قوستاناي. 8 مامىر. رۋدنىيدىڭ «باتس» جاستار تەاترى دايىنداعان لەۆ ءپروتاليننىڭ «تاعدىرلى ساتكە العىس ايتىڭدار» دەگەن سپەكتاكلىن «گورنياك» ويىن-ساۋىق ورتالىعىندا قويدى. بۇل تۋرالى egemen.kz ءتىلشىسى حابارلادى.
جاستار تەاترى بۇل قويىلىمعا وتكەن جىلدىڭ قاراشا ايىنان باستاپ دايىندالىپتى. تەاتردىڭ رەجيسسەرى ناتاليا كۋدرياۆتسەۆا سپەكتاكلدى شىعارۋ كاسىبي ەمەس تەاترعا وڭايعا تۇسپەگەنىن ايتتى.
ناتاليا كۋدرياۆتسەۆا: «پەسا كۇردەلى, ءماتىنى ۇزاق. ديالوگتار كۇردەلى, كورەرمەنگە اۋىر جىلداردىڭ سۋرەتىن جەتكىزۋ ءۇشىن ونىڭ ءار ءسوزىن بەلگىلى ماقاممەن جەتكىزۋ كەرەك بولدى» دەدى.
سپەكتاكلدە ويناعان اكتەرلەردىڭ ءبىرازى بۇرىن تەاتر جۇمىسىنا قاتىسىپ, ءبىراز رولدەردى وايناعان, ال كوپشىلىگى ساحناعا العاش شىقتى. بۇل دا بەلگىلى قيىندىق تۋعىزدى. ولار سپەكتاكل شىنايى شىعۋ ءۇشىن سوعىس تاقىرىبىنا ارنالعان كينولاردى كورىپ, كىتاپتاردى وقىدى, سوعىس جىلدارىنىڭ مۋزىكالىق شىعارمالارىن تىڭدادى.
اكتريسا ليۋبوۆ بەردىگينا: «مەنىڭ ءرولىم – حيرۋرگ, سوعىس ابدەن سىلكىلەگەن پولكوۆنيك ايەل سوكولوۆا بولدى. ونىڭ سوعىستا سانيتاركا بولىپ ىستەگەن قىزى قازا تاپتى. وتە كۇردەلى رول, بۇرىن ماعان مۇنداي رول تاپ كەلگەن ەمەس. ونىڭ ايتاتىن بىرنەشە اۋىر سوزدەرى بولدى, سونى شىنايى جەتكىزۋ ءۇشىن كوپ جۇمىس ىستەدىم», دەدى.
سپەكتاكل سيۋجەتى 1945 جىلى شىعىس پرۋسسياداعى كەڭەس اسكەرلەرى مەن تۇتقىنعا تۇسكەن ۆەرماحت سوداتتارى ەمدەلگەن اسكەري گوسپيتالدە وتەدى. سيۋجەت جەلىسى تۇتقىن وفيتسەر فون گيۋنتەر مەن ۇلتى ەۆرەي حيرۋرگ سازونەۆ توڭىرەگىندە ءوربيدى. ەشتەڭەگە قاراماي, حيرۋرگ ءوزىنىڭ پاتسيەنتىن ەمدەيدى. سپەكتاكل باستالاردا كورەرمەن ساحناداعى «سپەكتاكل سوعىسقا قاتىسىپ, ادام قالپىن ساقتاپ قالعاندارعا ارنالادى» دەگەن جازۋدى وقىدى. قويىلىم اياقتالعاندا بۇل جازۋدىڭ ءمان-ماڭىزىن تۇسىنەدى. سپەكتاكلدىڭ شىعۋىنا قامقورلىق جانە دەمەۋشىلىك جاساعان رۋدنىي جاستار ورتالىعىنىڭ جەتەكشىسى ماكسيم فرولوۆ مۇنداي سپەكتاكلدىڭ تەك مەرەكەدە عانا ەمەس, ۇنەمى ءجۇرۋ كەرەكتىگىن, ويتكەنى جاستاردىڭ تاريحتى ۇمىتپاۋى تيىستىگىن ايتتى.
ماكسيم فرولوۆ: «سپەكتاكلدى بەي-جاي قالىپپەن كورۋ مۇمكىن ەمەس, تاماعىڭا وكسىك تىعىلادى. ءبىزدىڭ قالاداعى باتس جاستار تەاترىنىڭ ىزدەنىسىنە ريزامىز. ونان ءوسىپ شىققان اكتەرلەر قازىر قازاقستان مەن رەسەيدىڭ ۇلكەن ساحنالارىندا ءجۇر», دەدى.
ءنازيرا جارىمبەتوۆا.
دەرەك, سۋرەت: ng.kz
