قايسار قىزدىڭ ارمانى – وليمپيادا التىنى

انگليادا وتەتىن الەم چەم­پيوناتىنا جۇرەر الدىندا الما­­تى كو­­مان­­­داسىنىڭ قىزدارى تۇر­كيا­عا ات باسىن بۇرىپ, وسى ەل­­­دىڭ قىز­دارىمەن بىرلەسكەن وقۋ-جاتتىعۋ جيىنىن وتكىزدى. الۋا ترابزوندا تۋعان تالانت بۋسەنازبەن سپاررينگ جاساپ, قارىمىن باعامدادى. تۇركيا مەم­­لە­كەتىنە وليمپيادانىڭ كۇمىس مەدالىن تارتۋ ەتكەن بۋ­سەناز­­­دىڭ بۇلا كۇشىن قالاي قاي­راپ, شىڭدايتىنىن كوردى. ەلگە كەلگەن سوڭ رەسەي بوكسشىلارىمەن تىزە قوسىپ, جاتتىعۋدى كۇشەيتتى.

– بۇل ءوزى ءبىر ءساتىن سالعان جاتتىعۋ جيىنى بولدى, – دەيدى بوكسشى قىز. – 2021 جىلعى توكيو وليمپياداسىندا جاپونيا ەلىنە مەدال سىيلاعان تسۋكيمي ناميكي دا وسى بىرلەسكەن وقۋ-جاتتىعۋ جي­ىنىنا كەلدى. وليمپيا ويىن­دارىنان كەيىنگى ۇزاق ۋاقىت ۇزى­لىستەن سوڭ قولعابىن قايتا كيگەن جاپون قىزىمەن دە سپاررينگ وتكىزدىم. ول دا وسىنداي ءدۇبىردى ىزدەپ كەلگەنىن اڭداتتى. بوكستى ساعىنىپ-اق قالىپتى, جانارىنان جالىن ۇشقىنداپ, جانىعىپ ءجۇردى. ماعان دا كەرەگى وسىنداي ۇزدىكتەرمەن تارتىسقا ءتۇسۋ ەدى. رينگتە شارتتا-شۇرت سوققى سىلتەسىپ, تارتىسقا تۇسكەنىمىز شاربولاتتاي شىڭدالۋىما سەپتىگىن تيگىزدى. سودان سوڭ ليۆەرپۋلگە اتتاندىق.

الەم چەمپيوناتىندا الۋا ءتورت جەكپە-جەك وتكىزدى. الدىمەن وڭتۇستىك كورەيا ەلىنىڭ ءۇمىتى مۋن كاەنمەن جۇدىرىقتاستى. ەرەسەكتەر دوداسىنا ەندى قوسىلعان البىرت بوكسشىنىڭ تاجىريبەسى كەمشىن ەكەنىن سەزدى. بۇل جەكپە-جەك بىرىنشىلىك اۋراسىنا بوي ۇيرەتۋگە تاماشا مۇمكىندىك بولدى. كۇشىن سارقا جۇمساماي, قار­­سى­لاسىن ءوزىنىڭ ستيلىنە قاراي يكەمدەپ الدى دا, ءۇش راۋندتان دا ەركىن ءوتتى.

– ەكىنشى جەكپە-جەگىمدە تايپەيلىك ي سيۋان گۋونىڭ قارىمىن بايقاپ كوردىم. بۇل قىز مەنەن جاسى كىشى, الەمدىك دودالاردىڭ ءدامىن ەندى-ەندى تاتىپ, ءالى ءسولىن الا قويماعان بوكس­شى. دەسە دە, ەكىلەنىپ كەلىپ, انداعايلاپ ۇمتىلادى. جاستىق ماكسيماليزمنىڭ ەكپىنىمەن ورشە­­لە­نەدى. اشىق ۇرىسقا دەن قويىپ, باسا-كوكتەي توپەلەي بەرۋ­­دىڭ ءجونى جوق. تاكتيكالىق جوسپارعا ساي شابۋىلدى شابۋىلمەن تويتارىپ وتىردىم. اسىلىندە تايلاند, تايپەي بوكس­شى­لارىنىڭ جۇدىرىقتاسۋ مانەرى وزگەشە. بويى الاسا, قولى قىسقا بولعاندىقتان دا, بۇعىنا ءجۇرىپ قارسىلاسىن جاقىننان توپەلەۋگە ۇمتىلادى. قولدى-اياققا تۇرماي­دى, شاپشاڭ قيمىلدايدى, – دەيدى ا.بالقىبەكوۆا.

بۇل جەكپە-جەك تە الۋانىڭ جوسپارىنا ساي ءوربىدى. شابۋىلعا ۇمتىلعان سيۋاننىڭ سوققىلارىن دارىتپاي, تيىسىنشە ءوزىنىڭ جۇ­دى­رىعى وعان ءدوپ ءتيىپ, ۇپاي باسىم­دىعىمەن ايقىن جەڭدى.

