دارىگەر تاپشىلىعى ازايىپ كەلەدى

وڭىرلەردەگى قاجەتتىلىكتەر ەسكەرىلىپ, بيىل 5 مىڭنان استام ءبىلىم گرانتى ءبولىندى. 2024 جىلدىڭ قازان ايىنان بەرى 16 تاپشى ماماندىق بويىنشا اۋىلداردا جۇمىس ىستەپ جۇرگەن 254 دارىگەر 8,5 ملن تەڭگە كولەمىندە ءبىر رەتتىك تولەم العان. 2025 جىلى تاعى 105 مامانعا وسىنداي قولداۋ كورسەتىلدى.

دارىگەر تاپشىلىعى 19%-عا, ورتا ساناتتى مەديتسينا قىزمەتكەرلەرى تاپشىلىعى 13%-عا ازايدى. اۋىلدىق جەرلەردەگى كادر تاپشىلىعى 17%-عا تومەندەدى.

1 قىركۇيەكتەن باستاپ التى نەگىزگى باعىت بويىنشا (ونىڭ ىشىندە تەراپيا, پەدياتريا جانە حيرۋرگيا) ينتەرناتۋرادا, سونداي-اق پەدياتريا باعىتىنداعى 14 ماماندىق بويىنشا رەزيدەنتۋرادا وقىتۋ باستالدى.

قاراعاندى مەديتسينالىق ۋنيۆەرسيتەتى مەن قازان فەدەرالدىق ۋنيۆەرسيتەتى اراسىندا العاش رەت ەكى ديپلوم باعدارلاماسى ىسكە قوسىلىپ, 70 ستۋدەنت وقۋعا قابىلداندى. سونداي-اق پاكىستان مەديتسينالىق ۋنيۆەرسيتەتىنىڭ فيليالىن اشۋ ماسەلەسى پىسىقتالىپ جاتىر.

ۇكىمەتتىڭ Telegram ارناسىنىڭ مالىمەتىنشە مەديتسينالىق قىزمەتكەرلەردىڭ قاۋىپسىزدىگىن قامتاماسىز ەتۋ ماقساتىندا دەنساۋلىق ساقتاۋ قىزمەتكەرلەرىنە قول كوتەرۋ وقيعالارىنا قاتىستى قىلمىستىق كودەكسكە جەكە باپ ەنگىزۋ باستاماسى كوتەرىلدى. ىشكى ىستەر مينيسترلىگىمەن بىرلەسىپ ءىس-قيمىل جوسپارى ازىرلەندى: مەديتسينالىق ۇيىمداردا 152 پوليتسيا بەكەتى ورناتىلدى. سونداي-اق مەملەكەتتىك مەديتسينالىق ۇيىمداردىڭ 98%-ى جانە جەكەمەنشىك ۇيىمداردىڭ 76%-ى جالپى سوماسى 3,1 ملرد تەڭگەگە كاسىبي جاۋاپكەرشىلىكتى ساقتاندىرۋ شارتتارىن جاساستى.