«كەلەشەك مەكتەپ – كەدەرگىسىز ورتا» اتتى EduFest ءىس-شاراسىنا 100-گە جۋىق اتا-انا, 200-دەن استام وقۋشى مەن ۇستاز قاتىستى. قاتىسۋشىلار زاماناۋي ءبىلىم ورداسىنىڭ قۇرىلىمىمەن, وقۋ پروتسەسىنىڭ ەرەكشەلىكتەرىمەن جانە جاڭا فورماتتاعى وقۋ كەڭىستىگىنىڭ مۇمكىندىكتەرىمەن تانىستى.
بۇل – اباي وبلىسىنداعى ءتورتىنشى «كەلەشەك مەكتەبى». 600 ورىنعا ارنالعان ءۇش قاباتتى جاڭا عيماراتتىڭ قۇرىلىسى تولىق اياقتالىپ, ەكىنشى توقساندا وقۋشىلاردى قابىلداۋعا دايىن. مەكتەپتە 30 ءپان كابينەتى, 6 زەرتحانا, سپورت جانە اكت زالى, كىتاپحانا مەن وقۋ زالى بار. وقۋ پروتسەسى ءبىر اۋىسىمدا جانە تولىقتاي مەملەكەتتىك تىلدە جۇرگىزىلەدى.
EduFest بارىسىندا مەكتەپ كەڭىستىگى زەرتحانالىق جانە تاجىريبەلىك ساباق الاڭىنا اينالدى. قاتىسۋشىلار جاراتىلىستانۋ, ماتەماتيكا, اعىلشىن ءتىلى, كوركەم ەڭبەك سياقتى پاندەردەن وتكىزىلگەن اشىق ساباقتارعا قاتىسىپ, جاڭا وقۋ ورداسىنىڭ ارتىقشىلىقتارىن ءوز كوزدەرىمەن كوردى.
وقۋشىلاردىڭ ءبىرى ارۋجان كابدۋلماراتوۆا, جاڭا مەكتەپتىڭ زەرتحانالىق مۇمكىندىكتەرى ەرەكشە اسەر قالدىرعانىن ايتتى.
- ماعان ەڭ ۇناعانى – حيميا زەرتحاناسى. بۇرىن تەك سۋرەتتەن كورەتىن تاجىريبەلەردى ءوز قولىممەن جاساپ كوردىم. ساباقتىڭ قىزىقتى وتەتىنىنە كوزىم جەتتى. وسىنداي مەكتەپتە وقيتىنىما قۋانىشتىمىن, – دەدى ول.
ال 11-سىنىپ وقۋشىسى باقنۇر بەرىكبولوۆ جاڭا تەحنولوگيالىق سىنىپتاردىڭ وقۋعا دەگەن ىنتانى ارتتىراتىنىن اتاپ ءوتتى.
- ينفورماتيكا مەن روبوتوتەحنيكا كابينەتى ەرەكشە ۇنادى. قۇرال-جابدىقتار جاڭا, جوبالار جاساۋعا بارلىق مۇمكىندىك بار. بيولوگيا زەرتحاناسىنداعى ميكروسكوپتار دا زاماناۋي. بۇرىن تاجىريبە جاساۋ از بولسا, مۇندا ساباقتىڭ ءوزى تاجىريبەگە نەگىزدەلگەن. مۇنداي ورتادا وقۋعا دا, ىزدەنۋگە دە ىنتا ارتادى, – دەيدى ول.
مۇعالىمدەر دە جاڭا كەڭىستىكتىڭ وقۋ پروتسەسىنە سەرپىن بەرەتىنىن اتاپ وتۋدە. ينفورماتيكا ءپانىنىڭ مۇعالىمى اسەل نۇرلانوۆنا بۇل مەكتەپتىڭ وقىتۋ ءتاسىلىن تۇبەگەيلى وزگەرتەتىنىن ايتادى.
- بۇرىن تەك تاقتا مەن داپتەر بولسا, ەندى وقۋشى ءوز ويىن تاجىريبە ارقىلى دالەلدەي الادى. بۇل – مۇعالىم شىعارماشىلىعىن ارتتىرىپ, وقۋشىنىڭ ويلاۋ كوكجيەگىن كەڭەيتەتىن ورتا. ناعىز جاڭا ءداۋىر مەكتەبى, – دەدى ۇستاز.
اعىلشىن ءتىلى ءپانىنىڭ مۇعالىمى ايگۇل تولەۋبەكقىزى دا مەكتەپتىڭ باستى ەرەكشەلىگى – زەرتتەۋ مادەنيەتىن دامىتۋعا جاعداي جاسالعانىن اتاپ ءوتتى.
- كەلەشەك مەكتەبى – جاڭا ويلاۋ مەن زەرتتەۋ مادەنيەتىنىڭ ورتالىعى. مۇندا ءار بالانىڭ قىزىعۋشىلىعىن اشۋعا مۇمكىندىك بار. وقۋشىلار ەركىن ويلاپ, ءوز ويىن دالەلدەۋگە ۇيرەنەدى, – دەيدى ول.
اتا-انالار دا جاڭا مەكتەپتىڭ جايلىلىعى مەن مۇمكىندىكتەرىنە ريزاشىلىق ءبىلدىردى. ماسەلەن, جانات ەراليەۆا مۇنداي ءبىلىم ورداسى كوپتەن كۇتكەن ارمان بولعانىن ايتتى.
- بۇرىن مۇنداي مەكتەپ ارمان ەدى. ەندى بالالارىمىز زاماناۋي, جارىق ءارى جىلى عيماراتتا وقيدى. بالام قالا ورتاسىنداعى مەكتەپكە قاتىناپ جۇرەتىن, ەندى ءۇيدىڭ جانىندا وسىنداي جايلى مەكتەپ بار – بۇل ءبىز ءۇشىن ۇلكەن قۋانىش, – دەدى ول.
ال دانا بايانباەۆا مەكتەپ ينفراقۇرىلىمىنىڭ بالاعا قولايلى ەتىپ جاسالعانىن ەرەكشە اتاپ ءوتتى.
- اباتتاندىرىلعان اۋلاسى, كەڭ سىنىپتارى, جايلى اسحاناسى – ءبارى بالانىڭ ىڭعايى ءۇشىن جاسالعان. وسىنداي مەكتەپتە وقيتىن بالا باقىتتى بولادى دەپ سەنەمىن. مۇنداي مەكتەپتەر – كەلەشەككە جاسالعان ينۆەستيتسيا, – دەدى اتا-انا.
ءىس-شارا سوڭىندا وقۋشىلار ابايدىڭ 180 جىلدىعىنا ارنالعان كورىنىس قويىپ, ولەڭ مەن قارا سوزدەر وقىدى, ءان شىرقادى. مەكتەپ فويەسىندە «بولاشاق قابىرعاسى» ينتەراكتيۆتى ايماق ۇيىمداستىرىلىپ, قوناقتار ءوز تىلەكتەرىن جازىپ قالدىردى.
اياگوزدەگى جاڭا «كەلەشەك مەكتەبى» ءبىلىم ورداسى عانا ەمەس, بالانىڭ قىزىعۋشىلىعىن وياتاتىپ, ۇستازدىڭ شابىتىن ارتتىراتىن, اتا-انانىڭ سەنىمىن نىعايتاتىن ورتاعا اينالىپ وتىر. بۇل – ايماقتىڭ ءبىلىم بەرۋ كەڭىستىگىندەگى جاڭا ساپالى كەزەڭنىڭ ايعاعى.
