تۇركىستان وبلىسى, جەتىساي اۋدانى تالاپتى اۋىلىنداعى سابىرحان اسانوۆ اتىنداعى №38 جالپى ءبىلىم بەرەتىن مەكتەپتىڭ مۇعالىمى دانا ەرماحانقىزى مەكتەپ باعدارلاماسىن جاساندى ينتەللەكت مۇمكىندىگىمەن تولىقتىرۋعا تالپىنىپ كەلەدى. ورىس ءتىلى مەن ادەبيەتى ءپانىنىڭ مۇعالىمى بولىپ ەڭبەك ەتىپ جۇرگەن جاس ماماننىڭ ىزدەنىسى دە ءوز ناتيجەسىن بەرىپ وتىر. كەيىپكەرىمىزبەن كەزدەسپەي تۇرىپ ونىڭ جاڭاشىلدىعىمەن حاباردار بولعانبىز: 2023 جىلى وبلىستىق دەڭگەيدەگى كوپ جيىنداردىڭ بىرىندە دانا ەرماحانقىزى «پەداگوگيكالىق يدەيالار پانوراماسىنا» قاتىسىپ, ءوزىنىڭ اۆتورلىق ەلەكتروندى كىتاپشاسىن تانىستىردى. باس-اياعى 15 بەتتەن تۇراتىن ەلەكتروندى كىتاپشادا 45 مينۋتقا سوزىلاتىن ءپان ساباعىن جي-مەن ينتەگراتسيالاۋ ءۇشىن الەمدىك دەڭگەيدەگى 35 ءتۇرلى پلاتفورمانى پايدالانىپ, سىلتەمەسىن قوسا بەرگەن. قازىر بۇل كىتاپشا اۋدان مۇعالىمدەرى اراسىندا نۇسقاۋلىق رەتىندە پايدالانىلىپ ءجۇر.
دانانىڭ ايتۋىنشا, كىتاپشا – تۇساۋكەسەر جاساۋعا ارنالعان دايىن شابلونداردىڭ سىلتەمەلەرىن ءبىر جەرگە جيناقتاۋ ماقساتىندا ازىرلەنگەن. «بۇگىندە جاساندى ينتەللەكت تەك عىلىم مەن تەحنولوگيانىڭ سالاسى عانا ەمەس, ول – كەز كەلگەن ادامنىڭ, اسىرەسە وقۋشىلار مەن مۇعالىمدەردىڭ دامۋىنا قاجەتتى قۇرال. مەنىڭ ويىمشا, جاساندى ينتەللەكت تەحنولوگيالارىن وقۋ ۇدەرىسىنە ەنگىزۋ – بالانىڭ ويلاۋ قابىلەتىن كەڭەيتىپ, ونى اقپاراتتى جاي عانا قابىلداۋشى ەمەس, زەرتتەۋشى جانە جاڭاشىل يدەيالاردىڭ گەنەراتورى ەتۋگە مۇمكىندىك بەرەدى. مەن ەنگىزگەن 3D مودەلدەۋ, بجب جانە تجب قۇرالدارىن جاساندى ينتەللەكتپەن بايلانىستىرا وتىرىپ پايدالانۋ – ءبىلىم بەرۋ جۇيەسىن جاڭا دەڭگەيگە كوتەرەدى. 3D مودەلدەۋ وقۋشىلارعا كەڭىستىكتىك ويلاۋ, شىعارماشىلىق جانە تەحنيكالىق داعدىلاردى دامىتۋعا كومەكتەسەدى. بۇل بولاشاقتا ينجەنەريا, مەديتسينا, ارحيتەكتۋرا سياقتى ماڭىزدى سالالارعا جول اشادى», دەيدى دانا.
