ساحناعا ورتالىق ازيانىڭ 11 ستارتابى شىعىپ, ءوز جوبالارىن تانىستىردى. ولاردىڭ قاتارىندا, Mirai Tech, Paidax, Gro.now, Tryverse, Daryn.online, Rosta, Steppe.ai, AVM.AI, Epsilon3.ai, Yume جانە Macdent بار. ءاربىر كوماندا اكسەلەراتسيا بارىسىندا جەتكەن ناقتى ناتيجەلەرىن كورسەتىپ, الداعى ۋاقىتتا حالىقارالىق نارىققا شىعۋ جولدارىن ايتتى.
تۇسىندىرە كەتەيىك, اكسەلەراتسيا دەگەنىمىز – ستارتاپتاردى جەدەل دامىتۋعا ارنالعان ارنايى باعدارلاما. ول جاس كاسىپكەرلەرگە بيزنەس-مودەلدى جەتىلدىرۋگە, ءونىمدى نارىققا شىعارۋعا جانە ينۆەستورلارمەن بايلانىس ورناتۋعا كومەكتەسەدى. ادەتتە اكسەلەراتسيا بارىسىندا قاتىسۋشىلار تاجىريبەلى مەنتورلارمەن جۇمىس ىستەپ, ماركەتينگ, قارجىلاندىرۋ جانە تەحنولوگيالىق دامۋ بويىنشا ءبىلىم الادى. ناتيجەسىندە ستارتاپتار قىسقا مەرزىمدە ءوز جوبالارىن ايتارلىقتاي ىلگەرىلەتىپ, ينۆەستيتسيا تارتۋعا مۇمكىندىك الادى.
ءىس-شارا اياسىندا بۇرىنعى قاتىسۋشىلاردىڭ اتسالىسۋىمەن وتكەن پانەلدىك سەسسيا دا ۇلكەن قىزىعۋشىلىق تۋدىردى. CTOgram, Biometric Vision, Arlan Biotech, Biny, Epsilon3.ai جانە Steppe.ai سىندى اۋقىمدى ستارتاپتاردىڭ وكىلدەرى بيزنەستى كەڭەيتۋ جولىنداعى تاجىريبەلەرىن ءبولىستى.
Silkway Accelerator باعدارلاماسى ءۇش جىل ىشىندە ورتالىق ەۋرازياداعى جەتەكشى اكسەلەراتورلاردىڭ بىرىنە اينالدى. وسى ۋاقىتتا باعدارلاماعا 1300-گە جۋىق ءوتىنىم قابىلدانىپ, 62 ستارتاپ ىرىكتەۋدەن ءوتىپ, تولىق اكسەلەراتسيادان ءساتتى ءوتتى. باعدارلاما تۇلەكتەرى جالپى 28 ميلليون دوللاردان استام ينۆەستيتسيا تارتىپ, ولاردىڭ جيىنتىق نارىقتىق باعالاۋى 500 ميلليون دوللاردان استى. جوبالار گەوگرافياسى ورتالىق ازيا ەلدەرىنەن بولەك, گرۋزيا, موڭعوليا جانە ازەربايجان نارىقتارىن دا قامتىدى.
تانىمال تۇلەكتەردىڭ قاتارىندا Citix, Zypl.ai, Arlan Biotech, NB Fit, UvU, ApartX, Biometric, ZebraEye جانە Alaqan سىندى ستارتاپتار بار.
«Silkway Accelerator – ستارتاپتارعا جاھاندىق مەنتورلار مەن ينۆەستورلار جەلىسىنە جول اشادى. باعدارلاما ستارتاپتاردىڭ ءونىمىن دامىتۋعا جانە جوبانى ماسشتابتاۋعا باعىتتالعان. التىنشى لەكتىڭ قاتىسۋشىلارىنا Astana Hub Ventures تاراپىنان ينۆەستيتسيا الۋ مۇمكىندىگى دە قاراستىرىلعان», دەدى Astana Hub بيزنەس-باعدارلامالار كەڭسەسىنىڭ ديرەكتورى ەربول احمەتوۆ.
ايتا كەتەرلىگى, قازاقستان – ورتالىق ازيادا Google for Startups سەرىكتەستىگىمەن اكسەلەراتورلىق باعدارلامانى جۇزەگە اسىرىپ وتىرعان العاشقى مەملەكەت.