جارتىلاي فينالدا قىتايلىق تسي ءسينيۋدى ءسۇرىندىردى. قىتاي قىزىنىڭ فيزيكالىق كۇش-قايراتى الەم چەمپيوناتىن تاما­شا­لاۋشى كورەرمەندى تاڭداي قاق­تىردى. ول ىرىكتەۋ كەزەڭىندە الدىمەن اعىلشىن بوكسشىسىن ىعىستىردى, شيرەك فينالدا الەم چەمپيوناتىنىڭ قولا مەدال يەگەرى يسپاندىق لاۋرا فەر­ناندەستى جۇلدەدەن قاقتى. دەگەنمەن دە الۋانىڭ الدىندا تىزگىن تارتتى.

الەم چەمپيوناتىنىڭ في­نالدىق جەكپە-جەگى. جەڭسە جا­ھاننىڭ ەكى دۇركىن چەمپيونى اتانادى. قارسىلاسى دا وڭاي ەمەس. بۋسەناز شاكىروعلى – وليم­پيادانىڭ فينالدىق دوداسىنا ەكى رەت جەتكەن سپورتشى. 2021 جىلى توكيو وليمپيادانىڭ فينالىندا بولگار قىزى ستويكا كرىستەۆاعا ەسە جىبەردى. بىلتىر پاريجدەگى وليمپيا ويىندارىنىڭ سوڭعى سايىسىندا قىتايلىق ۋ يۋيدەن جەڭىلدى. 2022 جىلى الەم چەمپيو­نى اتاندى. تۇركيادا قىزدار بوكسىنىڭ داڭقىن اسىرىپ تۇرعان ساڭلاق. بۇعان دەيىن بۋسەناز بەن الۋانىڭ جولدارى رەسمي سايىس­تاردا تۇيىسكەن جوق. وسى كوكتەمدە سەربيادا ايەلدەر اراسىندا وتكەن الەم چەمپيوناتىندا شاكىروعلى 52 كگ سالماقتا جۇدىرىقتاسىپ, فينالدا سولتۇستىككورەيالىق پان چحول ميدەن اسا المادى. ەكى دارىن ليۆەرپۋل رينگىندە 51 كگ سالماقتىڭ الەم چەمپيونى اتاعى ءۇشىن ايقاسقا شىقتى.

– تۇرىك قىزى كوبىنە شابۋىلدى ءوزى باستاماي قارسىلاسىنىڭ سوققىسىن سوققىمەن تويتارىپ وتىرادى ۇنەمى. بۇرىن بۇل بوكس­شى 51 كگ سالماقتا جۇدىرىقتاسۋ ءۇشىن سايىس الدىندا ءاردايىم كەمىندە 4-5 كگ سالماعىن تومەن­دەتەتىن. سپورتشىعا ول وڭاي شارۋا ەمەس. قالجىراپ, قاجىر-قايراتى كەميدى, بەلسەندىلىگى دە تومەندەيدى. مۇنىڭ بارلىعىن تۇركيا ەلىندە وتكەن جاتتىعۋ كەزىندە قاپەرىمە مىقتاپ توقىدىم. فينالدىق سايىستا جەكە باپكەرىم دولكۋنجان كامەكوۆ پەن ۇلتتىق قۇرامانىڭ باس باپكەرى ەلدوس ءسايداليننىڭ تاكتيكالىق جوسپارىنا ساي قيمىلداپ, جۇكتەمەنى تىڭعىلىقتى ورىندادىم, – دەيدى الۋا.

ناتيجەسىندە, ايقىن جەڭىس, بەس تورەشى دە ءبىراۋىزدان قازاق قىزىنىڭ باسىمدىعىنا ۇپاي جازدى. ەكى دۇركىن الەم چەمپيونى اتانعان الۋا ەلگە ورالعان سوڭ اكەسى ساكەنگە جەڭىل كولىك تارتۋ ەتتى. اسقار تاۋ تىرەگى, وتباسىنىڭ قامقورىنا دەگەن قۇرمەتىن وسىلايشا ءبىلدىردى. بىرەر جىل بۇرىن اناسى سارا يساقوۆانىڭ سىرقاتىن ەمدەتۋ ماقساتىندا الۋانىڭ وتباسى الماتىعا قونىس اۋدارعان-دى.

