بەرىپ وتىرمىز. وسى ماقساتتا جىل باسىنان بەرى «AI Sana» باعدارلاماسىن ىسكە قوستىق. 540 مىڭنان استام ستۋدەنت وقۋ كۋرسىنان ءوتتى. بۇدان بولەك, جاساندى ينتەللەكت بارلىق مەكتەپ پەن ۋنيۆەرسيتەتكە مىندەتتى كۋرس رەتىندە ەنگىزىلدى. ەلىمىزدە جاساندى ينتەللەكت ۋنيۆەرسيتەتىن اشۋ ءۇشىن دايىندىق جۇمىستارى جۇرگىزىلىپ جاتىر, –دەدى مەملەكەت باسشىسى.
سونداي-اق «ChatGPT» نەگىزىندە ءبىلىم بەرۋ قۇرالدارىن ەنگىزۋ جونىندەگى قاناتقاقتى جوبانى ءبىلىم سالاسىنداعى تسيفرلىق ترانسفورماتسيا رەتىندە تانىستىردى.
– ناتيجەسىندە, قازاقستان «ChatGPT» نەگىزىندە ءبىلىم بەرۋ قۇرالدارىن ەنگىزۋ جونىندەگى قاناتقاقتى جوبانى جۇزەگە اسىرا باستادى. اتالعان باستامالار ارقىلى وتاندىق ءبىلىم سالاسىندا جاساندى ينتەللەكت الەۋەتىنە سۇيەنە وتىرىپ, كەشەندى تسيفرلىق ترانسفورماتسيا جاسالىپ جاتىر, – دەدى قاسىم-جومارت توقاەۆ.
قازاق–امەريكا ۋنيۆەرسيتەتىنىڭ پرەزيدەنتى اسىلبەك يساقوۆتىڭ ايتۋىنشا, بۇگىندە ەلىمىز «OpenAI» كومپانياسىمەن ىنتىماقتاستىق ورناتۋ ماقساتىندا بەلسەندى جۇمىس جۇرگىزىپ جاتىر.
– «OpenAI» تاراپىنان ەلىمىزگە ۇلكەن قىزىعۋشىلىق بار. كومپانيا تەحنولوگيالارىن ءبىلىم سالاسىندا سىناقتان وتكىزۋگە دايىن جانە ەلىمىزدى قاناتقاتى الاڭ رەتىندە تاڭداۋعا ىقىلاس ءبىلدىرىپ وتىر. ءبىز مۇنداي جاھاندىق سەرىكتەسپەن بىرلەسىپ جۇمىس ىستەۋگە دايىنبىز, – دەيدى ول.
قاناتقاقتى جوبا اياسىندا «ChatGPT» ءبىلىم بەرۋ ۇدەرىسىنە ەنگىزىلىپ, ستۋدەنتتەردىڭ وقۋ تيىمدىلىگىن ارتتىرۋ ماقسات ەتىپ قويىلدى. جوبانىڭ تيىمدىلىگى ستۋدەنتتەردىڭ ءبىلىم ساپاسى ارقىلى باعالانباق.
– ءاربىر ۋنيۆەرسيتەت ءوز ەرەكشەلىگىنە قاراي «ChatGPT» سياقتى قۇرالداردى ساباق بارىسىنا پايدالانۋ جولدارىن قاراستىرىپ جاتىر. بۇل ستۋدەنتتەر ءۇشىن وقۋ ۇدەرىسىن بارىنشا ىڭعايلى ءارى ناتيجەلى ەتۋگە مۇمكىندىك بەرەدى. «ChatGPT» قولدانىلعاننان كەيىن ستۋدەنتتەردىڭ ءبىلىم دەڭگەيى تەرەڭدەپ, ويلاۋ قابىلەتى ارتا ما, جوق پا باقىلاناتىن بولادى. ويتكەنى جاساندى ينتەللەكت وقۋ ماتەريالىن ءتيىمدى مەڭگەرۋگە, اقپاراتتى جىلدام وڭدەۋگە, تالداۋ جاساۋعا مۇمكىندىك بەرەدى, –دەيدى ا.يساقوۆ.
وسىلايشا, ەلىمىزدە «ChatGPT» نەگىزىندەگى قاناتقاقتى جوبا ءبىلىم جۇيەسىنىڭ تسيفرلىق ترانسفورماتسياسىنداعى ماڭىزدى قادام بولماق. ساراپشىلاردىڭ ايتۋىنشا, بۇل باستاما ەلدىڭ ءبىلىم ساپاسىن جاڭا دەڭگەيگە كوتەرىپ, ستۋدەنتتەرگە زاماناۋي تەحنولوگيامەن جۇمىس ىستەۋ مادەنيەتىن قالىپتاستىرۋعا جول اشادى.