جالپى, وسى Digital Bridge 2025 جاساندى ينتەللەكتىنى ءارتۇرلى سالالارعا ەنگىزۋدىڭ ءتيىمدى جولدارى دا تالقىلاندى. مەديتسينا, ءبىلىم بەرۋ, اۋىلشارۋاشىلىعى جانە قوعامدىق قاۋىپسىزدىك سياقتى ماڭىزدى باعىتتاردىڭ ىلگەرىلەۋىنە تسيفرلىق شەشىمدەر ۇلكەن سەپتىگىن تيگىزەدى دەيدى ساراپشىلار. سوندىقتان تەحنو-جيىندا بىرنەشە كەلىسسوزدەر دە جاسالدى.
ماسەلەن, Astana Hub جاھاندىق ستارتاپ-ەكوجۇيەلەردى زەرتتەۋمەن اينالىساتىن StartupBlink اناليتيكالىق پلاتفورماسىمەن ءوزارا ىنتىماقتاستىق جونىندە مەموراندۋمعا قول قويدى. سونىمەن قاتار, Astana Hub ورتالىق ازياداعى ۇزدىك ستارتاپ-حاب مارتەبەسىنە يە بولدى.
بۇل ماراپات Global Startup Ecosystem Index 2025 جاھاندىق رەيتينگىندە قازاقستاننىڭ ورتالىق ازيا ەلدەرى اراسىندا العاش رەت كوش باستاۋىنىڭ ناتيجەسى رەتىندە بەرىلدى. قۇجات اياسىندا تاراپتار ستارتاپ-ەكوجۇيەنى دامىتۋ, تاجىريبە الماسۋ, سونداي-اق قازاقستاندىق تەحنولوگيالىق كومپانيالاردى جاھاندىق دەڭگەيدە ىلگەرىلەتۋ باعىتىندا بىرلەسىپ جۇمىس ىستەۋگە كەلىستى.
Astana Hub باس ديرەكتورى ماعجان ماديەۆتىڭ ەلىمىزدەگى يننوۆاتسيالىق ەكوجۇيەنى قالىپتاستىرۋعا قوسقان جەكە ۇلەسى دە ەرەكشە اتاپ ءوتىلدى.
سونىمەن قاتار فورۋم اياسىندا Astana Hub پەن روبوتوتەحنيكا سالاسىنداعى الەمدىك كوشباسشى قىتايلىق UNITREE كومپانياسى اراسىندا ىنتىماقتاستىق تۋرالى مەموراندۋمعا قول قويىلدى.
قۇجاتقا UNITREE تەڭ قۇرىلتايشىسى چەن لي جانە Astana Hub باس ديرەكتورى ماعجان ماديەۆ قول قويدى. استانادا Alem AI جاساندى ينتەللەكت ورتالىعىنىڭ بازاسىندا ارنايى روبوتوتەحنيكا زەرتحاناسى اشىلادى. مەموراندۋم جاڭا ءبىلىم بەرۋ جانە زەرتتەۋ باستامالارىن, وقۋ كۋرستارىن ازىرلەۋدى كوزدەيدى.
«جاساندى ينتەللەكت الەمدى قالاي وزگەرتۋدە جانە قانداي AI-شەشىمدەر قازىر قولدانىستا؟» دەگەن تاقىرىپتى كوتەرگەن Digital Bridge 2025 فورۋمى 400-دەن استام حالىقارالىق جانە وتاندىق سپيكەردى, 100-دەن اسا ينۆەستور, 200-دەن استام IT-كومپانيا مەن ستارتاپتى بىرىكتىردى. بارلىعى 120-دان استام ءىس-شارا ءوتتى. اتاپ ايتساق, keynote-باياندامالار جاسالىپ, پانەلدىك پىكىرتالاس, پيتچينگ-سەسسيالار ۇيىمداستىرىلدى, جاساندى ينتەللەكتىنىڭ مەملەكەتتىك باسقارۋ, ينۆەستيتسيا, ءبىلىم بەرۋ, مەديتسينا, مادەنيەت, ەكوتەحنولوگيا, بيومەتريا جانە ت.ب. سالالارداعى قولدانىلۋى تالقىلاندى.
«Astana نub» مالىمەتىنشە, قازىر قازاقستان «ەلەكتروندىق ۇكىمەتتى» دامىتۋ بويىنشا الەمدە 24-ءشى, ونلاين قىزمەتتەر بويىنشا 10-شى ورىندا تۇر. 20 جوعارى وقۋ ورنىندا جاساندى ينتەللەكت باعدارلامالارى ىسكە قوسىلعان. شامامەن 500 مىڭ ادام جاساندى ينتەللەكت نەگىزدەرى, ونىڭ ىشىندە AI Qyzmet, AI Sana, Tomorrow school, QazCoders سياقتى باعدارلامالار بويىنشا ءبىلىم الىپ جاتىر.
