فوتوەكسپەديتسيا

قازاق حاندىعىنىڭ 550 جىلدىعىنا وراي ماۋسىم ايىنىڭ 19-ى مەن 21-ءى ارالىعىندا جامبىل-شۋ-مويىنقۇم اۋداندارىندا فوتوەكسپەديتسيا ءوت­كىزىلدى. شارانى ۇيىمداستىرۋشىلار  – ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فا­كۋلتەتى مەن «فوتوونەر» قو­عامدىق ءبىر­لەستىگى. يگى باستاماعا قولداۋ كورسەت­كەن جامبىل وبلىسىنىڭ اكىمدىگى مەن «نۇر وتان» پارتياسىنىڭ وبلىستىق فيليالى. فوتوەكسپەديتسيانىڭ العاشقى كۇنىندە ءباسپاسوز ءماسليحاتى ءوتتى. باسقوسۋدى اشقان ەكسپەديتسيا كەزىندە بىرگە ءجۇرىپ, جول كورسەتكەن «نۇر وتان» پارتياسى وبلىستىق فيليالى توراعاسىنىڭ ءبىرىنشى ورىنباسارى ماسات ءاشىم ۇلى شارانىڭ ەل تاريحىن تانىپ-بىلۋدە ماڭىزى زور ەكەنىن تىلگە تيەك ەتتى. جيىن بارىسىندا جۋرناليستيكا فاكۋلتەتىنىڭ دەكانى ساعاتبەك مەدەۋبەك ۇلى وبلىستىڭ اقپارات سالاسىندا ەڭبەك ەتىپ جۇرگەن باسشىلارىنا ديپلوم مەن سىيلىقتار تابىس ەتتى. فوتوساپارعا ەلىمىزدىڭ ءار وڭىرىنەن, استانا, الماتى قالالارى مەن ماڭعىستاۋ, جامبىل اۋداندارىنان فوتوتىلشىلەر مەن جاس ماماندار قاتىستى. سونىمەن, ەكسپەديتسيا جامبىل وبلىسى, تۇرار رىسقۇلوۆ اۋدانىندا ورنالاسقان اقىرتاس ساراي كەشەنىن فوتوعا تۇسىرۋدەن باستالدى. VIII عاسىردا ىرگەسى قالانعان تاستى قالا اقىرتاس ساراي, كەرۋەن ساراي, تورتكۇل, قاراۋىل مۇناراسى, وبالار سىندى ساۋلەتتىك-ارحەولوگيالىق كەشەندەردەن تۇرادى. قۇرىلىس ماتەريالدارى تاس جانە ءپىشىمى مالعا ءشوپ سالاتىن اقىرعا ۇقساس بولعاندىقتان, اقىرتاس دەپ اتالعان. سۋرەتتەرى بىرگە تاسقا قاشالىپ بەينەلەنگەن. بۇل تاڭبالار قازاقتىڭ كوشپەلى حالىق ەكەنىنىڭ تاعى ءبىر دالەلى. جولدىڭ ۇزاقتىعىنا بايلانىستى فو­توسۋرەتشىلەر جايساڭ جازىعىنداعى بالبال تاس مۇسىندەردى تۇنگى كەزەڭدە ءتۇ­سىردى. مۇسىندەگى ادامنىڭ قۇلاعىندا سىر­عا­سى, قولىندا قانجارى مەن قۇمى­راسى بار. ءار تاسى تۇنعان تاريح, قاسيەتتى جام­بىل جەرىندەگى فوتوەكسپەديتسيا قى­زىقتى جالعاستى. نازەركە ساندىبەك.