كەيدە بۇرىنعى مەن بۇگىنگىنى ويشا سالىستىراتىنى بار. سوندايدا بالاعا جۇمىستىڭ قادىرىن كىشكەنتايدان ۇعىندىرىپ وسىرەتىن باياعىلاردىڭ ۇستانىمى ەسكە تۇسە كەتەتىن. قوراداعى ازىن-اۋلاق مالىن قاراپ, ەسىگىنىڭ الدىن ايناداي قىلاتىن بالالار ساباققا دا ۇلگەرىپ جاتۋشى ەدى. ونى بىلاي قويعاندا وزگەگە دە كومەك كورسەتىپ, قولعابىس تيگىزەتىن سول وقۋشىلار بولاتىن. مۇنى كورىپ وسكەندەردىڭ ەشقايسىسى قارا جۇمىستان قاشقان ەمەس. كەز كەلگەن شارۋاعا بىلەك سىبانا كىرىسىپ كەتەتىن.
مەكتەپتى بىتىرگەن 1989 جىلى قۇرىلىسشى بولىپ شىعا كەلدى. اسكەردەن كەيىن دە كوپ ويلانباي وسى سالاعا ورالدى. قالاداعى بىرقاتار عيماراتتىڭ بوي كوتەرۋىنە ۇلەس قوسقان شەبەر تاسقالاۋشى بولدى. كەيىن وزىنە كافەل جاپسىرۋدى دا سەنىپ تاپسىراتىندار كوبەيدى. اۋلاعا توسەلەتىن ورنەكتاستى تا تەپ-تەگىس ەتىپ جىمداستىرا قوياتىن شەبەرلىگى ءبىر بولەك اڭگىمە. جۇمىسىن شالا ىستەپ, بەتى قىزارعان كەزى جوق. قايتا ىسىنە ىقتياتتىعى, كاسىبىنە ادالدىعى باسقالارعا ۇلگى بولدى. بىراق جاسى ەلۋگە جاقىنداعاندا بۇرىنعىداي ەمەس, قۇرىلىستىڭ وزىنە اۋىر تيە باستاعانىن بايقادى. قيماسا دا قۇرىلىسشىلىقتى قويۋعا تۋرا كەلدى. سول كۇنى ءوزىن قويارعا جەر تاپپاي, ءبىر قىزىق جاعدايدى باستان كەشتى. ءبىر كۇن دە بوس وتىرىپ كورمەگەن ادام مۇندايدا ءوزىن كەرەكسىز سەزىنىپ, قاتتى قينالاتىنىنا كوزى جەتتى. كوپ ۇزاماي جۇمىسقا قايتا شىعىپ, «قىزىلوردا تازالىعى» مەكەمەسى جۇمىسشىلارىنىڭ قاتارىن تولتىردى. وعان دا مىنە التى جىلدان اسىپ بارادى.
– جۇمىس بارىسىندا تالاي جاعداي بولدى. قارعا ادىم جەردەگى جاشىككە قوقىسىن تاستاۋدى قيىنسىناتىنداردى دا كوردىك. اۋلادان ۇزاماي, قولىنداعى قوقىس تولى پاكەتتى لاقتىرا سالاتىنداردىڭ كوبى بالالار. ەسكەرتىپ ايتساڭ, وزىڭە الايىپ قارايدى. وسىدان-اق ۇيىندە ۇلكەندەردىڭ وعان تازالىق, ەڭبەكتى باعالاۋ جايلى ەشتەڭە ايتپاعانى اڭعارىلىپ قالادى. ولارعا اقىل ايتادى دەگەندەردىڭ اراسىنان «بۇل مەنىڭ جۇمىسىم ەمەس» دەگەن ويدا جۇرگەندەر بارشىلىق. ءتىپتى سەن ەسىگىنىڭ الدىن ايناداي قىلىپ تازارتىپ جاتقاندا تەرەزەدەن قىزىقتاپ تۇراتىندارعا نە ايتاسىڭ. وسىدان دا مەكتەپ باعدارلاماسىنا تازالىقتى ارنايى ءپان رەتىندە كىرگىزىپ, بالالاردى ەرتە باستان سوعان باۋلىعان ءجون بە دەگەن ويعا كەلەسىز. ءتىپتى بۇل ءىستىڭ ماڭىزى تۋرالى شاعىن كورىنىستەر ءتۇسىرىپ, الەۋمەتتىك جەلى ارقىلى تاراتقان دا ارتىق بولماس ەدى. قولىنداعى الاقانداي تەلەفوننىڭ ايتقانىمەن جۇرەتىن بالالار سوندا ويلانار بالكىم, – دەيدى ب.قالدىباەۆ.
تازالىقشىنىڭ جۇمىسى قاشان دا قاربالاس. قاتتى شارشاساڭ دا جىپ-جيناقى بولعان كوشە كوڭىل توعايتادى. قازىر مەكەمەدە ارنايى تەحنيكا قاتارى كوبەيدى. قار كۇرەيتىن, شاڭ سورىپ الاتىن تۇرلەرى دە بار. بىراق ادامنىڭ قول كۇشى ءاردايىم كەرەك. مەكەمەدەگى جۇمىسشىلاردىڭ دەنى 40-50 جاستان اسقاندار. اپتاسىنا ءبىر-اق كۇن دەمالاتىن, قىستىڭ ايازى مەن جازدىڭ اپتابىنا قارامايتىن تازالىقشىنىڭ تىرلىگى وڭاي ەمەس. تاڭمەن تالاسا ىسكە كىرىسىپ, كەش باتا تولاس تاباتىن تازالىقشى جۇمىسىن اۋىرسىنعان جاستار جاعى كوپ تۇراقتاي بەرمەيدى.
«تازا قازاقستان» ەكواكتسياسى سالانى العا باستىرۋعا سەپ بولدى. باستاما جۇزەگە اسىرىلا باستاعالى بەرى جۇرتتىڭ قورشاعان ورتاعا دەگەن كوزقاراسىنىڭ وزگەرگەنى بايقالادى. سەنبىلىكتەر ءجيى ۇيىمداستىرىلىپ, ورتاق ىسكە ۇلەس قوسقاندار قاتارى كوبەيدى. وسىنىڭ ارقاسىندا قىزىلوردا قازىر ەلىمىزدەگى ەڭ تازا قالا اتانىپ وتىر, – دەيدى ول.
كەيىپكەرىمىزدىڭ ءسوزىنىڭ جانى بار. قازىر وبلىس ورتالىعى, اۋداندار مەن اۋىلداردا كوشەلەر كەڭەيىپ, جۇرت دەمالاتىن الاڭدار كوبەيدى. بۇل جاڭالىقتا ب.قالدىباەۆ سەكىلدى كاسىبىنە ادال جۇزدەگەن جاننىڭ ۇلەسى بار.
قىزىلوردا