پرەزەنتاتسيا جاساۋ كەزىندە ۋاقىت ۇنەمدەۋ, ساپالى ءارى كاسىبي ديزاين تاڭداۋ ماڭىزدى. سوندىقتان بۇل جيناق ءارتۇرلى تاقىرىپ پەن ستيلدەرگە ارنالعان پرەزەنتاتسيا شابلوندارىنا تەز ءارى وڭاي قول جەتكىزۋگە كومەكتەسەدى. كىتاپشادا ءار سايتتىڭ ەرەكشەلىكتەرى, شابلون تۇرلەرى مەن قولدانۋ ادىستەرى تۋرالى اقپارات ۇسىنىلادى. بۇل پايدالانۋشىلارعا ءوز قاجەتتىلىكتەرىنە ساي ەڭ ءتيىمدى جانە ىڭعايلى پلاتفورمانى تاڭداۋعا مۇمكىندىك بەرەدى.
– ديداكتيكالىق ويىندار – بالالاردىڭ تانىمدىق بەلسەندىلىگىن ارتتىرۋعا, ولاردىڭ ويلاۋ, ەستە ساقتاۋ, زەيىن قويۋ قابىلەتتەرىن دامىتۋعا باعىتتالعان ارنايى ۇيىمداستىرىلعان ويىن تۇرلەرى. بۇل ويىندار وقۋ ۇدەرىسىن قىزىقتى, جەڭىل جانە ءتيىمدى ەتىپ وتكىزۋگە كومەكتەسەدى. بالالاردىڭ جاڭا ءبىلىمدى مەڭگەرۋىن جەڭىلدەتەدى, ولاردى شىعارماشىلىققا, ىنتىماقتاستىققا جانە وزىندىك ويلاۋعا ۇيرەتەدى. ديداكتيكالىق ويىندار بەلگىلى ءبىر ماقساتپەن, الدىن الا جوسپارلانعان ەرەجەلەر نەگىزىندە وتكىزىلەدى. ولار ساباق بارىسىندا نەمەسە ساباقتان تىس ۋاقىتتا ۇيىمداستىرىلۋى مۇمكىن. مۇنداي ويىندار ارقىلى بالالار اقپاراتتى تەز ءارى جەڭىل قابىلدايدى, ويتكەنى ولار بەلسەندى ارەكەت ەتىپ, وزدەرى تاجىريبە جاسايدى,– دەدى دانا بىزبەن اڭگىمەسىندە.
دانا ەرماحانقىزىنىڭ جاساندى ينتەللەكتىگە قىزىعۋشىلىعى 2022 جىلى قاجەتتى زاماناۋي پلاتفورمالاردى زەرتتەۋدەن باستالعان. بالالار سول ساتتە-اق 45 مينۋتتى پىكىرتالاس كلۋبىنا اينالدىرىپ جىبەرىپتى. «قازىرگى بالالار ىشتەن ءبىلىپ تۋعان. ولاردىڭ بارلىق سالادان بازالىق بولماسا دا ەكتسيكلوپەديالىق حابارى بار. شاكىرتتى جاتتاندى لەكتسيامەن سىنىپتا بايلاپ وتىرا المايسىڭ. ولارعا بالا دەپ قاراماي, ونى تۇلعا دەپ قاراعاندا عانا ەكى ارادا تەڭ بايلانىس ورنايدى. جي ۇستازدىڭ ورنىن الماستىرا المايدى ەكەن. ول ۇستازدىڭ يدەياسىن قازىرگى تەحنولوگيامەن جالعاستىراتىن كوپىر. تەحنولوگيا دامىپ كەتتى. جي-مەن بىرگە كوپتەگەن ماماندىقتىڭ جويىلىپ كەتەتىنى ايتىلىپ جاتىر. ال ۇستاز بەن شاكىرت اراسىنداعى بايلانىستى جي الماستىرا المايدى. ءبىز ونىڭ مۇمكىندىگىن قولدانىپ, بالاعا قانداي اقپارات كەرەك ەكەنىن انىقتايمىز», دەيدى دانا.
