سالتاناتتى كەشكە مادەنيەت جانە اقپارات ءمينيسترى ايدا بالاەۆا قاتىستى.
مينيستر مەملەكەت باسشىسى قاسىم-جومارت توقاەۆتىڭ قۇتتىقتاۋىن جەتكىزدى.
پرەزيدەنت قۇتتىقتاۋىندا ءانشىنى وتاندىق ونەردىڭ ەڭ جارقىن وكىلدەرىنىڭ ءبىرى, ەرەكشە داۋىس يەسى رەتىندە اتاپ ءوتتى.
ء«سىز ايگىلى وتاندىق جانە الەمدىك وپەرالىق تۋىندىلار مەن ليريكالىق اندەردى شەبەر ورىنداپ, كورەرمەننىڭ ىستىق ىقىلاسىنا بولەنىپ ءجۇرسىز. ەرەكشە تابيعي دارىنىڭىز جانە تىنىمسىز ەڭبەگىڭىز ارقىلى ەلىمىزدىڭ مادەني-رۋحاني بايلىعىنىڭ ءورىسىن كەڭەيتۋگە قوسقان ۇلەسىڭىز وتە مول. كەمەل ءبىلىمىڭىز بەن بويىڭىزداعى اسىل قاسيەتتەرىڭىزبەن زامانداستارىڭىزدىڭ ورتاسىندا سىي-قۇرمەتكە بولەنىپ ءجۇرسىز», دەلىنگەن مەملەكەت باسشىسىنىڭ قۇتتىقتاۋ حاتىندا.
ءيا, تالانتتى ادامداردى وزگەلەردەن دارالاپ تۇراتىن وزىندىك ەرەكشەلىگى بولادى. قازاقستاننىڭ ەڭبەك سىڭىرگەن قايراتكەرى, ءانشى, پروفەسسور تولقىن زابيروۆانىڭ دا ءان الەمىندە وزىندىك قولتاڭباسى بار. ول – ەلىمىزدىڭ ۇلكەن ساحنالارىنا ەسترادا مەن وپەرا جانرىنىڭ كوللابوراتسياسىن الىپ شىققان العاشقى ءانشى. ونەر يەسىنىڭ ورىنداۋىنداعى «ەگىز لەبىز», «ومىرگە عاشىقپىن», «قارا ماعان», «ماڭگىلىك ماحاببات», «سەن ءۇشىن», «ساعىندىم سەنى» سىندى اندەرى ءالى كۇنگە دەيىن كورەرمەننىڭ قۇلاعىندا.
قازاقتىڭ بۇلبۇل ءانشىسى, قسرو حالىق ءارتىسى بيبىگۇل تولەگەنوۆادان كاسىبي ءتالىم الىپ, ۇلكەن ساحنالاردى باعىندىرعان ءانشىنىڭ تۋما تالانتى قاي كەزدە دە ىشكى تەرەڭدىك ءھام بيىك تالعاممەن دارالانادى. ونىڭ ەرەكشە داۋىسى شىعىس نازىكتىگى مەن دالا ءۇنىنىڭ دارالىعىن ءبىر ارنادا توعىستىرىپ, ءار ءانى جۇرەكتەرگە شەكسىز ماحاببات پەن رۋحاني كەمەلدىكتى پاش ەتەتىندەي. ءانشىنىڭ ورىنداۋىنداعى تۋىندىلاردا ومىرگە, ماحابباتقا, تۋعان جەرگە, ادامگەرشىلىك پەن رۋحاني تازالىققا دەگەن سۇيىسپەنشىلىك ايقىن كورىنىس تابادى. ءبىر سوزبەن ايتقاندا, تولقىن زابيروۆا – قازاق مۋزىكا مادەنيەتى ءۇشىن كوپقىرلى تۇلعا. ول ونەردە, ساحنادا عانا ەمەس, عىلىمي-پەداگوگيكالىق سالادا دا تابىستى قىزمەت ەتىپ كەلەدى. ونىڭ داۋىسى مەن ءان ءستيلى حالىقتىق داستۇرمەن, كلاسسيكالىق ۆوكالدىق تاسىلدەرمەن ءارى زاماناۋي ەسترادامەن شەبەر ۇندەسەدى. سونىمەن قاتار ول – جاس تالانتتاردى قولداۋ ارقىلى ونەر الەمىندە ءوزىن ۇستاز رەتىندە دالەلدەگەن دارا دارىن يەسى. بۇل ءانشىنىڭ كاسىبي بىلىكتىلىگىن ءارى كەڭەيتىپ, ءارى نىعايتادى.
«كوزىنىڭ تىرىسىندە انام وسى كونتسەرتتى كورۋدى ارماندادى. بىراق, وكىنىشكە قاراي, بۇل كۇنگە جەتە المادى. بۇگىن انامنىڭ ارمانى ورىندالعان كۇن. اناما دەگەن ماحاببات ماڭگىلىك جۇرەگىمدە ءومىر سۇرەدى. بيىگىنە قوندىرسا دا, ايازىنا توڭدىرسا دا, مەن ومىرگە عاشىقپىن! ءومىردىڭ ءمانى – ماحاببات! جۇرەكتىڭ ءانى – ماحاببات! ال مەن شەكسىز ماحابباتتى انامنىڭ مەيىرىمىنەن ءسىڭىردىم. سول شۋاقتى بۇگىن سىزدەرگە ارنايمىن», دەپ اعىنان اقتارىلىپ, ساحنادا جان سىرىمەن بولىسكەن ءانشى استانا تورىندە وتكەن كەرەمەت كەشىندە ەل قۇلاعىندا جاتتالعان ەسكى اندەرمەن قاتار, جانعا جاعىپ, جۇرەككە جەتكەن جاڭا تۋىندىلارىن دا تارتۋ ەتتى. وسىلايشا, ونەر يەسى تىڭدارمانىن ساحناداعى 35 جىلدىق مەرەيلى بەلەسىنىڭ قۇندىلىعىنا بويلاتتى.
2024 جىلى تولقىن زابيروۆا «پاراسات» وردەنىمەن ماراپاتتالدى.
