وڭىردە قازاقتىڭ بايىرعى قارۋى – ساداقتى ءسان ءۇشىن, سپورت ءۇشىن تارتىپ جۇرگەن جاستار از ەمەس. الايدا, سايىس سيرەك ۇيىمداستىرىلادى. سوندىقتان دا «ALTAI» تەلەارناسى مەن «كەرەمەت ساداق اتۋ» ورتالىعى تەلە تۋرنير ۇيىمداستىرۋدى ۇيعارعان. تۋرنيرگە كەلگەن وبلىس باسشىسى قاتىسۋشىلارعا جۇرەكجاردى لەبىزىن ءبىلدىرىپ, ساتتىلىك تىلەدى.
«ساداق اتۋ – حالقىمىزدىڭ ەجەلدەن كەلە جاتقان ۇلتتىق مۇراسى, باتىرلىق پەن مەرگەندىكتىڭ نىشانى. بۇل سپورت ءتۇرى جاس ۇرپاقتىڭ رۋحىن كوتەرىپ, ەرىك-جىگەرىن شىڭداپ, تەرەڭدە جاتقان تاريحىمىزعا ۇڭىلدىرە تۇسەدى. بارشا قاتىسۋشىلارعا ساتتىلىك تىلەيمىن! جەبەلەرىڭىز نىساناعا ءدوپ تيە بەرسىن», دەدى وبلىس اكىمى.
جارىسقا 9-10 سىنىپتا وقيتىن 80-نەن استام وقۋشى قاتىسىپ, جارتىلاي فينال مەن فينالدا جامبى اتۋدان سىنعا ءتۇستى. ناتيجەسىندە, 1-ورىن م. لومونوسوۆ اتىنداعى ورتا مەكتەپتىڭ وقۋشىسى ءالي باقىتبەك السا, 2-ورىن اقجار ورتا مەكتەپ-ينتەرناتىنىڭ وقۋشىسى ايبول ناسيموللاەۆ ەنشىلەدى. 3-ورىن №49 جالپى ءبىلىم بەرەتىن مەكتەپ اتىنان شىققان ابدۋلازيز بەرىكبول ۇلى قاناعات تۇتتى. سونداي-اق, ارنايى تاعايىندالعان 4-ورىندى №3 مەكتەپ-ليتسەيىنىڭ وقۋشىسى دانيار زەينەلقابدەن الدى.
ايتا كەتەيىك, بۇل شارادا وقۋشىلار ساداق تارتىپ, باق سىناپ قانا قويعان جوق, وبلىستاعى مادەني وشاقتار ۇيىمداستىرعان كورمەنى تاماشالاپ, ساداقتىڭ تاريحى توڭىرەگىندە تىڭ اقپارات الا الدى.
شىعىس قازاقستان وبلىسى
