تسيفرلىق دامۋدىڭ ىرگەتاسى

ورتالىقتىڭ قۇرامىندا 1700-دەن استام IT-كومپانيا بار, سونىڭ ىشىندە 450-ءى – شەتەلدىك. «Astana Hub» باسقارۋشى ديرەكتورى تاڭات وسكەمباەۆتىڭ ايتۋىنشا, پرە­زيدەنت تاپسىرماسىن ورىنداۋ ءۇشىن ولار ءۇش نەگىزگى باعىتقا باسىمدىق بەرىپ وتىر.

– ءبىزدىڭ ءبىرىنشى باعىتىمىز – تالانتتاردى قولداۋ. مەملەكەت باسشىسىنىڭ تاپسىرماسىنا سايكەس, استانادا بيىل «Alem.ai» حالىقارالىق جاساندى ينتەللەكت ورتالىعى اشىلادى. بۇل ورتالىقتا «Tomorrow School» جاساندى ينتەللەكت مەكتەبى, «TUMO» تەحنولوگيالار ورتالىعى, ستارتاپ-كامپۋس, R&D-زەرتحانالار جانە «AI-driven Government» ايماعى ورنالاسادى. نەگىزگى ماقسات – ەلىمىزدى جاساندى ينتەللەكتىگە باعىتتالعان مەملەكەتكە اينالدىرۋ. «Alem.ai» عىلىم, ونەركاسىپ, كرەاتيۆتى يندۋستريا جانە مەملەكەتتىك قىزمەت سالالارىندا جاڭا تەحنولوگيالاردى دامىتۋعا سەرپىن بەرەدى. جىل سايىن 10 مىڭعا جۋىق دارىندى ماماندى تارتۋ, 1000-نان استام جي مامانىن دايارلاۋ, 100-گە جۋىق ستارتاپ ىسكە قوسۋ جانە كەمىندە 10 عىلىمي زەرتتەۋ جۇرگىزۋ جوسپارلانعان. بۇل ەلىمىزدىڭ جي شەشىمدەرىن ەكسپورتتاۋعا, ەلدىڭ تەحنولوگيالىق جانە ەكونوميكالىق دامۋىنا جاڭا سەرپىن بەرۋگە, استانانى ورتالىق ازياداعى جاساندى ينتەللەكت تەحنولوگيالارىنىڭ ورتالىعىنا اينالدىرۋعا جول اشادى. ەكىنشى باعىت ستارتاپتاردى قول­داۋ. «Astana Hub» ستارتاپتارعا يدەيادان باستاپ, حالىقارالىق دەڭگەيگە دەيىنگى جولدى وتۋگە جاعداي جاسايدى. ءبىز كوماندالاردى بارلىق كەزەڭدە قولدايمىز. ولارعا سالىقتىق جەڭىلدىكتەر, ءبىلىم بەرۋ مەن اكسەلەراتسيا­لىق باعدارلامالارعا قاتىسۋ, حالىقارالىق نارىققا شىعۋ, ينۆەستورلار مەن مىقتى IT-قاۋىمداستىققا قول جەتكىزۋ مۇمكىندىگىن بەرەمىز, – دەيدى ول.

قازىرگى ۋاقىتتا «Astana Hub»-تا بىرنەشە باعدارلاما ىسكە اسىپ جاتىر:

• «Silkway Accelerator» – «Google for Startups»-پەن بىرگە جۇزەگە اسادى. 1300-دەن استام ءوتىنىمنىڭ ىشىنەن 62 ستارتاپ تاڭدالىپ, قاتىسىپ جاتىر;
• «Hero Training» – كرەمني القابىندا «Draper University»-مەن سەرىكتەستىكتە وتەدى. 2023 جىلدان بەرى 37 ستارتاپ قاتىستى, ولاردىڭ ءبىرى «CITIX» تيم درەيپەردەن $1 ملن ينۆەستيتسيا تارتقان;
• «Startup Garage» – 786 جوبانى باستاپقى كەزەڭدە قولدادى, ولاردىڭ 259-ى وقۋ باعدارلاماسىن ءساتتى اياقتاپ, تۇلەكتەردىڭ جالپى ساتىلىم كولەمى 495 ملن تەڭگەگە جەتتى;
• «AI’preneurs» – جاساندى ينتەللەكتىگە ارنالعان فلاگ­ماندىق باعدارلاما. 2024 جىلدان بەرى 612 ءوتىنىم قابىلدانىپ, العاشقى لەگىندەگى ستارتاپتار $350 000 استام ينۆەستيتسيا تارتتى.

سونىمەن قاتار «Astana Hub» پەن «Silkroad Innovation Hub» جا­ساندى ينتەللەكت جانە تسيفرلىق دامۋ مينيستر­لىگى, دۇنيەجۇزىلىك بانك جانە «FPIP» جوباسىنىڭ قولداۋىمەن «AlchemistX & Silicon Valley Residency Program» باعدارلاماسىن ىسكە قوستى.