جاس مامان جاساندى ينتەللەكتىنىڭ ءتىلىن تاۋىپ, ەڭ سەنىمدى كومەكشىسىنە اينالدىرىپ ۇلگەرىپتى. جي شاكىرتتەرىن سىني تۇرعىدا ويلاۋعا باۋليدى. ءتىپتى پايىمى مەن بولمىسىنا دا سىن كوزبەن قاراۋدى ۇيرەتەدى.
– شاكىرتتەرىمە جاساندى ينتەللەكت بەرگەن جاۋاپقا سوقىر سەنىممەن قاراماۋ كەرەكتىگىن, ءبىر مەزگىلدى بىرنەشە دەرەككوزدى سالىستىرىپ ۇيرەنۋ كەرەكتىگىن ءجيى ايتامىن. الداعى ۋاقىتتا ەلەكتروندى كىتاپشامداعى ايتىلعان يدەيالاردى بارلىق سالامەن بايلانىستىرعىم كەلەدى. ەگەر بارلىق سەگمەنتتە, ءتىپتى جۋرناليستيكا سالاسىندا بولسا دا بارلىق پلاتفورماداعى جاڭالىقتاردى ۇنەمى جاڭارتىپ, قاجەتتى سىلتەمەلەردى دە ءبىر جەرگە جيناقتاپ وتىراتىن دەڭگەيگە كوتەرسەم, زاماناۋي پلاتفورمالاردىڭ جيىنتىعىن دا ءبىر پلاتفورماعا توپتاستىراتىن ەدىم, – دەدى جاڭاشىل مۇعالىم.
بۇل كىتاپشى ۇستازدارعا پرەزەنتاتسيا جاساۋعا ارنالعان دايىن شابلونداردىڭ سىلتەمەلەرىن ءبىر پلاتفورمادا جيناقتاۋ ءۇشىن جاسالدى. سەبەبى بۇل كەزدە ۋاقىتتا ۇنەمدەۋ ماڭىزدى. كىتاپشادا ءار سايتتىڭ ەرەكشەلىكتەرى تۋرالى دا قوسىمشا اقپارات بەرىلەدى. كەيدە شەتەلدىك پلاتفورمالارعا سىلتەمە جاسالىپ, اعىلشىن تىلىنەن قازاق تىلىنە جاتىق جانە تۇسىنىكتى تىلدە اۋدارىپ بەرۋگە تىرىسادى.
دانا شاكىرتتەرىنە ەشقاشان بالا دەپ قاراعان ەمەس. ولاردىڭ اقپاراتتى جىلدام قابىلدايتىن قابىلەتى كەيدە ۇستازدارىنا دا ۇلگى بولىپ جاتادى. ء«بىر-بىرىمىزدەن ۇيرەنەرىمىز كوپ», دەيدى جاس ۇستاز. دانانىڭ ەرتەڭگى ساباققا دەگەن دايىندىعى جاڭا پلاتفورمالاردى زەرتتەۋدەن باستالاتىنىن ايتا كەتۋ كەرەك. جاڭا پلاتفورمانى مەڭگەرۋ ءۇشىن كەيدە 1 ساعات, كەيدە جارتى ساعات كەتەدى. مەكتەپتە ءار سارسەنبى – ءادىس الماسۋ كۇنى بولىپ بەلگىلەنگەن. وسى كۇنى دانا ەرماحانقىزى ارىپتەستەرىنە ءوزىنىڭ ۇيرەنگەن جاڭا قۇرالدارى مەن تاجىريبەسىن تانىستىرادى. قازىردە ول جاساندى ينتەللەكت قۇرالدارىن كەڭىنەن ناسيحاتتاۋ جانە ءبىلىم ساپاسىن ارتتىرۋ ماقساتىندا ن.تورەقۇلوۆ, ىنتىماق, ەڭبەك جانە №76 مەكتەپتەرىنىڭ ۇستازدارىمەن تاجىريبە الماسىپ ءجۇر.
تۇركىستان وبلىسى
