عۇمىرى تىم كەلتە (مۇمكىن كەلتە دە ەمەس...) سۋرەتشىنىڭ شىعارماشىلىعى جيناقتالعان قالىڭ البومدى پاراقتاپ وتىرىپ, «ۋاقىت ۇستەمدىگى» كارتيناسىنا كوزىمىز ەرەكشە تۇسكەن. ارينە, ءار سۋرەتى تىلسىمعا, جۇمباققا تولى. بوياۋ جاعىسى دا باسقالارعا ۇقسامايدى. ءتىپتى الەمدىك دەڭگەيدەگى كلاسسيكتەرگە دە ەلىكتەمەگەن سياقتى. قاي سۋرەتىنە قاراساڭىز دا, اۆتوردىڭ الاسۇرعان مىنەزى بايقالادى. الدىمىزداعى مىناۋ تۋىندىدا اۆتوردىڭ ىشكى تولقىنىسى عانا ەمەس, تۇتاس قازاقتىڭ تاعدىرى مەن تاريحى جاتقانداي كورىندى. سۋىق پەن جىلى تۇستەر تۇتاسقان پولوتنو كورگەن كوزگە مۇڭ ۇيالاتادى. كومپوزيتسياسى جيناقى. ءدال ورتاسىنا اۆتور ءوزىن بەينەلەگەن. قولىندا – پاليترا. پاليترادا سان ءتۇرلى بوياۋلارى قازاقتىڭ تاعدىرى ىسپەتتى بۋىرقانىپ جاتىر.
بەرگى شەپتە – ۇرەيلى ەل. كەيىپكەرلەرى ءار ءتۇرلى جاستا. ورتادا بالا قۇشاقتاعان كەيۋانا وتىرسا, وڭ جاعىندا – تۇلا بويى قورقىنىشقا تولى ايەل بەينەسى. ايەلدىڭ كۇيەۋى قايدا؟ بالكىم, سۇم سوعىستان ورالمادى. مۇمكىن كەشەگى ناۋبەت جىلدارى اشتىقتان كوز جۇمدى ما؟ كىم ءبىلسىن؟ قازاق دالاسىن ۋلاعان يادرولىق پوليگون سىناعى دا تالاي جاننىڭ ءومىرىن جالمادى. جاننىڭ دەيمىز, تۇتاس ايماقتى سانسىراتىپ كەتتى ەمەس پە؟ سول ءدۇمپۋدىڭ زاردابىن ەل ءالى كۇنگە تارتىپ كەلە جاتىر. ول-داعى ۋاقىتتىڭ ۇستەمدىگى شىعار.
كارتيناعا قاراڭىزشى. كيمەشەكتى كەيۋانا بايىپتى, بايسالدى قالىپتا وتىر. قانداي قيىندىق تونسە دە, جۇزىنەن قايسارلىق بايقالادى. ۋاقىت سالعان قاتپار-قاتپار اجىمدەرى ۇلت باسىنا تونگەن ناۋبەتتىڭ كۋاسىندەي. ءتىپتى توڭىرەككە تونگەن بۇگىنگى سەمەي پوليگونى دا اجەنىڭ ۇرەيىن الا قويماعان. تەك ۇرپاق اماندىعىن تىلەپ, نەمەرەسىن قاپسىرا قۇشاقتاعان. سارى كويلەكتى نەمەرەسى كورەرمەن كوزىنە تىك قارايدى. ءيا, ءبىز شە؟ ەرتەڭ ۇرپاق كوزىنە تىك قاراي الامىز با؟ ول ءۇشىن بۇگىنگى قادامىمىز نىق بولۋى كەرەك. شالىس باسقانىمىزدى ەرتەڭگى تولقىن ءاي كەشىرمەيدى.
تۋىندىداعى ءار دەتالدى تارقاتا بەرسەك, سان ءتۇرلى ويعا جەتەلەيدى. اجەنىڭ ارقا تۇسىنداعى قوس قىز دا ۇيقىدان جاڭا تۇرعان. جو-جوق, ءتۇن ۇيقىلارىن يادرولىق پوليگونداعى جارىلىس ءتورت بولگەن سەكىلدى. قىزداردىڭ ءبىرى قۇلاعىن تارس جاپقان. سول ارقىلى سۋرەتشى جارىلىستىڭ جويقىن ەكەنىن كورسەتكەن. ءور جاعىندا ءدال سول سەكىلدى تاعى ءبىر وتباسى بەينەلەنگەن. ولار دا قاۋىپتىڭ تونگەنىن جاڭا سەزىپ, قۇشاقتاسا قالعان. ال ەڭ ارعى پلاندا ساڭىراۋقۇلاق ءتارىزدى جارىلىس اينالانى ويران ەتكەندەي اسەر بەرەدى. ويراندادى دا. سىناق جىلدارى سانداعان تاعدىردىڭ توز-توزى شىعىپ, اۋىل بولىپ بەزىپ كەتكەن. الايدا دەندەپ كىرگەن اۋرۋ ۇرپاقتان-ۇرپاققا جالعاسىپ كەلەدى. كوككە ۇشقان شاڭنىڭ توزاڭى ءالى كۇنگە ىدىراي قويماعان. سۋرەتتە اسپان تۇنەرىپ, شۋدا بۇلتتار القىزىل تۇسكە ەنگەن. جارىلىس ساڭىراۋقۇلاعىنىڭ ەتەك تۇسىنداعى ۇشقان ۇشاق, زىمىراعان پويىز بۇل كۇننىڭ دە وتەرىنەن حابار بەرگەندەي. البەتتە, زامان تىنىش بولسا, ۋاقىت ەمشى. دەگەنمەن تاريح ۇمىتىلمايدى.
سۋرەتشىنىڭ كوپتەگەن كارتينالارىندا بوياۋدى ءىرى قىلقالاممەن جاقسا, بۇل پولوتنودا ءار بولشەككە ءمان بەرىپ, اسقان ۇقىپپەن جازعانداي كورىندى. اجەنىڭ كيمەشەگىندەگى ورنەكتەرگە دەيىن بەينەلەگەن. گۇلدى كويلەگى دە كورىك بەرىپ تۇر. كەيىپكەرلەردىڭ ەموتسياسىن قالاي شەبەرلىكپەن بەرگەن دەسەڭىزشى. بالا-شاعا مىناۋ ءومىردىڭ ىستىعى مەن سۋىعىنان بەيحابار كەيىپتە بولسا, ۇلكەندەر جاعى ۇرەيلى. جالپى, كارتينانىڭ ورىندالۋ تەحنيكاسىنداعى ۇلكەن ەرەكشەلىك, جىلى ءتۇس پەن سۋىق ءتۇستىڭ ۇندەسىپ, جىمداسىپ جاتۋىندا ەدى. كەڭىستىكتى جانى جاقتىرا قويمايتىن شەبەر بۇل كارتيناسىندا دا ول تۇسىنىكتى اينالىپ وتكەن. ايتپاقشى, كەنەپتىڭ قاق ورتاسىنداعى اۆتوپورترەتى مەنمۇندالايدى. قىلقالام شەبەرى ونىسىمەن وقيعا ورتاسىنان تاريحي اقپاراتتى زەرتتەپ, زەردەلەپ بارىپ كەنەپكە تۇسىرەتىنىن ايتقىسى كەلسە كەرەك-ءتى. بوياۋ ءتۇسىن سول زامانمەن ۇندەستىرە, شەندەستىرە بەينەلەگەن سۋرەتتەر بۇل عانا ەمەس. سۋرەتشىنىڭ سوڭىندا قالعان ءار تۋىندىسى تالعاممەن جازىلعان.