– 2021 جىلى تاراز قالاسى­نان كوشتىك تە, اكەم تۇراقتى جۇمىسىنان قول ءۇزدى. الماتىعا كەلگەن سوڭ يپو­تەكاعا باسپانا راسىمدەگەن ەدىك. وزگە دە نەسيەنىڭ تولەمدەرى القىمنان الىپ, ء«بورى ارىعىن بىلدىرمەس» دەپ ءجۇرىپ جاتتىق. 2022 جىلى الەم چەمپيوناتىن تۇركيانىڭ ىستانبۇل قالاسى قابىلدادى. تۇركياعا الەم چەمپيوناتىنا جۇرەردە اكەم ءوزىنىڭ كولىگىن ساتىپ, قارىزدىڭ ءبىراز سوماسىن تولەدى, «شەتەلگە بارعاندا قىسىلىپ قالما» دەپ ماعان دا قوماقتى اقشا ۇستاتىپ, شىعارىپ سالدى. ۇلتتىق قۇرا­مانىڭ مۇشەسى بولعان سوڭ, بارلىق قاجەتىمىزدى بوكس فەدەراتسياسى قامتاماسىز ەتەدى. دەسە دە, سىرتتا جۇرگەندە كوڭىلى تۇسپەسىن دەگەن اكەمنىڭ قامقورلىعىنا ەلجىرەپ, وزىمە ىشتەي سەرت بەردىم. جاڭا كولىك تارتۋ ەتەمىن دەپ مىقتاپ بەكىندىم. سول جىلى فينالدىق ايقاستا ءسۇرىنىپ, كۇمىس جۇلدەگەر اتاندىم. وعان دا قوماقتى سىياقى بەرىلدى. بىراق اكەم وزىنە كولىك الۋدان بۇرىن پاتەرىمىزدىڭ يپوتەكاسىن, وزگە قارجىلىق ماسەلەنى شەشۋدى ءجون دەپ تاپتى. 2023 جىل دا جەمىسسىز بولعان جوق. ءۇندىس­تاندا وتكەن جاھان دوداسىنان قولا مەدال بۇيىردى. فەدە­را­تسيا تاراپىنان تارتۋ ەتىلگەن سىياقىمىزدى دا كەم-كە­تى­­­گى­مىزدى تۇگەندەۋگە جۇمساپ, «اكەمە كولىك سىيلايمىن» دەگەن ماقساتىمدى كەيىنگە ىسىردىم. سول ەندى جۇزەگە استى, – دەيدى الەم چەمپيونى.

الۋانىڭ جەكپە-جەك سپورتىنا قىزىعۋشىلىعى بالا كۇنىنەن وياندى. دەگەنمەن اناسى قىزىن اۋەلى بي ۇيىرمەسىنە جازدىرىپ, ونەرگە باۋلىعىسى كەلدى. بىراق ونەر بۇل قىزدىڭ سالاسى ەمەس ەكەن. جەتكىنشەك شاعىنان سپورتقا ىنتىزار قىزىن اكەسى الدىمەن ايكيدوعا الىپ بارادى. الۋانى بۇل ورتا دا قىزىقتىرا المادى. اقىرى اكەسىنە ءوزىنىڭ جەكپە-جەك سپورتىنان سايىستارعا قاتىسىپ, شەبەرلىگىن سىناعىسى كەلەتىنىن اشىپ ايتتى. اكەسى الدىمەن كيكبوكسينگ ۇيىرمەسىنە جازدىردى. الايدا الۋا كوپ وتپەي وليمپيادا باعدارلاماسىنداعى سپورت ءتۇرى بوكسقا ويىستى. اكە ارمانى اقتالدى. ساكەننىڭ بوكس­شى قىزى العاشقى جىلداردان-اق جۇلدە ولجالاپ, جۇرت نازارىنا ءتۇستى. جەكە باپكەرى مەيىربەك كەڭگىلباەۆتىڭ سەنىمىن اقتاپ, اۋەلى جاسوپىرىمدەر اراسىندا, كەيىن جاس­تار قاتارىنا وتكەندە دە مەرەيى ۇستەم بولدى.

اۋليەاتا توپىراعىنان الاتاۋ بوكتەرىنە قونىس اۋدارعاندا م.كەڭ­گىلباەۆ الۋانى بىلىكتى باپكەر دولكۋنجان كامەكوۆكە اماناتتادى. ءۇش دۇر­كىن الەم چەمپيونى, پاريج وليم­پيا­داسىنىڭ قولا جۇلدەگەرى نازىم قىزايباي سىندى ساڭ­لاقتاردى باپتاپ, ۇزدىكتەردى تۇ­لەتىپ جۇرگەن جاتتىقتىرۋشى تارازدىق تالانتتى دا قاناتىنىڭ استىنا الدى. بىلگىر باپكەردىڭ كورىگىندە شىڭ­دالعان الۋا ساكەنقىزى بيىل التى ايدىڭ ىشىندە الەمنىڭ ەكى دۇركىن چەمپيونى اتاندى. 2022 جىلى كۇمىس, 2023 جىلى قولا جۇلدە ولجالادى. ازيانىڭ ۇزدىگى اتاندى. ونىڭ ەندىگى مەجەسى – 2028 جىلعى لوس-اندجەلەس وليم­­­پياداسىنىڭ اسقارىنا ات بايلاۋ. بۇل ساپاردا ارقالار امانات تا اۋىر ەكەنىن سەزىنەدى. ءوزىنىڭ سالما­عىندا باسەكەلەستىك الەم­دە عانا ەمەس, ەل ىشىندە دە قايناپ تۇر. جاستار قىلاڭ بەرىپ ۇلتتىق قۇرامادان ورىن سۇرايدى. قاتار­­لاس­تارىنىڭ دا قارقىنى وت بۇر­كەدى. جاتتىعۋ زالىنا باعىت العان قىزدىڭ بار ويلايتىنى – وليم­پيا­دا التىنى.