تاسبوگەت كەنتىندەگى س.مايقانوۆا اتىنداعى مادەنيەت ءۇيى قالا تاريحىنداعى ءبىر بەلەس سانالاتىن كەزەڭنىڭ عاسىرلىق تويىنا تاماشا تارتۋ جاسادى. كەنتتەگى كەڭ الاڭدا تىزىلە وتىرعان 100 بالا قۇرمانعازىنىڭ «بالبىراۋىن» كۇيىن ورىندادى. ۇلتتىق ونەردى دارىپتەگەن ۇلاندار مەرەكە قارساڭىندا قالالىقتارعا رۋحاني ازىق سىيلادى.
مادەنيەت ءۇيىنىڭ نۇسقاۋشىسى سانىمكۇل قايىڭباەۆانىڭ ايتۋىنشا, بۇل بالالاردىڭ ءبارى دومبىرا ۇيىرمەسىنە قاتىسادى ەكەن. ولاردىڭ قاتارىندا №11, 257, 172, 176 مەكتەپ وقۋشىلارى مەن مادەنيەت ءۇيى جانىنداعى «بالبىراۋىن», «سالاماتتى جاستار» شىعارماشىلىق ورتالىعىنداعى ۇيىرمە مۇشەلەرى بار.
ءجۇز جىلدىققا ارناعان ءجۇز بالانىڭ كۇيى كوشەنى كۇمبىرلەتىپ, كورەرمەن قاتارى ءسات ساناپ كوبەيە بەردى. «ۇيىرمەگە قاتىسۋشىلار اۋەلى كۇي الىپپەسىن «بالبىراۋىننان» باستايتىنى بەلگىلى عوي. ونى تارتقان ادام دا, تىڭداعان جان دا ارقالانىپ, ايبارلانىپ كەتەتىنى انىق. سوندىقتان 100 بالانىڭ 100 جىلدىققا تارتۋى وسى كۇي بولعانىن دۇرىس كوردىك. مۇنداي ءىس-شارا كەلەشەكتە دە ۇيىمداستىرىلماق», دەيدى س.مايقانوۆا اتىنداعى مادەنيەت ءۇيىنىڭ نۇسقاۋشىسى.
قىزىلوردا
