سۋرەتتى تۇسىرگەن – ءالي عالىم
ءماجىلىس سپيكەرى ەرلان قوشانوۆتىڭ توراعالىعىمەن وتكەن جيىندا «قارىزسىز قوعام», «اكىمدەر مەكتەبى» جانە «اۋىل اماناتى» پارتيالىق جوبالارىنىڭ ناتيجەلەرى مەن مۇمكىندىكتەرى تالقىلاندى. قازىرگى تاڭدا جۇزدەگەن مىڭ ادام پارتيانىڭ بىرەگەي پلاتفورماسى ارقىلى قولداۋ الىپ وتىر.
مەملەكەت باسشىسى جولداۋىندا «قارىزسىز قوعام» جوباسىنىڭ باستى ماقساتى – تەك قارىزدى ازايتۋ ەمەس, ازاماتتاردىڭ تۇراقتى تابىسقا قول جەتكىزۋىن قامتاماسىز ەتۋ ەكەنىن ايتتى. وسىعان بايلانىستى پارتيا ازاماتتارعا قارجىلىق قيىندىقتان شىعۋعا كومەكتەسىپ قانا قويماي, ولاردى جۇمىسپەن قامتىپ, جەكە ءىسىن باستاۋىنا جاعداي جاسايدى.
«ەڭ باستىسى – ادامداردىڭ تەك قازىرگى ماسەلەسىن شەشۋ ەمەس, ءاربىر ازامات ناقتى قولداۋ كورىپ, اياققا تۇرا الاتىن جۇيە قالىپتاستىرۋ. «AMANAT» پارتياسىنىڭ سەرۆيستىك مودەلى ءوز تيىمدىلىگىن دالەلدەپ, پرەزيدەنتتىڭ ادىلەتتى قازاقستاندى قۇرۋ باعىتىن جۇزەگە اسىرۋدا ناقتى قۇرالعا اينالدى. مەملەكەت باسشىسىنىڭ بارلىق رەفورماسى حالىقتىڭ ءال-اۋقاتىن ارتتىرۋعا جانە ەلىمىزدىڭ دامۋىنا باعىتتالعان. وسى تۇرعىدان العاندا, پارتيالىق جوبالار ءار ازاماتتىڭ لايىقتى تابىس تاۋىپ, ساپالى الەۋمەتتىك قىزمەت الىپ, ەرتەڭگى كۇنگە سەنىممەن قاراي الۋىنا جاعداي جاساۋ ءۇشىن جۇمىس ىستەيدى», دەدى پارتيا توراعاسى.
ەرلان قوشانوۆ پارتيالىق جوبالار ءبىرتۇتاس جۇيە رەتىندە جۇمىس ىستەۋگە ءتيىس ەكەنىن اتاپ ءوتتى. ياعني زاڭگەرلىك كومەك, وقىتۋ كۋرسى مەن جۇمىس ورىندارىن قۇرۋ قادامدارى ءوزارا بايلانىسىپ, ءبىر-ءبىرىن تولىقتىرىپ تۇرۋى قاجەت. ونىڭ ايتۋىنشا, ءدال وسىنداي كەشەندى ءتاسىل قارجىلىق قيىندىقتاردىڭ سالدارىن جويۋعا عانا ەمەس, سونىمەن بىرگە ازاماتتاردىڭ اياققا تۇرىپ, ءوز بەتىنشە لايىقتى ءومىر سۇرە الاتىن ۋاقىتقا دەيىن ادامدارعا سۇيەنىش بولۋعا مۇمكىندىك بەرەدى.
جوبالىق كەڭسەنىڭ باسشىلارى جۇمىس ناتيجەسىن ۇسىنىپ, پارتيانىڭ سەرۆيستىك مودەلىنىڭ اياسىن كەڭەيتۋ بويىنشا الداعى جوسپاردى ايقىندادى.
«قارىزسىز قوعام» جوباسىنىڭ اتقارۋشى ديرەكتورى ولجاس ورداباەۆتىڭ دەرەگى بويىنشا, بيىلدان باستاپ 770 مىڭنان استام ادامعا قارىزدارىن قايتا قۇرىلىمداۋ, شەكتەۋلەردى الىپ تاستاۋ نەمەسە بانكروتتىق ماسەلەلەرىندە ناقتى كومەك كورسەتىلدى. سونداي-اق, ازاماتتار قارجىلىق ساۋاتتىلىق كۋرستارىنا قاتىسا الادى. جۇيەنىڭ ماقساتى – تەك ءبىر رەتتىك كومەك ەمەس, تولەم قابىلەتى قالپىنا كەلگەنشە ازاماتتاردى سۇيەمەلدەۋ.
