سۋرەتتەردى تۇسىرگەن – جۇماباي مۇسابەكوۆ
جاڭا ءۇي بالپىق بي اۋىلىندا بوي كوتەردى. 20 پاتەرلى جالدامالى تۇرعىن ءۇيدىڭ كىلتى ورتالىقتان قاتىناپ جۇمىس ىستەيتىن, جالدامالى پاتەردە تۇراتىن جاس ماماندارعا تابىستالدى. ولاردىڭ قاتارىندا 15 دارىگەر, 4 مۇعالىم, 1 پوليتسيا قىزمەتكەرى بار. كەيىنگى ءۇش جىلدا اۋدانعا 55 دارىگەر كەلىپ, ەڭبەك ەتۋدە. مەملەكەت تاراپىنان ولارعا بارىنشا جاعداي جاسالعان. 10 ملن تەڭگەگە دەيىن كوتەرمە جاردەماقى بەرىلىپ, «ديپلوممەن – اۋىلعا!» باعدارلاماسى اياسىندا قارجىلاي كومەك كورسەتىلگەن. پاتەرلەردىڭ دەنى وتباسى قۇرامىنا قاراي ۇلەستىرىلدى. قونىستوي يەلەرىنىڭ قۋانىشى ەرەكشە, ەندى ولار تۇراقتى باسپانامەن قامتىلىپ, ءوز قىزمەتىن الاڭسىز اتقارا الادى.
ءوڭىر باسشىسى بەيبىت يساباەۆ جۇمىس ساپارى كەزىندە جاڭا تۇرعىن ءۇيدىڭ ساپاسىمەن, اۋماعىنىڭ اباتتاندىرىلۋىمەن تانىسىپ, تۇرعىندارمەن كەزدەستى. اكىمنىڭ ايتۋىنشا, بۇل جوبا اۋدانداعى مامان تاپشىلىعىن شەشۋدە ماڭىزدى ءرول اتقارادى.
– كەيىنگى ءبىر جىلدىڭ ىشىندە اۋدانعا 20-عا جۋىق دارىگەر كەلدى. سول ورايدا ولاردىڭ تۇرمىس جاعدايىن جاقسارتۋ كۇن ءتارتىبىنىڭ الدىڭعى قاتارىنا شىقتى. ەندى, مىنە, دارىگەرلەر مەن مۇعالىمدەر وزدەرىنىڭ قىزمەتتىك پاتەرىنە يە بولدى. بۇل – ولاردىڭ ەڭبەگىنە كورسەتىلگەن قۇرمەت. الداعى ۋاقىتتا شاعىن اۋداننىڭ جان-جاقتى دامۋىنا باسا كوڭىل بولىنەدى. جاسىل جەلەكتەردى سۋاراتىن اۆتوماتتى جۇيە ورناتۋ, ينفراقۇرىلىمدى جاقسارتۋ جوسپاردا بار. بۇدان بولەك, تاعى 7–8 كوپقاباتتى تۇرعىن ءۇي سالۋعا مۇمكىندىك بار, – دەدى وبلىس اكىمى.
جاڭا باسپانانىڭ يگىلىگىن كورىپ وتىرعان ماماننىڭ ءبىرى – اۋداندىق اۋرۋحانانىڭ نەۆروپاتولوگى نۇرگۇل بۇحاروۆا.
– مەن وسى اۋداندا دۇنيەگە كەلدىم. الماتىدا ءبىلىم الىپ, ءبىراز جىل سول قالادا ەڭبەك ەتتىم. كەيىن تۋعان جەرگە ورالدىم, وعان ەش وكىنبەيمىن. ەندى, مىنە, تۇرعىن ءۇي ماسەلەسى دە شەشىلدى. بۇل – اۋىلعا كەلگەن دارىگەرلەرگە جاسالعان ۇلكەن قولداۋ, – دەيدى ول.
جاڭا ءۇيدىڭ تاعى ءبىر تۇرعىنى – اۋداندىق پوليتسيا ءبولىمى تابيعاتتى قورعاۋ توبىنىڭ ينسپەكتورى ەلامان داۋلەتوۆ. ول 2018 جىلدان بەرى قۇقىق قورعاۋ سالاسىندا قىزمەت ەتىپ كەلەدى. بۇعان دەيىن ءوز قاراجاتىنا پاتەر جالداپ كەلگەن.
