سۋرەت: newsroom.kz
ەلەكتروندىق ەڭبەك بيرجاسىنداعى بوس ورىندار سانى 128,9%-عا ارتىپ, تۇيىندەمەلەر كەرىسىنشە 6,3%-عا ازايعان. وقۋ جىلىنىڭ باسىندا سۇرانىستىڭ باسىم بولىگى مۇعالىمدەرگە تيەسىلى بولدى. ناقتىراق ايتساق, ءبىلىم سالاسىندا 120,7 مىڭ جۇمىس ۇسىنىلعان, ونىڭ دەنى استانا, الماتى قالالارىندا. سونىمەن قاتار اقپارات جانە بايلانىس (17,4 مىڭ), قىزمەت كورسەتۋدىڭ باسقا دا سالالارىنا (17,1 مىڭ), وڭدەۋ ونەركاسىبىنە (15 مىڭ) سۇرانىس جوعارى. وسى ءتورت سالا كەيىنگى كەزدەگى جالپى سۇرانىستىڭ 70%-دان استامىن قۇراعان.
جۇمىس بەرۋشىلەردىڭ دەنى جوعارى بىلىكتى ماماندار ىزدەيدى. مۇنداي مامانداردىڭ ۇشتەن ەكىسى (81,6 مىڭ) – ءبىلىم بەرۋ, تاربيە سالاسىنداعى ماماندار. ورتا بىلىكتى ماماندارعا سۇرانىس – 31% (75,2 مىڭ), بىلىكتىلىگى جوق جۇمىسشىلارعا سۇرانىس – 17% (40,4 مىڭ). بوس جۇمىس ورىندارىنىڭ ءوسىمى جونىنەن الماتى وبلىسى كوش باسىندا. ودان كەيىنگى ورىنداردا – جامبىل, باتىس قازاقستان, اقتوبە, جەتىسۋ وبلىستارى. جالپى, تۇيىندەمە سانىنىڭ ازداپ تومەندەگەنىنە قاراماستان, كوپتەگەن وڭىردە جۇمىس ىزدەۋشىلەردىڭ بەلسەندىلىگى ارتقان. بۇل رەتتە الماتى وبلىسى مەن قالاسى كوش باسىندا, ۇشتىكتى تۇركىستان وبلىسى تۇيىندەيدى.
ناقتى كاسىپتەرگە قاتىستى ايتار بولساق, ەڭ كوپ سۇرانىسقا يە ماماندىقتار – PR-مەنەدجەرلەر (16,3 مىڭ بوس ورىن), ماتەماتيكا ءپانىنىڭ مۇعالىمدەرى (7,6 مىڭ), تاربيەشىلەر (6,1 مىڭ). ورتا بىلىكتى ماماندار اراسىندا تاربيەشى كومەكشىلەرى (4,4 مىڭ), كۇزەتشىلەر (2,7 مىڭ), اۆتوكولىك جۇرگىزۋشىلەرى (2,6 مىڭ) سۇرانىسقا يە. جۇمىسىنا ەڭ جوعارى جالاقى سۇراعاندار – تەحنيكالىق ديرەكتورلار (ورتاشا 1,2 ملن تەڭگە), ۇشقىشتار (1,2 ملن تەڭگە), كوممەرتسيالىق ديرەكتورلار (1,1 ملن تەڭگە). جۇمىس بەرۋشىلەر ۇسىنعان ەڭ جوعارى جالاقى – كەن ءوندىرۋ سالاسىنداعى تسەح باسشىسى (شامامەن 843,8 مىڭ تەڭگە), ەنەرگيامەن جابدىقتاۋ قىزمەتى باسشىسىنىڭ ورىنباسارى (733 مىڭ تەڭگە), IT سالاسىنداعى باعدارلامالار باس رەداكتورى (718 مىڭ تەڭگە) لاۋازىمدارى.
جالپى, كەيىنگى كەزدەرى جوعارى بىلىكتى جۇمىس كۇشىنە دەگەن سۇرانىستىڭ وسكەنى بايقالادى. بۇل ءوسىم ءبىلىم سالاسىنداعى ماۋسىمدىق فاكتورلارمەن, اتاپ ايتقاندا, مۇعالىم, تاربيەشى, ولاردىڭ كومەكشىلەرىنە سۇرانىس كوبەيگەنىمەن بايلانىستى بولىپ وتىر.
