مەرەكە اياسىندا جاسالعان يگىلىكتى ءىس-شارادا اعا ايماق باسشىسى بەرىك ءۋالي قالا تۇرعىندارىن رەسپۋبليكا كۇنىمەن قۇتتىقتاپ, جاڭا ساياباق شاھاردىڭ الەۋمەتتىك جانە مادەني كەلبەتىن ايشىقتايتىن ماڭىزدى نىسان ەكەنىن جەتكىزدى.
«مەملەكەت باسشىسى قاسىم-جومارت توقاەۆ رەسپۋبليكا كۇنىنە ارنالعان قۇتتىقتاۋىندا: «تاۋەلسىزدىك – بارىنەن قىمبات قۇندىلىعىمىز. ونى ساقتاپ, نىعايتا ءتۇسۋ – بارشامىزعا ورتاق قاسيەتتى بورىش. ەگەمەندىك – اتا-بابالارىمىزدىڭ ۇلت مۇددەسى جولىنداعى وشپەس ەرلىگىنىڭ ايقىن كورىنىسى», دەپ ەگەمەندىكتىڭ قادىر-قاسيەتى مەن ماڭىزىن حالقىمىزدىڭ سان كەشۋلى تاريحى مەن كۇرەسكە تولى كەزەڭدەرىن ەسكە الىپ, ناقتى تۇيىندەدى. ءبىز بۇگىن سەمەيدىڭ اجارىنا كورىك قوسىپ, تاريحي سىپاتىن بايىتا تۇسەتىن وزگەشە نىساندى رەسپۋبليكا كۇنىنە ورايلاستىرىپ, سەمەي تۇرعىندارىنىڭ قاجەتىنە پايدالانۋعا بەرگەلى وتىرمىز. بۇل قالا تۇرعىندارىنىڭ دەمالىپ, سەرۋەندەۋىنە ارنالعان جاڭا ساياباق, جاڭا الاڭ بولماق. ساياباقتىڭ بيىكتەن تۇسىرىلگەن سۋرەتىن قاراعاندا كيىز ءۇيدىڭ بەينەسى بەدەرلەنگەن. الداعى ۋاقىتتا ءبىز وسى جەرگە مەملەكەتتىك ءرامىزىمىز – تۋىمىزدى ورناتاتىن بولامىز. قالامىز كۇننەن كۇنگە كوركەيىپ كەلەدى. ۇشاقتار كەنتىندە دە وسىنداي ساياباق سالىنىپ جاتىر. ونى دا تولىق اياقتاپ, حالىقتىڭ دەمالىس ورنىنا, قوعامدىق كەڭىستىككە اينالدىرامىز», دەدى وبلىس اكىمى.
سونىمەن قاتار اكىم جاڭا اشىلعان ساياباققا «رەسپۋبليكا ساياباعى» دەگەن اتۋ بەرۋ كەرەكتىگىن دە ايتتى.
«قالامىزدىڭ كوركىن اسىرىپ, حالىق يگىلىگىنە قىزمەت ەتەتىن ساياباقتى قالا زيالىلارى مەن قوعامدىق كەڭەس وكىلدەرى «رەسپۋبليكا الاڭى», «رەسپۋبليكا ساياباعى» دەپ اتاۋدى ۇسىنىپ وتىر. مەن ءوز تاراپىمنان بۇل اتاۋدىڭ جاڭا قوعامدىق ورىنعا جاراسىمدى ەكەنىن ايتقىم كەلەدى. ويتكەنى, ەلىمىزدىڭ ەڭ ۇلىق مەرەكەسى رەسپۋبليكا كۇنىندە حالىق يگىلىگىنە پايدالانۋعا بەرىلىپ وتىر. ازاماتتاردىڭ ۇسىنىسىن قولداي وتىرىپ, مەملەكەتتىك ونوماستيكا كوميسسياسىنا وسىلاي ۇسىناتىنىمىزدى جەتكىزگىم كەلەدى», دەدى ول.
بۇگىندە جاڭا ساياباقتىڭ قۇرىلىسى تولىق اياقتالىپ, اۋماعى كەڭ كولەمدە اباتتاندىرىلعان. كوگالداندىرۋ جۇمىستارى اياسىندا مىڭعا جۋىق قاراعاي مەن شىرشا كوشەتتەرى, 9 500-دەن استام ءساندى بۇتالار مەن 8 000-عا جۋىق كوپجىلدىق گۇلدەر ەگىلدى. جالپى اۋماعى شامامەن 53 مىڭ شارشى مەتردى قۇرايتىن ساياباقتا سەرۋەن جولدارى, دەمالىس ايماقتارى, ساحنا جانە مادەني-كوپشىلىك ءىس-شارالارعا ارنالعان اشىق الاڭدار قاراستىرىلعان.
از ۋاقىت ىشىندە بوي كوتەرگەن قوعامدىق نىسان تۇرعىنداردىڭ جايلى ءارى قاۋىپسىز دەمالاتىن ورىن. ساياباقتى سالۋ بارىسىندا 24 مىڭ شارشى مەتر اۋماق كوگالداندىرىلىپ, 20 370 شارشى مەتر جەرگە برۋسچاتكا تاس توسەلدى. سونداي-اق 20 480 شارشى مەتر اۋماققا اسفالت توسەلدى. ساياباقتىڭ باستى نىساندارىنىڭ ءبىرى – قازاق حالقىنىڭ رۋحاني مۇراسى مەن تاۋەلسىزدىكتىڭ سيمۆولىنا اينالعان التىن ادام ەسكەرتكىشى. بۇل ەسكەرتكىش ۇلتتىق تاريحقا تاعزىم رەتىندە ورناتىلىپ, ساياباقتىڭ كوركىن ايشىقتاپ تۇر. سونىمەن قاتار جيىنعا قاتىسقان قالا تۇرعىندارى ساياباقتىڭ اشىلعانىنا ريزاشىلىقتارىن جەتكىزدى.
«بۇگىن نەمەرەلەرىمدى ەرتىپ, جاڭا ساياباققا كەلدىك. بۇرىن بۇل جاق بوس جەر بولاتىن, ال قازىر وسىنداي ادەمى, جايلى دەمالىس ورنى بولدى. اينالاسى جاسىل جەلەككە تولى, بالالارعا ارنالعان ويىن الاڭدارى مەن التىن ادام ەسكەرتكىشى ەرەكشە كورىك بەرىپ تۇر. وتباسىمەن سەرۋەندەپ, دەمالۋعا تاپتىرماس ورىن», دەدى قاراعايلى ىقشام اۋدانىنىڭ تۇرعىنى نۇرلىبەك قالي ۇلى.
سالتاناتى جيىن سوڭىندا «الاتاۋ سەرىلەرى» توبى, امىرە قاشاۋباەۆ اتىنداعى وبلىستىق فيلارمونيا انشىلەرى ونەر كورسەتىپ, جينالعان قاۋىمعا كوتەرىڭكى كوڭىل-كۇي سىيلادى.
اباي وبلىسى