– بۇل 5 ايلىق قارقىندى جوبا كرەمني القابىندا ءوتىپ, ستارتاپتارعا اقش نارىعىنا شىعۋعا كومەكتەسەدى. العاشقى كەلىسىمشارتتار جاساۋعا, ينۆەستيتسيا تارتۋعا, مەنتورلىق قولداۋعا, زەرتتەۋلەر جۇرگىزۋگە, سونداي-اق تۇرعىن ءۇي مەن حالىقارالىق قاۋىمداستىققا قول جەتكىزۋگە مۇمكىندىك بەرەدى. بۇدان بولەك, قازاقستان اقش-تا («SilkRoad Innovation Hub», پالو التو), ۇلىبريتانيادا (لوندون – «Eurasian Hub»), ءباا-دە (دۋباي – «Tumar Innovation Hub»), قىتايدا (شانحاي – «Khan-Tengri Innovation Hub») جانە ساۋد ارابياسىندا (ەر-رياد – «Al-Farabi Innovation Hub») حالىقارالىق ورتالىقتار اشىپ, تسيفرلىق قىزمەتتەر ەكسپورتىن قولداپ, ورتالىق ازيانى جاھاندىق ەكونوميكاعا ينتەگراتسيالاپ جاتىر, – دەيدى ت.وسكەنباەۆ.

«Astana Hub»-تىڭ ءۇشىنشى باعىتى – ستارتاپتاردى ناقتى سالاعا ەنگىزىپ, بۇكىل قوعام ءۇشىن ءتيىمدى شەشىم ۇسىنۋ. وسى رەتتە «Astana Hub» ارنايى تەحنو­لوگيالىق تاپسىرمالار پلات­فورماسىن ىسكە قوسقان. مۇن­دا كومپانيالار, جەر قوي­ناۋىن پايدالانۋشىلار جانە مەملەكەتتىك ورگاندار وزدە­رىنە قاجەتتى تەحنولوگيالىق شەشىمدەردى جاريالايدى. ولار­دى ستارتاپتار, IT-كومپانيالار, اككرەديتتەلگەن عىلىمي ۇيىم­دار جانە جوبالىق كوماندالار جۇزەگە اسىرا الادى. قازىردە تاۋ-مەتاللۋرگيا كەشەنى سەكتورىنداعى ءىرى كومپانيالار ءوندىرىس ۇدەرىستەرىن تسيفر­لاندىرۋ مەن يندۋستريا 4.0 ەلەمەنتتەرىن ەنگىزۋگە قاتىستى تالاپ ەتىلەتىن مىندەتتەرىن وسى الاڭدا جاريالاپ وتىر.

– «Astana Innovations Accelerator» باعدارلاماسى قالا تۇرعىندارىنىڭ ءومىر ساپاسىن ارتتىرۋعا باعىتتالعان شەشىمدەر ازىرلەيدى. جوبالار سىناقتان ءوتىپ, مەگاپوليسكە بەيىمدەلەدى. بۇگىندە وتاندىق ستارتاپتار ورتالىق ازيا, تاياۋ شىعىس, ەۋروپا نارىعىنا شىعىپ جاتىر. «Astana Hub» حالىقارالىق دەڭگەيدە تانىمال برەندكە اينالدى. ەڭ باس­تىسى, مەملەكەتتىك قىزمەتتەردى اۆتوماتتاندىرىپ, جاساندى ينتەللەكتىنى ەنگىزىپ, ءوندىرىس تيىمدىلىگىن ارتتىرىپ ەل ىشىندە تسيفرلىق ەكونوميكانىڭ دامۋىنا ۇلەس قوسىپ جاتىر. مەم­لەكەت, بيزنەس جانە تەحنو­لو­گيالىق قاۋىمداستىق بىرىگىپ جۇمىس ىستەسە, ەلىمىز تولىق­قان­دى تسيفرلىق ۇلتقا اينالۋ ماقسا­تىنا جەتەتىنىنە سەنىمدىمىز. «Astana Hub» وسى ۇدەرىستىڭ نەگىزگى درايۆەرى بولىپ قالا بەرمەك, – دەيدى ورتالىق ديرەكتورى.

جالپى, بۇگىندە جاساندى ينتەللەكت مەملەكەتتەردىڭ تەحنولوگيالىق جانە ەكونومي­كالىق دامۋىنىڭ باستى فاكتورى بولىپ وتىر. ەلىمىز دە وسى باعىتتا جاڭا بۋىن ماماندارىن دايارلاپ, جاساندى ينتەللەكت تەحنولوگيالارىن نەگىزگى سالالارعا ەنگىزىپ, وتاندىق جوبالاردى جاھاندىق نارىققا شىعارۋعا بەلسەنە كىرىستى.