سۋرەتتى تۇسىرگەن – ەرلان ومار, «EQ»
ولاردىڭ قاتارىندا امىرە اتىمەن تانىلعان ءانشى ەرنار سادىرباي, حالىقارالىق دودالاردا توپ جارعان ەرجان ماكسيم, بيىلعى «سلاۆيان بازارى» بايقاۋىنىڭ گران-پري يەگەرى الماگۇل باتتاليەۆا سەكىلدى تانىمال ونەرپازدار بار. كەزدەسۋ بارىسىندا ءبىرشاما ماسەلە تالقىلانىپ, ونەردىڭ كەشەگىسى مەن بۇگىنى توڭىرەگىندە اڭگىمە قوزعالدى.
– بۇگىن مەرەكە قارساڭىندا ەل مادەنيەتىنىڭ دامۋىنا ۇلەس قوسىپ جۇرگەن جاستارمەن كەزدەسىپ وتىرمىز. سىزدەردىڭ حالىقارالىق دەڭگەيدەگى جەتىستىكتەرىڭىز — ەلىمىزدىڭ ابىرويى مەن بەدەلى. ءار ونەرپازدىڭ ەڭبەگى مەن دارىنىن جوعارى باعالايمىن. ەل مەن جەرگە, ءوز ىسىنە دەگەن سۇيىسپەنشىلىك وسىنداي جەڭىسكە جەتەلەيدى. سىزدەردى تاربيەلەگەن اتا-انالارىڭىز بەن ۇستازدارىڭىزعا العىس بىلدىرەمىن. ويتكەنى ولاردىڭ سىزدەردى ونەرگە باۋلىپ, تاڭداۋلارىڭىزدى قولداۋدا ەڭبەگى زور, – دەدى ايدا عالىمقىزى.
ءىس-شاراعا ۇزدىك وپەرا انشىلەرى, شەتەلدەگى بايقاۋلاردا تانىلىپ جۇرگەن دومبىراشىلار مەن بيشىلەر قاتىستى. سونىڭ ءبىرى – يتاليادا وتكەن حالىقارالىق وپەرا بايقاۋىنىڭ جەڭىمپازى, 70-تەن استام الەمدىك بايقاۋدا ەل نامىسىن قورعاعان وپەرا ءانشىسى ايگەرىم التىنبەك.
– اللاعا شۇكىر, وسىنداي كەرەمەت جەتىستىكتەرگە جەتىپ, ونەرىمىزدى شىڭداپ كەلەمىز. ءوزىمدى ۇستازدان جولى بولعان ادام دەپ ەسەپتەيمىن. ۋنيۆەرسيتەت قابىرعاسىندا بولسىن, كوللەدجدە بولسىن بىلىكتى ۇستازداردان ساباق الدىق. ونەرپازدىڭ اتا-اناسى, وسكەن ورتاسى, جاقسى ۇستازدارى قابىسقاندا عانا تولىققاندى تۇلعا شىعادى دەپ ويلايمىن. وسىلاي ونەرىمىز ارقىلى ەلىمىزدى الەمگە تانىتىپ, اسقاق بيىكتەردى باعىندىرىپ, العا قارىشتاي بەرەيىك, – دەدى ءا.التىنبەك.
ءىس-شارادا ونەردەگى بۇگىنگى ماسەلەلەر مەن تالاپ-تىلەكتەر ايتىلدى.
– كەيدە تويلارعا بارعان كەزدە ەسكى اندەر دە شىرقالادى. قاراپايىم حالىق سولاردى ابدەن تىڭداپ ۇيرەنگەن. وپەرا دەسە, برۋسيلوۆسكيدىڭ مۇرالارى ەسكە تۇسەدى. قازىر ءبارىمىز ايتاتىنداي جاڭا اندەردى تابۋ قيىن. ماسەلەن, ەسكەندىر اعامىزدىڭ «اتامەكەنىندەي» جالپى حالىققا بەلگىلى ءارى ەسكىرمەيتىن ءان شىعارۋىمىز كەرەك. وسىنشاما كەڭىستىكتى يگەرە العان بابالارىمىزدىڭ ۇلتتىق ونەرىنە سۇيەنىپ, بولاشاقتىڭ كادەسىنە جارايتىنداي زاماناۋي دۇنيەلەر تۋدىرۋىمىز كەرەك.
الپاۋىت دەمەسەك تە, حالىقارالىق دەڭگەيدە بەدەلى بار ەل بولدىق. نۇرعيسا اعامىزدىڭ عاجايىپ كۇيلەرىن قايتا-قايتا ايتامىز, بىراق بىزگە بۇگىن جاڭا نۇرعيسالار قاجەت. ەلىمىزدىڭ ونەرىن بايىتىپ, ەلگە سىڭەتىن جاڭا دۇنيەلەر تۋدىرساق, سول جەتىستىگىمىز, – دەدى مينيستر ايدا عالىمقىزى.
القالى وتىرىستان سوڭ ونەرپازدار ارنايى العىسحاتپەن ماراپاتتالىپ, ەستەلىك سۋرەتكە ءتۇستى.
