كورمەنى مۋزەي ديرەكتورىنىڭ مىندەتىن اتقارۋشى سەرجان ساروۆ اشىپ, ۇلتىمىزدىڭ رۋحاني دۇنيەسىندەگى شوقتىعى بيىك, قايتالانباس تۋىندىلار قالدىرعان كورنەكتى اقىننىڭ شىعارماشىلىعى حالقىمىزدىڭ تاعىلىمى مول, باي قازىناسى ەكەنىن اتاپ ءوتتى.
سونداي-اق ءال-فارابي اتىنداعى قازاق ۇلتتىق ۋنيۆەرسيتەتى جانىنداعى اباي عىلىمي-زەرتتەۋ ينستيتۋتىنىڭ ديرەكتورى, جانعارا دادەباي ۇلى, قازاق ۇلتتىق قىزدار پەداگوگيكالىق ۋنيۆەرسيتەتىنىڭ پروفەسسورى رۋدا زايكەنقىزى, فيلوسوفيا, ساياساتتانۋ جانە ءدىنتانۋ ينستيتۋتىنىڭ باس عىلىمي قىزمەتكەرى باقىتجان مەڭلىبەك ۇلى, ءال-فارابي اتىنداعى قازۇۋ جانىنداعى اباي عىلىمي-زەرتتەۋ ينستيتۋتىنىڭ جەتەكشى عىلىمي قىزمەتكەرى ءلايلا مۇسالى, يران يسلام رەسپۋبليكاسى باس كونسۋلدىعىنىڭ مادەني اتتاشەسى حوسسەين اعازادە اباي مۇراسى تۋرالى پايىمدى پىكىر ايتىپ, حاكىمنىڭ رۋحاني قازىناسى ماڭگىلىك تاۋسىلمايتىن تاقىرىپ ەكەنىن تىلگە تيەك ەتتى. عالىمدار اباي شىعارمالارىن وقۋ, ءبىلۋ, تانۋ, جاڭعىرتۋ مەن ناسيحاتتاۋ تەك قازاق حالقىنىڭ عانا ەمەس, جالپى تۇركى دۇنيەسىنىڭ تاريحي بورىشى ەكەنىنە ەرەكشە توقتالدى.
كورمەدە اباي قۇنانباي ۇلىنا قاتىستى قولجازبالار, كىتاپ باسىلىمدارى جانە ول تۋرالى جازىلعان شىعارمالار ۇسىنىلدى. ەكسپوزيتسيادا بۇگىنگى كۇنى عالىمدار تاراپىنان ابايدىڭ ءوز ەڭبەگى دەپ تانىلعان ء«بىراز ءسوز قازاقتىڭ ءتۇبى قايدان شىققاندىعى تۋرالى» اتتى بىرەگەي تۋىندىسى, اقىن شىعارمالارى جيناقتالعان مۇرسەيىت بىكە ۇلىنىڭ (1860–1917) قولجازباسى, تۇراعۇل اباي ۇلىنىڭ (1875–1934) «قازاقتىڭ اتاقتى اقىنى اباي قۇنانباي ۇلى» اتتى قولجازباسى, سونداي-اق كاكىتاي مەن تۇراعۇل 1909 جىلى سانكت-پەتەربۋرگتە باستىرىپ شىعارعان «قازاق اقىنى يبراھيم قۇنانباي وعلىنىڭ ولەڭى» اتتى ەرەكشە باسىلىم كوپشىلىك نازارىنا ۇسىنىلدى.
سونىمەن قاتار كورمەدەن اقىننىڭ بەيبىشەسى ءدىلدانىڭ دومبىراسىن, بۇركىتىنىڭ بالداعى مەن توعىزقۇمالاعىن, ءىنىسى ىسقاقتىڭ بورىگىن, كىشى ءىنىسى وسپاننىڭ اسىراپ العان قىزى مانسۋرانىڭ كامزولىن, سونداي-اق ۇرپاعى ازات ءارحام ۇلى ىسقاقوۆ, سەمەيدەگى ابايدىڭ مەملەكەتتىك قورىق-مۋزەيى مەن ءا.م. جيرەنشين تاراپتارىنان قۇراستىرىلعان اباي اۋلەتى مەن تۋىستارى جونىندەگى شەجىرەلەردى جانە بىرنەشە تىڭ تاريحي فوتوسۋرەتتەردى كورۋگە بولادى.
كورمەدە حاكىمنىڭ اۋلەتى, بالالىق شاعى, قورشاعان ورتاسى مەن ءومىربايانىن تانىستىراتىن ارنايى ستەندتەر, فوتوماتەريالدار مەن مۇراعات قۇجاتتارى قويىلعان. اتاپ ايتقاندا, ابايدىڭ ۇلى ماعاۋياعا 1896 جىلى جازعان حاتى, اقىننىڭ ءوز قولى قويىلعان قۇجاتتار, 1903 جىلى بەرىلگەن مىنەزدەمە, ءومىر دەرەكتەرىنە قاتىستى كوشىرمەلەر, كىتاپتار جانە اقىن ءداۋىرىنىڭ كەلبەتىن بەينەلەيتىن جادىگەرلەر ەرەكشە ورىن الدى.
"ابايدىڭ ءومىرى مەن مۇراسى كەيىنگى ۇرپاق ءۇشىن ادىلەتتىلىك پەن ادامگەرشىلىكتىڭ, اسقاق رۋح پەن كەمەل پاراساتتىلىقتىڭ جارقىن ۇلگىسى بولىپ قالا بەرمەك. ونىڭ ار ىلىمىندە, قارا سوزدەرىندە ادامشا ءومىر ءسۇرۋدىڭ ۇلگى-ونەگەسى جاتىر",- دەيدى سەرجان ساروۆ.
