مەملەكەت باسشىسىنىڭ تاپسىرماسىنا سايكەس ەنەرگەتيكا مينيسترلىگى تسيفرلىق ترانسفورماتسيا كارتاسىن بەكىتتى. قۇجاتتا Smart Grid جۇيەسىن, تسيفرلىق ەگىزدەر مەن جاساندى ينتەللەكتكە نەگىزدەلگەن مونيتورينگ پەن بولجاۋ تەحنولوگيالارىن ەنگىزۋ جوسپارلانعان. قازىرگى تاڭدا 43 مەملەكەتتىك قىزمەتتىڭ 99 پايىزى ونلاين كورسەتىلەدى, ال 2027 جىلعا قاراي نىسانداردىڭ جارتىسى تسيفرلىق مونيتورينگكە كوشپەك.
ەلەكتر جەلىلەرىن تەكسەرۋ ەندى دروندار مەن جاساندى ينتەللەكت جۇيەسى ارقىلى جۇزەگە اسادى. ولار سىمداردىڭ زاقىمدانۋى مەن قىزۋىن انىقتاپ, ەنەرگەتيكالىق جەلىنىڭ تسيفرلىق ەگىزىن جاسايدى. بۇل اپات قاۋپىن ازايتىپ, ەنەرگيا شىعىنىن تومەندەتەدى.
جىلۋ ەنەرگەتيكاسىندا دا روبوتتاندىرىلعان كەشەندەر ەنگىزىلىپ جاتىر. روبوتتار قۇبىر ىشىندەگى اقاۋلاردى انىقتاپ, ءۇش ولشەمدى مودەل جاسايدى. جوبا شىمكەنتتە سىناقتان وتكىزىلىپ جاتىر, ناتيجەسى وڭ بولسا, ەل بويىنشا كەڭەيتىلەدى.
يننوۆاتسيالار ورتالىعى – Astana Hub. مۇندا ەنەرگەتيكالىق ستارتاپتار دامىپ كەلەدى. 2024 جىلى تەحنوپارك رەزيدەنتتەرىنىڭ تابىسى 1,8 ملرد تەڭگەگە جەتىپ, 400-دەن استام جاڭا جۇمىس ورنى اشىلعان. ماسەلەن, FACEPLATE پلاتفورماسى KEGOC كومپانياسىنا 1,6 ملن دوللار ۇنەم اكەلسە, ESEP شەشىمدەرى كوممۋنالدىق رەسۋرستاردى 12 پايىزعا ازايتۋعا مۇمكىندىك بەردى.
حالىقارالىق تاجىريبە دە وڭ ناتيجە كورسەتىپ وتىر: نيدەرلاند پەن قىتايدا ينتەللەكتۋالدى باسقارۋ جۇيەلەرى ەنەرگيا تۇتىنۋدى ەداۋىر قىسقارتقان.
ءبىزدىڭ ەل بۇل باعىتتا ەنەرگەتيكا سالاسىن كەشەندى رەينجينيرينگتەۋ, ينتەللەكتۋالدى ەسەپتەۋ قۇرالدارىن جەدەل ەنگىزۋ جانە دروندارمەن مونيتورينگتى كەڭەيتۋ ارقىلى «اقىلدى ەنەرگەتيكا» جۇيەسىنە ءوتۋدى كوزدەپ وتىر.