بۇگىندە جالپى قۇنى 600 ملرد تەڭگەنى قۇرايتىن 12,7 مىڭ ينۆەستيتسيالىق جوبا ىرىكتەلدى. وسى قادام 490 مىڭ جەكە قوسالقى شارۋاشىلىقتى قامتۋعا جانە 111 مىڭ جۇمىس ورنىن قۇرۋعا مۇمكىندىك بەرەدى. بۇل – الداعى ءۇش جىلعا ارنالعان ناقتى جوسپار. ساراپشىلاردىڭ ەسەبىنە سايكەس, «اۋىل اماناتى» جوباسى ارقىلى بولىنگەن بيۋدجەت قارجىسىنىڭ ءار تەڭگەسى 1,24 تەڭگە جيىنتىق ەكونوميكالىق تابىس اكەلۋى مۇمكىن. بۇل قاراجات ءوندىرىستىڭ, سالىقتىڭ جانە اۋىل تۇرعىندارى تابىسىنىڭ ءوسىمى تۇرىندە قايتادى.
ءوز كەزەگىندە, كاسىپكەرلىك ماسەلەلەرى جونىندەگى جوبالىق كەڭسە جەتەكشىسى نۇرلان ساقۋوۆ پارتيانىڭ ۇيلەستىرۋ كەڭەسىنىڭ جۇمىسىنا توقتالدى. بۇگىندە اتالعان كەڭەس ميكرو جانە شاعىن بيزنەسپەن ءوزارا بايلانىستىڭ جاڭا ارناسىنا اينالدى. كەڭەس كاسىپكەرلەردىڭ وزەكتى ماسەلەلەرىن جيناۋعا, جۇيەلەۋگە جانە ونى شەشۋ جولدارىن تابۋعا مۇمكىندىك بەرەدى. سونداي-اق جاساندى ينتەللەكت ەلەمەنتتەرى بار تسيفرلىق پلاتفورما قۇرۋ جوسپارلانۋدا. سول ارقىلى كاسىپكەرلەر ءوز ءوتىنىشىن جولداپ, ءتيىستى كەڭەس الىپ, ولاردىڭ شەشىمىن قاداعالاي الادى. وسى دەرەكتەر نەگىزىندە ىسكەرلىك احۋال يندەكسى قالىپتاستىرىلادى. بۇل قادام پروبلەمالاردى جەدەل انىقتاۋعا جانە ونى شەشۋ بويىنشا ءتيىستى ۇسىنىستار ەنگىزۋگە مۇمكىندىك بەرەدى.
سونداي-اق پارتيا توراعاسى «قارىزسىز قوعام» جوباسىنىڭ call-ورتالىعىنىڭ جۇمىسىمەن تانىستى. مۇندا كۇن سايىن ەلىمىزدىڭ تۇكپىر-تۇكپىرىندە نەسيە ماسەلەسىنە, سوت داۋىنا نەمەسە قارجىلىق قيىندىقتارعا تاپ بولعان ازاماتتار 4 مىڭعا جۋىق قوڭىراۋ شالادى. Call-ورتالىقتا 50-گە جۋىق مامان جۇمىس ىستەيدى. ولاردىڭ قاتارىندا زاڭگەرلەر, مەدياتورلار جانە قارجى كەڭەسشىلەرى بار. ولار ادامدارعا قارىزدان قۇتىلۋعا, قۇجاتتاردى دايىنداۋعا جانە ماسەلەنىڭ زاڭدى شەشىمىن تابۋعا كومەكتەسەدى. وڭىرلەردە 180 ۇيلەستىرۋشىدەن تۇراتىن جەلى ازاماتتارعا جەرگىلىكتى دەڭگەيدە قۇقىقتىق كومەك كورسەتەدى.
«قارىزسىز قوعام» جوباسىنا «AMANAT» پارتياسىنىڭ ۇيلەستىرۋىمەن 11 مەملەكەتتىك ورگان مەن 12 كوممەرتسيالىق بانك قاتىسادى. ازاماتتار qogamfin.kz پلاتفورماسى ارقىلى زاڭگەر كەڭەسىنە جازىلىپ, پايدالى ماتەريالدار مەن بەينە ساباقتاردى الا الادى.