– مەنىڭ قىزمەتىم تۇرعىن ءۇي جالداۋ اقىسىنا وتەماقى تولەنەتىن تىزىمگە كىرمەيدى. سول سەبەپتى پاتەردى ءوزىم جالداپ كەلدىم. جۇبايىم مەكتەپ-گيمنازيادا مۇعالىم. ءۇش بالامىز بار. جاڭا پاتەرگە يە بولۋ – زور مارتەبە. مەملەكەتتىڭ وسىنداي قامقورلىعىن سەزىنۋ ءبىزدى العا ىنتالاندىرادى, – دەيدى پوليتسيا قىزمەتكەرى.
اعىلشىن ءتىلى ءپانىنىڭ مۇعالىمى ءمولدىر جەڭىس تە قۋانىشىن جاسىرا المادى.
– «ب.قۇنداقباەۆا اتىنداعى №1 ورتا مەكتەپتە 2018 جىلدان بەرى جۇمىس ىستەيمىن. بۇرىن تالدىقورعاندا قىزمەت ەتتىم, كەيىن اۋىل مەكتەبىنە كەلۋدى ءجون كوردىم. ەڭبەك ءوتىلىم – 12 جىل. كوپبالالى انامىن. وتباسىمىزبەن ءوز باسپانامىزعا يە بولىپ, قۋانىشقا كەنەلىپ جاتىرمىز, – دەدى پەداگوگ.
جاڭا ءۇيدىڭ قۇرىلىسى بيىلعى ءساۋىر ايىندا باستالىپ, جوسپارلى مەرزىمدە تولىق اياقتالعان. جوبانى «جاركەنت العىر» قۇرىلىس كومپانياسى جۇزەگە اسىرعان.
– تۇرعىن ۇيدە 10 ءۇش بولمەلى, 5 ەكى بولمەلى, 5 ءبىر بولمەلى پاتەر بار. ۇيمەن قاتار ينجەنەرلىك جەلىلەردى تارتىپ, اينالاسىن اباتتاندىردىق. تۇرمىس-تىرشىلىككە قاجەت بارلىق جۇيە تولىق ىسكە قوسىلدى, – دەيدى كومپانيا ديرەكتورى جالعاس التىنبەكوۆ.
كوكسۋ اۋدانىندا كەيىنگى جىلدارى تۇرعىن ءۇي قۇرىلىسى ايتارلىقتاي قارقىن العان. 2022–2024 جىلدارى اۋدان كولەمىندە 175 ءۇي پايدالانۋعا بەرىلگەن. بيىل 110 وتباسى باسپانالى بولدى. ناتيجەسىندە, تۇرعىن ءۇي كەزەگى 5,8%-عا قىسقاردى.
ايتا كەتۋ كەرەك, بيىلعى24 مامىردان باستاپ تۇرعىن ۇيگە كەزەككە قويۋ, باسپانا بەرۋ فۋنكتسيالارى جەرگىلىكتى اتقارۋشى ورگانداردان «وtbasybank»-كە بەرىلگەن. بۇل شارا باسپانا ماسەلەسىن شەشۋ ءىسىن اشىق ءارى ءتيىمدى ەتۋگە باعىتتالعان. كوكسۋ اۋدانىنداعى جاڭا 20 پاتەرلى تۇرعىن ءۇي – اۋىلعا كەلگەن بىلىكتى كادرلاردى قولداۋدىڭ ايقىن كورىنىسى. بۇل باستاما تەك الەۋمەتتىك ماسەلەنى شەشۋ ەمەس, سونىمەن بىرگە اۋىلدىڭ دامۋىنا سەرپىن بەرەتىن ماڭىزدى قادام. دارىگەر مەن مۇعالىمگە جاعداي جاسالسا, اۋىلدىڭ ەڭسەسى كوتەرىلەدى. اۋىل ەڭسەسىن تىكتەسە, ەل ىرگەسى بەكي تۇسەدى.
